អតីតតំណាងរាស្រ្តរូបនេះ ត្រូវបានចាប់ខ្លួនកាលពីអំឡុងខែមេសា ឆ្នាំ២០១៦ ក្រោយពីលោក បានបញ្ចេញមតិលើបណ្តាញសង្គមហ្វេសបុកទាក់ទិននឹងបញ្ហាព្រំដែនកម្ពុជា-វៀតណាម។ តុលាការ បានកាត់ទោសលោក ឲ្យជាប់ពន្ធនាគាររយៈពេល២ឆ្នាំកន្លះ (៣០ខែ) ដោយចោទពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង។
លោក សំ សុគង់ មេធាវីរបស់លោក អ៊ុំ សំអាន បានប្រាប់សារព័ត៌មានថ្មីៗតាមទូរសព្ទថា បើគិតចាប់តាំងពីពេលចាប់ខ្លួននៅថ្ងៃដំបូង រហូតមកដល់ពេលនេះ លោកអ៊ុំ សំអាន បានជាប់ពន្ធនាគារជិត២៩ខែហើយ ដោយខ្វះជាង១ខែទៀតប៉ុណ្ណោះ នឹងគ្រប់តាមកាលកំណត់របស់តុលាការ។ ប៉ុន្តែ ខណៈពេលវេលានៅខ្វះតែជាង១ខែទៀតនឹងគ្រប់តាមកាលកំណត់នោះ លោក ក៏ត្រូវបាននាយករដ្ឋមន្ត្រី ថ្វាយសំណើទៅព្រះមហាក្សត្រ ដើម្បីសុំព្រះរាជទានលើកលែងទោស។
ក្នុងរយៈពេលប៉ុន្មានថ្ងៃនេះ មនុស្សមួយចំនួន ដែលគេដឹងថាមិនសូវត្រូវជាមួយរដ្ឋាភិបាល ត្រូវបានដោះលែងជាបន្តបន្ទាប់។ អ្នកទាំងនោះ រួមមានលោក គឹម សុខ អ្នកវិភាគនយោបាយ លោកស្រី ទេព វន្នី សកម្មជនបឹងកក់ លោក អ៊ួន ឈិន-លោក យាង សុជាមេត្តា អតីតអ្នកកាសែតនៃវិទ្យុអាស៊ីសេរី និងលោក សួន សេរីរដ្ឋា អតីតប្រធានគណបក្សអំណាចខ្មែរ។
អាចនឹងមានអ្នកផ្សេងទៀត ដែលត្រូវដោះលែងជាបន្ត។ ថ្មីៗនេះ សម្តេច ហ៊ុន សែន បានប្រកាសថា នឹងមានការលើកលែងទោសជាលក្ខណទ្រង់ទ្រាយធំតែម្តង ដោយក្នុងនោះ ក៏មានមនុស្សជាង១០នាក់ផងដែរ។
ទោះជាមិននិយាយឲ្យចំក្តី តែគេ សន្និដ្ឋានថា មនុស្សជាង១០នាក់នោះ ប្រហែលជាលោក មាជ សុវណ្ណារ៉ា អតីតមន្ត្រីជាន់ខ្ពស់របស់គណបក្សសង្គ្រោះជាតិ និងសកម្មជន១០នាក់ទៀត ហើយក៏អាចមានអតីតតំណាងរាស្ត្រនៃគណបក្សប្រឆាំងនេះផងដែរ។ ជាក់ស្តែង ក្រោយពីប្រមុខរដ្ឋាភិបាល ប្រកាសបែបនេះរួចហើយ លោក អ៊ុំ សំអាន ក៏ត្រូវបានលើកលែងទោសនៅថ្ងៃនេះ។
គេសង្ឃឹមថា អ្នកដទៃទៀត រួមទាំងលោក កឹម សុខា អតីតប្រធានគណបក្សសង្គ្រោះជាតិផងដែរ អាចនឹងត្រូវបានដោះលែង ហើយស្ថានការណ៍នយោបាយនៅកម្ពុជា នឹងកាន់តែមានភាពល្អប្រសើរ៕