អន្តរជាតិ
អតីតអគ្គលេខាធិការ UN លោក កូហ្វី អាណាន់ ទទួលមរណភាពក្នុងអាយុ៨០ឆ្នាំ
× អតីតអគ្គលេខាធិការអង្គការសហប្រជាជាតិ (UN )លោក កូហ្វី អាណាន់ បានទទួលមរណភាពក្នុងអាយុ៨០ឆ្នាំ។ បើតាមមូលនិធិកូហ្វីអាណាន់ អគ្គលេខាធិការទី៧ របស់អង្គការសហប្រជាជាតិដែលជាជនជាតិហ្គាណារូបនេះស្លាប់ដោយសារមានជំងឺរយៈពេលខ្លីប៉ុណ្ណោះ។
លោក កូហ្វី អាណាន់ ត្រូវបានគេស្គាល់ថាជា អគ្គលេខាធិិការអង្គការសហប្រជាជាតិមួយរូបដែលមានឈ្មោះល្បីល្បាញខ្លាំងលើពិភពលោក ដោយសារចំណេះដឹង ភាពប៉ិនប្រសព្វ និងការប្រឹងប្រែងដ់ើម្បីសន្តិភាពពិភពលោក។ លោកបានក្លាយជាម្ចាស់ពានរង្វាន់ណូបែលសន្តិភាពក្នុងឆ្នាំ ២០០១ និងបានទទួលការគាំទ្រខ្ពស់សម្រាប់ការដឹកនាំអង្គការសហប្រជាជាតិពីរអាណត្តិជាប់គ្នាពីឆ្នាំ ១៩៩៧ រហូតដល់ឆ្នាំ ២០០៦។
ពេលដឹកនាំស្ថាប័នអន្តររដ្ឋាភិបាលនេះ លោកព្យាយាមប្រយុទ្ធដើម្បីសន្តិភាព និងដោះស្រាយបញ្ហាពិភពលោកជាច្រើនមានដូចជាអំពើភេរវកម្ម សង្គ្រាមស៊ីវិល និងអំពើប្រល័យពូជសាស្ត្រ។ ជាក់ស្តែងវាមានដូចជា ព្រឹត្តិការណ៍ក្រុមអាល់កៃដាវាយប្រហារអាមេរិកក្នុងឆ្នាំ ២០០១ , អាមេរិកឈ្លានពានអ៊ីរ៉ាក់ឆ្នាំ ២០០៣ រួមជាទាំងការកើនឡើងនៃចលនាក្រុមភេរវជននិងក្រុមប្រដាប់អាវុធឥស្លាមជ្រុលនិយមនៅលើពិភពលោក។
ចំណែកស្នាដៃធំបំផុតរបស់លោក ដែលគេចាំមិនភ្លេចនោះគឺ ការបង្កើតគោលការណ៍អន្តរគមន៍ក្នុងគោលដៅមនុស្សធម៌ (humanitarian intervention)។ គោលការណ៍នេះមានសារសំខាន់ក្នុងការធានាឲ្យមានការការពារប្រជាជនដែលរងគ្រោះថ្នាក់ដោយសារសង្គ្រាមឬការសម្លាប់រង្គាល ឬករណីប្រល័យពូជសាសន៍ជាដើម។
បន្ទាប់ពីចាកចេញពីតំណែងជាអគ្គលេខាធិការអង្គការសហប្រជាជាតិក្នុងឆ្នាំ ២០០៦ លោក អាណាន់ នៅតែបន្តការងាររបស់ខ្លួនដើម្បីបុព្វហេតុសន្តិភាព និងមនុស្សជាតិសាកលផង។ លោកបានបន្តដឹកនាំមូលនិធិកូហ្វីអាណាន់ និងធ្វើជាប្រធាននៃអង្គការក្រុមព្រឹទ្ធាចារ្យដែលត្រូវបានបង្កើតឡើងដោយអតីតប្រធានាធិបតីអាហ្វ្រិកខាងត្បូងលោក ណេលសិន ម៉ាន់ដេឡាផងដែរ។
© រក្សាសិទ្ធិដោយ thmeythmey.com