ជាតិ
សណ្ឋាគារមួយក្នុងក្រុងសៀមរាប ផ្តល់ឱកាសការងារដល់បុគ្គលិកគរ ថ្លង់
× សៀមរាប៖ យុវជនគរថ្លង់ចំនួន៣នាក់នៅក្នុងអង្គការ គ្រួសារថ្មី មានឱកាសទទួលបានការងារ នៅក្នុងវិស័យសណ្ឋាគារ។ សណ្ឋាគារ ជីអែនហ្ស៊ី អឺបេន អូតែល (G&Z Urban Hotel) ជាសណ្ឋាគារមួយដែលបានផ្តល់ឱកាសការងារដល់អ្នកគរ ថ្លង់ ដែលនេះជាគោលការណ៍មួយរបស់សណ្ឋាគារ ក្នុងការរួមចំណែកជួយសង្គមជាតិ។
លោក ឈុន ដាវីត អ្នកគ្រប់គ្រងក្រុមហ៊ុន ជីអាយហ្ស៊ី ផ្នែកវិស័យសណ្ឋាគារ បានឱ្យដឹងថា មានហេតុផលមួយចំនួន ដែលសណ្ឋាគាររបស់លោក ទទួលបុគ្គលិកគរ ថ្លង់ ឱ្យមកធ្វើការ។ លោកថា ដោយសារបុគ្គលិកគរ ថ្លង់ ក៏ដូចជាមនុស្សធម្មតាដែរ តែពួកគេខ្វះកាយសម្បទាមួយចំនួនតែប៉ុណ្ណោះដូចជាមិនអាចនិយាយ ឬស្ដាប់ តែពួកគេអាចសរសេរបាន។ ការណ៍នេះហើយដែលធ្វើឱ្យខាងសណ្ឋាគាររបស់លោក មានគោលការណ៍មួយគឺមិនគួរបោះបង់អ្នកគរ ថ្លង់ឡើយ ព្រោះពួកគេក៏មានសមត្ថភាពពិសេសដូចមនុស្សធម្មតាដែរ សំខាន់ចេះផ្តល់ឱកាសដល់ពួកគេ ដែលនេះជាចំណែកមួយជួយអភិវឌ្ឍន៍ដល់សង្គមជាតិ។
តាមការបញ្ជាក់របស់លោក ដាវីត បច្ចុប្បន្នសណ្ឋាគាររបស់លោកទាំង៣សាខាក្នុងក្រុងសៀមរាប ដែលជាបទសម្ព័ន្ធរបស់ក្រុមហ៊ុន WE-GOAL Group សុទ្ធតែមានបុគ្គលិកគរ ថ្លង់ធ្វើការ ហើយពួកគេទទួលបានប្រាក់ខែ និងអត្ថប្រយោជន៍ផ្សេងៗដូចបុគ្គលិកផ្សេងៗទៀតដែរ។
ទាក់ទងនឹងវិស័យសណ្ឋាគារនេះដែរ កន្លងមកធ្លាប់មានការលើកឡើងថា ការវិនិយោគមានចំនួនច្រើនលើសពីបរិមាណភ្ញៀវដែលមកស្នាក់នៅ។ សម្រាប់លោក ដាវីត យល់ខុសពីការលើកឡើងនេះទៅវិញ។ លោកថា ខេត្តសៀមរាបនៅតែមានតម្រូវការសណ្ឋាគារ ហើយលោកគាំទ្រឱ្យមានការវិនិយោគបន្ថែមទៀតដើម្បីបំពេញតម្រូវការភ្ញៀវទេសចរដែលបន្តកើនឡើងជាបន្តបន្ទាប់។ គោលដៅរបស់ក្រុមហ៊ុន G&Z នឹងពង្រីកសណ្ឋាគារឱ្យបាន៧ ក្នុងឆ្នាំ២០១៨នេះ។
ក្នុងពិធីសម្ពោធខូវើកកាហ្វេ និងប៊ីស្ដ្រូ នៅល្ងាចថ្ងៃទី២០ សីហា លោកស្រី Melissa Seet អ្នកគ្រប់គ្រងទូទៅនៃក្រុមហ៊ុន G&Z បានលើកឡើងថា ក្រុមហ៊ុនរបស់លោកស្រីបានយកចិត្តទុកដាក់លើការងារស្នូលចំនួន៣ រួមមាន ការងារសហគមន៍ ប្រជាពលរដ្ឋ ដែលធ្វើឱ្យពួកគេមានការងារធ្វើ និងការងារបរិស្ថាន ដែលក្រុមហ៊ុននេះគិតគូរខ្ពស់ទាក់ទងនឹងការកាត់បន្ថយការប្រើប្រាស់ប្លាស្ទិក។ លោកស្រីបន្ថែមថា ជាមួយគ្នានេះខាងក្រុមហ៊ុនបានវិនិយោគពេលវេលាក្នុងការបង្រៀន ដើម្បីពង្រឹងជំនាញបន្ថែមដល់បុគ្គលិកដែលសណ្ឋាគារបានចាប់ដៃគូជាមួយអង្គការគ្រួសារថ្មី ដើម្បីផ្តល់ឱកាសដល់បុគ្គលិកគរ ថ្លង់៕
© រក្សាសិទ្ធិដោយ thmeythmey.com