សេដ្ឋកិច្ចអន្តរជាតិ
អន្តរជាតិ
ចិន នឹងបញ្ជូនមន្ត្រីទៅចរចាជាមួយអាមេរិកដើម្បីរកច្រកចេញជម្លោះពាណិជ្ជកម្ម
× រដ្ឋាភិបាលក្រុងប៉េកាំង នឹងបញ្ជូនមន្ត្រីមួយក្រុមទៅកាន់អាមេរិកដើម្បីបន្តការចរចារកដំណោះស្រាយជម្លោះពាណិជ្ជកម្មរវាងមហាអំណាចទាំងពីរ ខណៈភាគីទាំងសងខាងបន្តដំឡើងពន្ធលើផលិតផលគ្នាទៅមក។ ការចរចាជុំថ្មីនេះ ដែលគ្រោងធ្វើនៅចុងខែសីហា គឺជាជំនួបលើកដំបូងក្នុងរយៈពេលពីរខែមកនេះក្រោយការចរចាលើកមុនៗបានបរាជ័យ។ ទោះលទ្ធផលទៅជាយ៉ាងណា ការជួបគ្នានេះជាសញ្ញាវិជ្ជមានមួយដើម្បីឈានទៅរកច្រកចេញនៃវិបត្តិនេះ។
ចិន និងអាមេរិក នឹងបើកការចរចាម្ដងទៀតដើម្បីស្វែងរកដំណោះស្រាយនៃវិបត្តិក្នុងវិស័យពាណិជ្ជកម្មរវាងប្រទេសទាំងពីរ។ ខុសពីលើកមុនៗ ចិននឹងបញ្ជូនថ្នាក់មន្ត្រីថ្នាក់អនុរដ្ឋមន្ត្រីទៅចរចាជាមួយសមភាគីអាមេរិកនៅដំណាច់ខែសីហានេះ។ ក្រសួងពាណិជ្ជកម្មចិននៅថ្ងៃទី១៦ ខែសីហា ប្រកាសថា អនុរដ្ឋមន្ត្រីពាណិជ្ជកម្មទទួលការចរចាអន្តរជាតិ Wang Shouwen នឹងជួបតទល់ជាមួយរដ្ឋលេខាធិការពាណិជ្ជកម្ម David Malpass តាមការអញ្ជើញរបស់អាមេរិក។
តាមការប្រកាសខាងលើ ក្រុងប៉េកាំងក៏បានបញ្ចេញជំហរប្រឆាំងដាច់ខាតសកម្មភាពឯកតោភាគីរបស់អាមេរិក ប្រឆាំងនយោបាយគាំពារនិយម និងមិនទទួលការដាក់ទណ្ឌកម្មណាមួយឡើយ។ យ៉ាងណាមិញ ចិនរីករាយស្វាគមន៍ការសន្ទនាទាំងឡាយដោយផ្អែកលើគោលការណ៍ស្មើភាព សុច្ចរិត និងការគោរពប្រយោជន៍គ្នាទៅមក។
ការចរចាថ្នាក់មន្ត្រីកម្រិតអនុរដ្ឋមន្ត្រីនេះ ទំនងជាមិនអាចដោះស្រាយការខ្វែងគំនិតគ្នាបានទេ ដ្បិតកាលពីការចរចាកន្លងមកដែលធ្វើឡើងនៅកម្រិតមន្ត្រីជាន់ខ្ពស់ផង ក៏គ្មានលទ្ធផលអ្វីដែរ។ ក្នុងការចរចាចុងក្រោយក្នុងខែមិថុនា ឧបនាយករដ្ឋមន្ត្រីចិន លីវ ហឺ បានជជែកជាមួយរដ្ឋមន្ត្រីពាណិជ្ជកម្ម Wilbur Ross នៅទីក្រុងប៉េកាំង ប៉ុន្តែមិនអាចសម្រេចបានផ្លែផ្កាឡើយ ហើយមហាអំណាចទាំងពីរក៏ចាប់ធ្វើសង្គ្រាមពន្ធតែម្ដង។
កាលពីខែមុន រដ្ឋបាលប្រធានាធិបតី ដូណាល់ ត្រាំ បានចាប់ផ្ដើមអនុវត្តពន្ធតម្លៃ៣៤ពាន់លានដុល្លារលើផលិតផលចិន ដែលធ្វើឲ្យចិនចាត់វិធានការដូចគ្នាត្រឡប់វិញ។ នៅខែសីហានេះ រដ្ឋបាលក្រុងវ៉ាស៊ីនតោននឹងអនុវត្តការដំឡើងពន្ធចំនួន១៦ពាន់ដុល្លារទៀត។ នៅដើមខែនេះដែរ ក្រុងប៉េកាំងបានដំឡើងពន្ធសរុបចំនួន៦០ពាន់លានដុល្លារលើទំនិញអាមេរិករាប់រយមុខ បន្ទាប់ពីលោក ត្រាំ បានប្រកាសផែនការដំឡើងពន្ធដល់ទៅ២៥ភាគរយ ស្មើនឹងជាង២០០ពាន់លានដុល្លារលើទំនិញចិន។
ការដំឡើងពន្ធនាំចូលផ្ទួនលើចិននេះ ត្រូវបានលោក ត្រាំ ចាត់ទុកជាសង្គ្រាមដែលងាយស្រួលឈ្នះ ហើយលោកនឹងបន្តចំណាត់ការនេះទៀត បើចិនមិនព្រមមានវិធានការដើម្បីកាត់បន្ថយឱនភាពពាណិជ្ជកម្មរបស់អាមេរិកទេនោះ។ នេះក៏ព្រោះតែលោក ត្រាំ មិនពេញចិត្តនឹងជញ្ជីងពាណិជ្ជកម្មទ្វេភាគីជាមួយចិន ដែលអាមេរិកមានឱនភាពដល់ទៅ៣៥០ពាន់លានដុល្លារក្នុងឆ្នាំ២០១៧ ៕
Tag:
អាមេរិក
ចិន
ពាណិជ្ជកម្ម
© រក្សាសិទ្ធិដោយ thmeythmey.com