ចិនម្នាក់ ដែលលួចផលិតគ្រឿងសំអាងក្លែងក្លាយដល់ទៅ៥តោន ត្រូវបានចាប់ខ្លួន

ជាតិ

សង្គមជាតិ

ចិនម្នាក់ ដែលលួចផលិតគ្រឿងសំអាងក្លែងក្លាយដល់ទៅ៥តោន ត្រូវបានចាប់ខ្លួន

26, Aug 2018 , 11:59 am

រូបភាព

ដោយ: ថ្មីៗ

ភ្នំពេញ៖ បុរសជនជាតិចិនម្នាក់ឈ្មោះ Zou ZhiQang ត្រូវបានកម្លាំងសមត្ថកិច្ចពីក្រសួងមហាផ្ទៃ ចុះទៅចាប់ បន្ទាប់ពីដឹងថា រូបគេ បើកទីតាំងផលិតនិងកែច្នៃគ្រឿងសំអាងក្លែងក្លាយ នៅភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ រាជធានីភ្នំពេញ។ នេះបើតាមការចុះផ្សាយក្នុងគេហទំព័រនៃអគ្គស្នងការនគរបាល កាលពីថ្ងៃទី២៥ ខែសីហា ឆ្នាំ២០១៨។

បើតាមអគ្គស្នងការនគរបាលជាតិ គ្រឿងសំអាងក្លែងក្លាយ ដែលបុរសជាជនជាតិនោះ លួចផលិត សម្រាប់លក់ ដោយគ្មានច្បាប់អនុញ្ញាត មានរហូតដល់ទៅ៥តោនឯណោះ។
អគ្គស្នងការនគរបាលជាតិ បញ្ជាក់ថា គ្រឿងសំអាងក្លែងក្លាយទាំងនោះ រួមមាន សាប៊ូ ឡេ ទឹកអប់ ក្រេម ម្សៅលាបមុខ និងវត្ថុធាតុដើមសម្រាប់កែច្នៃមួយចំនួនទៀត។

អគ្គស្នងការនគរបាលជាតិ បានស្រង់ប្រសាសន៍របស់ឧត្តមសេនីយ៍ឯក ចាន់ វ៉ានធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃ ទៅចុះផ្សាយថា សមត្ថកិច្ច បានដកហូតផលិតផលនិងគ្រឿងសំអាងក្លែងក្លាយទាំងនោះ និងបិទទីតាំងខាងលើ ហើយនាំខ្លួនជនជាតិចិនជាម្ចាស់ ទៅចាត់ការតាមនីតិវិធី៕