លីគ៖ បឹងកេតបន្តឈរលេខ២ ក្រោយយកឈ្នះព្រះខ័នរាជស្វាយរៀង ១-០

កីឡាជាតិ

ជាតិ

លីគ៖ បឹងកេតបន្តឈរលេខ២ ក្រោយយកឈ្នះព្រះខ័នរាជស្វាយរៀង ១-០

26, Aug 2018 , 8:04 pm

រូបភាព

ដោយ:

បឹងកេតបានបន្តឈរលេខរៀងទី២ក្នុងតារាងនៃពានរង្វាន់ក្របខណ្ឌមិត្តហ្វូនខេមបូឌានលីគប្រចាំសប្តាហ៍ទី១៩ ក្រោយយកឈ្នះព្រះខ័នរាជស្វាយរៀង ១-០ នៅតង់ទី២នាការប្រកួតនៅកីឡដ្ឋានខេត្តស្វាយរៀងនៅថ្ងៃទី២៦ ខែសីហានេះ។ ចំណែកក្រុមអង្គរថាយហ្គឺរបញ្ចប់ដោយគ្មានការស៊ុតបញ្ចូលទីជាមួយអាស៊ីអឺរ៉ុប ខណៈអគ្គិសនីកម្ពុជាយកឈ្នះវេស្ទើនភ្នំពេញ ៣-១។

ក្រោយបញ្ចប់ដោយគ្មានការស៊ុតបញ្ចូលទីក្នុងតង់ទី១ ខ្សែប្រយុទ្ធនីហ្សេរីយ៉ា Julius Oiboh បានសម្រេចគ្រាប់បាល់នាំមុខ ១-០ សម្រាប់ភ្ញៀវបឹងកេតនៅនាទីទី៧៩។ ទោះបីមានការវាយបកទៅវិញទៅមកយ៉ាងណាក៏ដោយ តែក្រុមពីរទាំងពីរបានរក្សាលទ្ធផលនេះរហូតចប់ការប្រកួត។ មួយគ្រាប់របស់ខ្សែប្រយុទ្ធនីហ្សេរីយ៉ាខាងលើ ជួយឲ្យបឹងកេតបន្តឈរលេខរៀងទី២ មាន៤៥ពិន្ទុក្នុងដៃ។

សម្រាប់ការប្រកួតនៅកីឡដ្ឋានខេត្តសៀមរាប ក្រុមអង្គរថាយហ្គឺរបានបញ្ចប់ដោយគ្មានការស៊ុតបញ្ចូលទីជាមួយក្រុមអាស៊ីអឺរ៉ុប ខណៈកាលពីជើងទី១ក្រុមទាំងពីរក៏បញ្ចប់ក្នុងលទ្ធផលស្មើ ២-២ ផងដែរ។ តាមរយៈលទ្ធផលនេះ ធ្វើឲ្យក្រុមទាំងពីរបន្តរក្សាទីតាំងនៅដដែលក្នុងតារាងចំណាត់ថ្នាក់ ដោយអង្គរថាយហ្គឺរឈរលេខ៨ និងអាស៊ីអឺរ៉ុបលេខ៩ មាន២៣ពិន្ទុក្នុងដៃស្មើគ្នា។

នៅកីឡដ្ឋានអគ្គិសនីកម្ពុជាឯណេះវិញ ក្រុមម្ចាស់ផ្ទះបានយកឈ្នះភ្ញៀវវេស្ទើនភ្នំពេញក្នុងលទ្ធផល ៣-១។ នេះជាជ័យជម្នះលើកទី២សម្រាប់អគ្គិសនីកម្ពុជា ខណៈលើកទី១ក្រុមនេះយកឈ្នះវេស្ទើនភ្នំពេញដូចគ្នាក្នុងលទ្ធផល ២-០។ គ្រាប់បាល់ជ័យជម្នះរបស់អគ្គិសនីកម្ពុជារកបានដោយកីឡាករ ផាន់នី អ៊ីរដ្ឋា មួយគ្រាប់ និងពីរគ្រាប់ដោយកីឡាករ ម៉ាត់ នូរុណ ខណៈកីឡាករ Yuspen Uopdana សម្រេចគ្រាប់បាល់សម្រាប់វេស្ទើន៕