លោក ខៀវ កាញារីទ្ធ ថា សមាសភាពរដ្ឋាភិបាល ជាអ្នកមានសមត្ថភាព និងប្រជាប្រិយភាព

ជាតិ

នយោបាយជាតិ

លោក ខៀវ កាញារីទ្ធ ថា សមាសភាពរដ្ឋាភិបាល ជាអ្នកមានសមត្ថភាព និងប្រជាប្រិយភាព

17, Aug 2018 , 1:20 pm

រូបភាព

រូបភាពផ្ដល់សិទ្ធិដោយលោក ខឹម សុវណ្ណារ៉ា/ក្រសួងព័ត៌មាន

ដោយ: គី សុខលីម (Ky Soklim)

ភ្នំពេញ៖ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មិនអាចមានប្រសាសន៍ច្រើនអំពីសមាសភាពរដ្ឋាភិបាលអាណត្តិទី៦ ដែលគ្រោងនឹងត្រូវបង្កើតនៅដើមខែកញ្ញាក្រោយនេះឡើយ។ ប៉ុន្តែមន្ត្រីជាន់ខ្ពស់រូបនេះអះអាងថា សមាជិករដ្ឋាភិបាលគឺជាមនុស្សដែលមានសមត្ថភាព និងមានប្រជាប្រិយភាព។ លោករដ្ឋមន្ត្រីបានមានប្រសាសន៍ប្រាប់សារព័ត៌មានថ្មីៗយ៉ាងខ្លី នៅក្រោយជំនួបរវាងលោក និងក្រុមការងារវិទ្យុFM១០២ នាព្រឹកថ្ងៃទី១៧ខែសីហានេះ នៅក្រសួងព័ត៌មាន។

តើឥស្សរជនណាខ្លះជាសមាជិករដ្ឋាភិបាល និងជាពិសេសជារដ្ឋមន្ត្រី? នេះជាសំណួរដែលសាធារណជនកំពុងសួរគ្នា? រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ក៏មិនអាចមានប្រសាសន៍អំពីសមាសភាពនេះដែរ។ ប៉ុន្តែអ្វីដែលមន្ត្រីជាន់ខ្ពស់រូបនេះអាចបញ្ជាក់បាន គឺសមាជិករដ្ឋាភិបាលនឹងជាមនុស្សដែលមានសមត្ថភាព និងប្រជាប្រិយភាព។

សម្រាប់លោករដ្ឋមន្ត្រីក្រសួងព័ត៌មាន ចំណុចទាំងពីរខាងលើ អាចជាចំណុចស្នូលសម្រាប់អនាគតនៃគណបក្សប្រជាជនកម្ពុជារបស់លោកទៀតផង ដោយលោកបញ្ជាក់យ៉ាងដូច្នេះ៖«បើសិនជាគណបក្សឈ្នះឆ្នោត ចង់បន្តឈ្នះ ត្រូវរកមនុស្សដែលមានសមត្ថភាព និងមានប្រជាប្រិយភាព»។

ខុសពីអាណត្តិមុនៗ ដែលនៅមុនការបង្កើតរដ្ឋាភិបាល វាតែងមានដំណឹងលេចធ្លាយអំពីសមាសភាពគណៈរដ្ឋមន្ត្រី។ នៅក្រោយការបោះឆ្នោត គេបានឮតែប្រសាសន៍សម្តេច ហ៊ុន សែន តែម្តងគត់ និងតែម្នាក់ឯង ដែលបានបង្ហើបថា សមាជិករដ្ឋាភិបាល ពិសេសសមាសភាពរដ្ឋមន្ត្រី ត្រូវបានរៀបចំរាល់អស់ហើយ។

កាលពីពេលថ្មីៗនេះ ប្រធានគណបក្សប្រជាជនកម្ពុជា ដែលបានឈ្នះការបោះឆ្នោតរហូតដល់កាន់កាប់អាសនៈរដ្ឋសភាទាំង១២៥ បានថ្លែងយ៉ាងដូច្នេះថា៖« [សមាជិករដ្ឋាភិបាលអាណត្តិនេះ] មានចំនួនតិចទេ។ មិនសំពីងសំពោងដូចមុនឡើយ។ រដ្ឋាភិបាល ខ្ញុំបង្កើត និងមាននៅក្នុងបញ្ជីរួចហើយ មិនពិបាកទេ។ ហើយក្បាលម៉ាស៊ីនរដ្ឋសភា ក៏រៀបចំរួចហើយដែរ»៕