Real Madrid បានចាប់ផ្តើមជីវិតដោយគ្មានខ្សែប្រយុទ្ធឆ្មើម Cristiano Ronaldo និងអតីតអ្នកចាត់ការ Zinedine Zidane ជាមួយនឹងបរាជ័យ ៤-២ ក្នុងការប្រកួតដណ្តើមពានរង្វាន់ UEFA Super Cup ទល់នឹងក្រុម Atletico Madrid នៅរាត្រីថ្ងៃទី១៥ ខែសីហា។
គ្រាប់បាល់ស៊ុតបញ្ចូលទី២គ្រាប់ក្នុងម៉ោងបន្ថែម១៥នាទីពីរដងដែលធ្វើបានដោយ Saul Niguez និង Koke បានជួយឲ្យ At-Madrid ដែលជាម្ចាស់ជើងឯក Europa League រដូវកាលមុនយកឈ្នះ Real Madrid ម្ចាស់ជើងឯក Champions League ក្នុងលទ្ធផល ៤-២ ដើម្បីលើកពាន Uefa Super Cup។
ក្នុងការប្រកួតក្នុងម៉ោងធម្មតា៩០នាទី ក្រុមមកពីលីគកំពូលអេស្ប៉ាញ La Liga ដែលមានមូលដ្ឋានក្នុងក្រុងម៉ាឌ្រីដទាំងពីរបានបញ្ចប់ទៅក្នុងលទ្ធផល ២-២ ដែលធ្វើបានដោយខ្សែប្រយុទ្ធ Diego Costa ទាំង២គ្រាប់ ហើយ Real ធ្វើបានដោយ Karim Benzema និង Sergio Ramos។
ក្រោមការដឹកនាំ៣រដូវកាល Zidane វ័យ៤៧ឆ្នាំ Real ឈ្នះក្នុងការប្រកួតផ្តាច់ព្រ័ត្រ Champions League ទាំង៣លើកជាប់គ្នា ដោយមានការរួមចំណែកយ៉ាងសំខាន់ពីអតីតខ្សែប្រយុទ្ធ Manchester United និងម្ចាស់ពាន ballon d'or ៥សម័យ Ronaldo ថែមទៀតផង។
ម្ចាស់ជើងឯកពានកំពូលអឺរ៉ុប១៣សម័យ Real Madrid ជាក្រុមដែលឈ្នះពាន Super Cup ច្រើនជាងគេរហូតដល់ទៅ ៦លើក ក្នុងឆ្នាំ ១៩៩៨, ២០០០, ២០០២, ២០១៤, ២០១៦ និង ២០១៧។ ចំណែក Atletico Madrid ធ្លាប់ឈ្នះ៣លើកគិតទាំងលើនេះទៀត ពោលគឺក្នុងឆ្នាំ ២០១០, ២០១២ និង ២០១៨៕