កីឡាជាតិ
ជាតិ
ប្រវត្តិខ្លះៗនៃកីឡាជឺជិតស៊ូ (jiu-jitsu) ឬ Brazilian jiu-jitsu រូបថត AFP
× ជឺជិតស៊ូ (jiu-jitsu) ជាប្រភេទសិល្បៈក្បាច់គុន កីឡាប្រយុទ្ធ និងជាប្រភេទកីឡាការពារខ្លួន របស់ប្រេស៊ីល ដែលមានបច្ចេកទេសបែកចេញពីកីឡាយូដូ (Kodokan Judo)។ បើតាមការស្រាវជ្រាវមួយចំនួន កីឡានេះ វិវត្តបន្ថែមពីកីឡា jujutsu ជប៉ុន ហើយត្រូវបាននាំទៅកាន់ប្រេស៊ីល កាលពីអំឡុងឆ្នាំ១៩២០ ដោយលោក Mitsuyo Maeda និងបន្តរីកចម្រើនយ៉ាងខ្លាំងនៅទីនោះ ដោយសារតែគ្រួសារដ៏ល្បីល្បាញមួយឈ្មោះ Gracie។
កីឡាជឺជិតស៊ូ ជួយឲ្យមនុស្សអាចការពារខ្លួនប្រឆាំងនឹងគូប្រជែងដែលខ្លាំង មាឌធំ និងរឹងមាំជាងខ្លួន តាមរយៈការប្រើប្រាស់បច្ចេកទេសដ៏ត្រឹមត្រូវ ដូចជាការរុញកៀបឲ្យដួលលើដី ឃ្នាបក ស្នៀតឃ្លេ និងការពង្រឹងសាច់ដុំជាដើម។
កើតនៅជប៉ុននាឆ្នាំ១៨៧៩ លោក Mitsuyo Maeda ជាអ្នកដែលស្រឡាញ់ក្បាច់គុន និងកីឡាផ្សេងៗ ដោយលោកចាប់ផ្តើមហាត់ស៊ូម៉ូ បន្ទាប់មកយូដូ។ នៅឆ្នាំ១៩២០ លោកបានទៅកាន់ប្រទេសប្រេស៊ីល ហើយនៅទីនោះ លោកបានស្គាល់គ្រួសារលោក Gastao Gracie ដើមកំណើតស្កុតឡែន ដែលបានជួយយកអាសារលោក។
ជាការតបស្នងគុណ លោក Mitsuyo បានបង្រៀនក្បាច់ប្រយុទ្ធជាច្រើនដល់ក្រុមគ្រួសារ Gracie ជាពិសេសលោក Carlos Gracie កូនប្រុសរបស់លោក Gastao ។ លោក Carlos បានបង្រៀនបន្តដល់បងប្អូនផ្សេងៗរបស់ខ្លួន។ ក្រោយមកទៀត លោក Helio Gracie ដែលជាប្អូនប្រុសម្នាក់របស់លោក Carlos បានអនុវត្តក្បាច់គុននេះ ប៉ុន្តែកែប្រែទៅតាមទម្រង់របស់ប្រេស៊ីល។
ក្បាច់គុនមួយនេះ កាន់តែសាយភាពយ៉ាងខ្លាំងនៅអាមេរិកឡាទីន ដោយក្រៅពីលោក Mitsuyo គ្រូជំនាញជាច្រើនទៀតដូចជាលោក Takeo Yano និងលោក Soshihiro Satake សុទ្ធតែបានបំផុសបំផុលកីឡាប្រភេទនេះ។ ក្នុងគ្រួសារត្រកូល Gracie លោក Carlos និងលោក Helio បានខិតខំបន្តបណ្តុះបណ្តាលបន្ថែមដល់សមាជិកគ្រួសាររបស់ខ្លួន ហើយសិស្សម្នាក់ទៀតរបស់លោក Mitsuyo ឈ្មោះ Luiz França ក៏បានចូលរួមយ៉ាងផុសផុលផងដែរ។
© រក្សាសិទ្ធិដោយ thmeythmey.com