ជាតិ
បាក់ឌុប
មន្ត្រីកំណែវិញ្ញាសាប្រឡង មិនអាចយកទូរសព្ទ និងសម្ភារអេឡិចត្រូនិក ចូលបន្ទប់កំណែឡើយ
×![]()
ភ្នំពេញ៖ ដើម្បីឲ្យលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ឆ្នាំ២០១៨ ប្រព្រឹត្តទៅតាមគោលការណ៍ច្បាប់ យុត្តិធម៌ និងតម្លាភាព ក្រសួងអប់រំ បានតម្រូវឲ្យសមាជិកកំណែវិញ្ញាសាប្រឡងបាក់ឌុបទាំងអស់ ត្រូវរក្សាទុកកាបូប និងសម្ភារផ្សេងៗ នៅក្រៅបន្ទប់កំណែមុខវិជ្ជាទាំង១០កន្លែងក្នុងរាជធានីភ្នំពេញ។
ដំណើរការនៃកំណែវិញ្ញាសាបេក្ខជនប្រឡងបាក់ឌុប បានប្រព្រឹត្តឡើងដូចសព្វដង នៅព្រឹកថ្ងៃចន្ទ ទី២៧ ខែសីហានេះ។ សមាជិកកំណែវិញ្ញាសានីមួយៗនៅតាមមណ្ឌលកំណែទាំង១០ បានបន្តធ្វើកំណែលើសន្លឹកកិច្ចការបេក្ខជនប្រឡងបាក់ឌុប ដោយការយកចិត្តទុកដាក់បំផុត ក្រោមស្មារតីទទួលខុសត្រូវខ្ពស់ ដោយមិនបានភ្ជាប់មកជាមួយនូវទូរសព្ទដៃ និងឧបករណ៍អេឡិចត្រូនិកផ្សេងៗចូលបន្ទប់កំណែឡើយ។
តាមរយៈខ្លឹមសារ និងរូបភាពបានពីហ្វេសប៊ុកផ្លូវការរបស់ក្រសួងអប់រំ យុវជន និងកីឡា សមាជិកនៃគណៈកម្មការក្រុមមុខវិជ្ជា គណៈកម្មការប្រចាំការមណ្ឌលកំណែ គណៈកម្មការបែងចែកសន្លឹកកិច្ចការ និងក្រុមមុខវិជ្ជានីមួយៗ ដែលបានយកសម្ភារជាប់ខ្លួន ត្រូវបានរក្សាទុកដាច់ដោយឡែក ។ ការធ្វើបែបនេះ ដើម្បីជៀសវាងការបង្ហោះសំណៅកិច្ចការបេក្ខជន ឬអត្រាកំណែតាមបណ្ដាញសង្គម ដែលនាំឲ្យប៉ះពាល់ដល់ការកំណែលទ្ធផលប្រឡង។
ជាមួយគ្នានេះ ក្រសួងអប់រំ បានចេញសេចក្តីប្រកាសព័ត៌មាន នៅថ្ងៃទី២៧សីហា ព្រមានចំពោះជនណាដែលបង្ហោះវិញ្ញាសា និងអត្រាកំណែនៃប្រឡងបាក់ឌុបឆ្នាំ២០១៨ នឹងទទួលខុសត្រូវនូវទង្វើរបស់ខ្លួនតាមផ្លូវច្បាប់យ៉ាងតឹងរឹងបំផុត៕
Tag:
អប់រំ
បាក់ឌុប
ប្រឡង
ភ្នំពេញ
© រក្សាសិទ្ធិដោយ thmeythmey.com
