ជាតិ
ផ្លូវជាតិលេខ៥១ កំពុងមានសក្តានុពលខ្លាំងសម្រាប់វិស័យអចលនទ្រព្យ
× ផ្លូវជាតិលេខ៥១ កំពុងផ្លាស់ប្តូរមុខមាត់ថ្មីក្នុងវិស័យអចលនទ្រព្យ ពិសេសវិស័យដីធ្លី។ កំណើននៃវិស័យអចលនទ្រព្យក្នុងតំបន់នេះ កើនឡើងដោយសារផ្លូវជាតិលេខ៥១នេះ នឹងក្លាយជាផ្លូវក្រវ៉ាត់ក្រុងនាពេលអនាគត និងជាផ្លូវយុទ្ធសាស្ត្រមួយ សម្រាប់សម្រួលការធ្វើដំណើរ និងការដឹកជញ្ជូនទំនិញ ឆ្ពោះទៅកាន់កំពង់ផែស្វយ័តក្រុងព្រះសីហនុ។
ផ្លូវជាតិលេខ៥១ តភ្ជាប់ពីផ្លូវជាតិលេខ៤ ត្រង់ចំណុចថ្នល់ទទឹង ទៅផ្លូវជាតិលេខ៥ ត្រង់ចំណុចផ្សារឧដុង្គ ដែលមានប្រវែង៣៧.៩៥គីឡូម៉ែត្រ និងចម្ងាយប្រមាណជាង១៨គីឡូម៉ែត្រពីទីក្រុងភ្នំពេញ (គិតពីចោមចៅ ទៅផ្សារថ្នល់ទទឹង)។ បច្ចុប្បន្នផ្លូវជាតិលេខ៥១នេះ កំពុងដំណើរការសាងសង់ ក្រោមហិរញ្ញប្បទានពីរាជរដ្ឋាភិបាលចិន និងថវិកាបដិភាគរបស់រាជរដ្ឋាភិបាលកម្ពុជា ហើយគ្រោងបញ្ចប់ជាផ្លូវការនៅឆ្នាំ២០២០។
លោក សន សៀប ស្ថាបនិក និងនាយកប្រតិបត្តិរបស់ក្រុមហ៊ុន ឃី រៀលអ៊ីស្ទេត មាន ប្រសាសន៍ថា ដីធ្លីតាមបណ្តោយផ្លូវជាតិលេខ៥១ មានសក្តានុពលខ្លាំង សម្រាប់វិស័យឧស្សាហកម្ម និងលំនៅដ្ឋាន។ លោកបានពន្យល់ថា តំបន់នេះជាតំបន់ខ្ពង់រាបមិនលិចទឹក ដោយតភ្ជាប់គ្នារវាងផ្លូវជាតិសំខាន់ៗ មានផ្លូវវរថភ្លើងឆ្លងកាត់ ពីចំណុចផ្សារបាត់ដឹង និងស្ថិតនៅជាប់តំបន់វិនិយោគថ្មី នៃខណ្ឌព្រែកព្នៅ។ ចំណុចទាំងនេះ ជាអំណោយផលល្អ សម្រាប់តំបន់ទាំងមូល។
«មានវិនិយោគិនជាច្រើន កំពុងសម្លឹងមើលពីសក្តានុពលនៅទីតាំងនេះ និងបានចាប់ផ្តើមទិញដីក្នុងទ្រង់ទ្រាយធំ សម្រាប់ការវិនិយោគនាពេលអនាគត»។ នេះបើតាមលោក សៀប។
ចំណែក លោក ម៉ៃ សាមន ប្រធានផ្នែកប្រឹក្សាយោបល់ និងស្រាវជ្រាវអចលនវត្ថុ នៃក្រុមហ៊ុន ឃី រៀលអ៊ីស្ទេត បានឲ្យដឹងថាផ្លូវជាតិលេខ៥១ មានសក្តានុពលសេដ្ឋកិច្ច ដោយសារតំបន់នេះ សម្បូររោងចក្រឧស្សាហកម្ម សិប្បកម្ម គម្រោងលំនៅដ្ឋាន និងការអភិវឌ្ឍន៍ដីឡូតិ៍ជាច្រើនកន្លែង។ លោកបន្ថែមថា នៅតាមបណ្តោផ្លូវលេខ៥១នេះ មានរោងចក្រជាង៥០កន្លែង កំពុងដំណើរការ និងមានផ្សារ សាលារៀន ស្ថាប័នហិរញ្ញវត្ថុ និងកន្លែងសេវាកម្មផ្សេងៗ។
លោក សាមន បានបញ្ជាក់ថាតម្លៃដីតាមបណ្តោផ្លូវនេះ កំពុងកើនឡើងគួរឲ្យកត់សម្គាល់ ដោយដីឡូតិ៍មាន ទំហំ៥ម៉ែត្រ x ២០ម៉ែត្រ មានតម្លៃចាប់ពី ២០.០០០ ដល់ជិត ៤០.០០០ដុល្លារ។ សម្រាប់ដីឆៅ(ដីមិនមានការអភិវឌ្ឍន៍) ដែលមានក្បាលដី ពី២០ ទៅ៣០ម៉ែត្រការ៉េ មានតម្លៃពី៦០ ទៅ១០០ដុល្លារ ក្នុងមួយម៉ែត្រការ៉េ។ បើធៀបនឹងមួយឆ្នាំមុន មានតម្លៃតែ៣០ ទៅ៥០ដុល្លារ ក្នុងមួយម៉ែត្រការ៉េ។
ដីដែលមានទំហំធំ ចាប់ពីមួយហិកតាឡើងទៅមានតម្លៃ ៣០ ទៅ៤០ដុល្លារ ក្នុងម៉ែត្រការ៉េ ខណៈពីមុនមានតម្លៃពី ១៥ ទៅ ២០ដុល្លារប៉ុណ្ណោះ។ នេះបើតាមការលើកឡើងរបស់លោក សាមន។
លោកលោក ម៉ៃ សាមន ជឿថាតម្លៃដីនឹងហក់ឡើងខ្លាំង បន្ទាប់ពីផ្លូវជាតិលេខ ៥១ បានបញ្ចប់ការសាងសង់៕
Tag:
សេដ្ឋកិច្ច
អចលនទ្រព្យ
ផ្លូវជាតិ
កំពង់ស្ពឺ
ភ្នំពេញ
© រក្សាសិទ្ធិដោយ thmeythmey.com