អន្តរជាតិ
អាមេរិកព្រមានរដ្ឋាភិបាលហ្វីលីពីនដែលចង់ទិញនាវាមុជទឹកពីរុស្ស៊ី
× មន្ត្រីជាន់ខ្ពស់ក្រសួងការពារជាតិអាមេរិកបានព្រមានហ្វីលីពីនដែលមានបំណងចង់ទិញអាវុធធុនធ្ងន់ពីរុស្ស៊ីជំនួសឲ្យការទិញពីសម្ព័ន្ធមិត្តអាមេរិក និងស្នើឲ្យហ្វីលីពីនពិចារណាឡើងវិញដ្បិតថា អាមេរិកជាដៃគូមួយដែលល្អជាងរុស្ស៊ី។
ថ្ងៃ ១៦ ខែសីហា ឧបការីរដ្ឋមន្ត្រីការពារជាតិទទួលបន្ទុកកិច្ចការសន្តិសុខអាស៊ី និងប៉ាស៊ីហ្វិកលោក Randall Schriver បានអះអាង ហ្វីលីពីនត្រូវគិតគូរដោយប្រុងប្រយ័ត្នចំពោះបញ្ហាទិញសព្វាវុធនេះព្រោះវាប៉ះពាល់សម្ព័ន្ធភាពរវាងអាមេរិក និងហ្វីលីពីនដែលមានយូរអង្វែងមកនោះ។
តាមសារព័ត៌មានហ្វីលីពីន Rappler មន្ត្រីជាន់ខ្ពស់រូបនេះបាននិយាយដូច្នេះ៖ បើសិនជាគេបន្តនីតិវីធីបញ្ជាទិញអាវុធធុនធ្ងន់ពីរុស្ស៊ីនោះ ខ្ញុំមិនគិតថា វាជារឿងប្រសើរឡើយសម្រាប់ទំនាក់ទំនងក្នុងនាមជាសម្ព័ន្ធមិត្តទេ ហើយខ្ញុំគិតថា ចុងក្រោយទៅយើងនៅជាដៃគូដែលល្អជាងរុស្ស៊ីសម្រាប់ហ្វីលីពីន។
លោក Schriver ពន្យល់ថា ហ្វីលីពីនគួរទិញអាវុធពីអាមេរិកក្នុងនាមជាមហាអំណាច ព្រោះអាមេរិកចាត់ទុកហ្វីលីពីនជាសម្ព័ន្ធមិត្តដ៏ចំណាស់មួយរបស់ខ្លួននៅអាស៊ី។ លោកបន្ថែមថា ហ្វីលីពីនមិនគួរចំណាយលុយទិញសព្វាវុធពីរុស្ស៊ីឡើយ ព្រោះវាមានរឿងអវិជ្ជមានច្រើនក្នុងនោះមានការត្របាក់យកទឹកដីគ្រីមៀពីអ៊ុយក្រែន, ការប្រើប្រាស់អាវុធគីមីប្រឆាំងអតីតចារកម្មរុស្ស៊ី និងបញ្ហាច្រើនទៀតដែរ។
តាមពិតទៅ ការលើកឡើងរបស់មន្ត្រីជាន់ខ្ពស់អាមេរិកនេះគឺឆ្លើយតបនឹងសំណួររបស់អ្នកសារព័ត៌មានជុំវិញចេតនាបញ្ជាទិញសព្វាវុធធុនធ្ងន់ពីរុស្ស៊ីរបស់រដ្ឋាភិបាលហ្វីលីពីន។
កាលពីប៉ុន្មានសប្តាហ៍មុន រដ្ឋមន្ត្រីការពារជាតិហ្វីលីពីនលោក Delfin Lorenzana បានបង្ហើបប្រាប់អ្នកសារព័ត៌មានថា ហ្វីលីពីនកំពុងស្វែងរកទិញនាវាមុជទឹកដើម្បីពង្រឹងសមត្ថភាពកងទ័ពជើងទឹក ហើយរុស្ស៊ី កូរ៉េខាងត្បូងនិងបារាំងជាដើមនោះជាទីផ្សារអាវុធដែលហ្វីលីពីនសំឡឹងឃើញ។
ប៉ុន្តែប្រមុខការពារជាតិហ្វីលីពីនរូបនេះបានព្រលយថា ហ្វីលីពីនទំនងជាជ្រើសរើសយករុស្ស៊ី ហើយកិច្ចព្រមព្រៀងទិញនាវាមុជទឹកនោះនឹងអាចចុះរួមគ្នាខាងមុខផង។ បើសិនជាកិច្ចព្រមព្រៀងត្រូវចុះហត្ថលេខាមែននោះ រុស្ស៊ីនឹងអាចផ្គត់ផ្គង់នាវាមុជទឹកបួនគ្រឿង(Kilo class) ដល់ហ្វីលីពីនផង។
ហ្វីលីពីនក្រោមអាណត្តិដឹកនាំរបស់ប្រធានាធិបតី រ៉ូឌ្រីហ្គោ ឌូទើតេ មិនដែរមានបំណងចង់ពឹងផ្អែកលើអាមេរិកដូចមេដឹកនាំហ្វីលីពីនមុនៗឡើយ។ លោកបញ្ជាក់ថា ហ្វីលីពីនត្រូវមានគោលនយោបាយការបរទេសដែលឯករាជ្យមិនរណបមហាអំណាចទោះជាសម្ព័ន្ធមិត្តក៏ដោយ ហើយដើម្បីធានាបានថាខ្លួនឯករាជ្យហ្វីលីពីនត្រូវរត់រកដៃគូសហប្រតិបត្តិការថ្មីបន្ថែមដូចជារុស្ស៊ីនិងចិន។ ក្នុងចុងខែឧសភាឆ្នាំមុន លោក បានបំពេញទស្សនកិច្ចផ្លូវការទៅរុស្ស៊ី ហើយក៏បានឆ្លៀតឱកាសជជែកពិភាក្សាលើការពង្រឹងកិច្ចសហប្រតិបត្តិការការពារជាតិ និងសុំទិញសព្វាវុធធុនធ្ងន់ពីរុស្ស៊ីផងដែរ៕
Tag:
អាមេរិក
រុស្ស៊ី
ហ្វីលីពីន
© រក្សាសិទ្ធិដោយ thmeythmey.com