អន្តរជាតិ
វេណេស៊ុយអេឡាចាប់ឧត្តមសេនីយ៍ម្នាក់ដោយចោទថាពាក់ព័ន្ធនឹងធ្វើលួចធ្វើឃាតប្រធានាធិបតី
× វេណេស៊ុយអេឡាបានចាប់ខ្លួនឧត្តមសេនីយ៍ម្នាក់ ក្នុងពេលដែលរដ្ឋាភិបាលនេះបន្តការស៊ើបអង្កេតលើករណីប៉ុនប៉ងធ្វើឃាតប្រធានាធិបតី នីកូឡា ម៉ាឌុយរ៉ូ នៅដើមខែសីហានេះ។ តំណាងស្ថាប័នអយ្យការវេណេស៊ុយអេឡាបញ្ជាក់បែបនេះនៅថ្ងៃអង្គារទី ១៤ ខែសីហា។
បើតាមទីភ្នាក់ងារព័ត៌មាន AFP មន្ត្រីយោធាដែលត្រូវចាប់ខ្លួនដោយសារពាក់ព័ន្ធនឹងការលបធ្វើឃាតប្រធានាធិបតីនេះមានឋានន្តរស័ក្តិថ្នាក់ឧត្តមសេនីយ៍ទោបម្រើការងារក្នុងកងឆ្នាំការពារជាតិ ហើយលោកមានឈ្មោះថា Alejandro Perez Gomez។
អគ្គរដ្ឋអាជ្ញាវេណេស៊ុយអេឡា Tarek William Saab បង្ហើបថា ឧត្តមសេនីយ៍ខាងលើបានបង្ហាញខ្លួននៅតុលាការកាលពីថ្ងៃចន្ទ ជាមួយអ្នកនយោបាយបក្សប្រឆាំងលោក Juan Requesens និងមន្ត្រីយោធាថ្នាក់វីរសេនីយ៍ឯកម្នាក់ទៀតគឺលោក Pedro Javier Zambrano។
មកដល់ឥឡូវនេះ មនុស្ស ១៤នាក់ហើយត្រូវបានចាប់ខ្លួន និងត្រូវចោទប្រកាន់ដោយសារមានជាប់ពាក់ព័ន្ធនឹងការប៉ុនប៉ងលួចធ្វើឃាតប្រធានាធិបតី ម៉ាឌុយរ៉ូ ពេលដែលលោកកំពុងផ្តល់សុន្ទរកថាទៅកាន់ក្បួនយោធានៅក្នុងក្រុងការ៉ាកាសថ្ងៃ ៤ ខែសីហា។ អគ្គរដ្ឋអាជ្ញាវេណេស៊ុយអេឡាបង្ហើបថា ការចាប់ខ្លួនបន្ថែមទៀតអាចកើតនៅពេលខាងមុខផង។
តាមពិតទៅ ការចាប់ខ្លួនមន្ត្រីយោធាជាន់ខ្ពស់ថ្នាក់ឧត្តមសេនីយ៍ និងវីរសេនីយ៍ខាងលើនេះកើតឡើងក្រោយពេលដែលរដ្ឋាភិបាលវេណេស៊ុយអេឡាបញ្ជាឲ្យចាប់ខ្លួនទាហានជាច្រើនរយនាក់ដែលមានពាក់ព័ន្ធនឹងការរៀបចំចលនាប្រឆាំងប្រធានាធិបតីដោយទទួលបានជំនួយពីកូឡុំប៊ី និងអាមេរិកផង។ បើតាមទីភ្នាក់ងារ AFP ទាហានដែលត្រូវចាប់ខ្លួនមានមិនតិចជាង ២០០នាក់ឡើយ។
លោក ម៉ាឌុយរ៉ូ អះអាងថា ការប៉ុនប៉ងធ្វើឃាតនេះធ្វើឡើងដោយប្រើប្រាស់គ្រឿងផ្ទុះបំពាក់លើយន្តហោះដ្រូន។យ៉ាងណាមិញ ខាងបក្សប្រឆាំងចោទប្រកាន់ថា រដ្ឋាភិបាលលោក ម៉ាឌុយរ៉ូ ព្យាយាមបង្កើតព្រឹត្តិការណ៍នេះឡើយដើម្បីបង្រា្កបក្រុមប្រឆាំង។
ក្រោយការវាយប្រហារនេះ ទីបញ្ជាការយោធាជាន់ខ្ពស់របស់វេណេស៊ុយអេឡាបានចេញសេចក្តីថ្លែងការណ៍មួយបង្ហាញពីការគាំទ្រ និងភក្តីភាពឥតមានលក្ខខណ្ឌចំពោះប្រធានាធិបតី ម៉ាឌុយរ៉ូ ហើយប្តេជ្ញាចិត្តការពាររបបដឹកនាំនេះដែរ។ កងទ័ព និងកម្លាំងប្រដាប់អាវុធផ្សេងទៀតនៅតែជាខ្នងបង្អែកដ៏ធំរបស់លោក ម៉ាឌុយរ៉ូ ដើម្បីរក្សាអំណាច បើទោះបីជាសេដ្ឋកិច្ចជាតិក្ស័យធន ហើយភាពចលាចលសង្គមកើតឡើងកាន់តែច្រើនក៏ដោយ។
ដោយឡែក ស្ថាប័នអគ្គរដ្ឋអាជ្ញាវេណេស៊ុយអេឡាក៏ស្នើសុំឲ្យមានការបង្កគណនីធនាគារលោក Juan Requesens ដែលជាសមាជិកសភាក្រុមប្រឆាំង និងគណនីលោក Julio Borges ដែលជាប្រធានក្រុមសមាជិកសភាបក្សប្រឆាំងនិងបានរត់ភៀសខ្លួនទៅកាន់ប្រទេសកូឡុំប៊ីផងដែរ។ អ្នកទាំងពីរនេះត្រូវបានសភាវេណេស៊ុយអេឡាដែលមានភក្តីភាពចំពោះរដ្ឋាភិបាលលោក ម៉ាឌុយរ៉ូ ដកអភ័យឯកសិទ្ធិរួចរាល់ហើយកាលពីសប្តាហ៍មុននោះ។
Tag:
វេណេស៊ុយអេឡា
នីកូឡា ម៉ាឌុយរ៉ូ
© រក្សាសិទ្ធិដោយ thmeythmey.com