ជាតិ
File Photo: មហោស្រពអក្សរសិល្ប៍ខ្មែរលើកទី១ បានរៀបចំឡើងនៅខេត្តសៀមរាប។ (រូបផ្តល់ឲ្យ)
×![]()
ដោយ: VOA
ភ្នំពេញ ៖ កម្មវិធីមហោស្រពអក្សរសិល្ប៍ខ្មែរឆ្នាំទី២ នឹងវិលត្រឡប់មកវិញក្នុងខែកញ្ញាខាងមុខ ជាមួយនឹងការរៀបចំនៅតាមទីតាំងល្បីល្បាញនានាក្នុងទីរួមខេត្តបាត់ដំបង ក្រោយទទួលបានជោគជ័យកាលពីឆ្នាំទៅមិញ ដែលប្រារព្ធឡើងនៅខេត្តសៀមរាប។
កម្មវិធីឆ្នាំនេះនឹងធ្វើឡើងចាប់ពីថ្ងៃទី ២១ ដល់ថ្ងៃទី២៣ ខែកញ្ញា ហើយរួមមានសកម្មភាពជាច្រើនដែលនឹងមានការចូលរួមពីសំណាក់ កវី អ្នកនិពន្ធ និងមិត្តអ្នកនិយមតាមដានអក្សរសិល្ប៍ខ្មែរ ដើម្បីពិភាក្សា និងលើកកម្ពស់ការនិពន្ធអត្ថបទអក្សរសិល្ប៍ខ្មែរ និងកំណាព្យ។ នេះបើយោងតាមសំដីរបស់អ្នករៀបចំកម្មវិធី។
អ្នកនិពន្ធ សូ ភីណា ដែលជាសមាជិកស្ថាបនិកនៃកម្មវិធីមហោស្រពអក្សរសាស្ត្រខ្មែរបាននិយាយថា សកម្មភាពទាំងអស់នឹងត្រូវធ្វើឡើងក្នុងរូបភាពចំរុះ ទាំងសកម្មភាពពិភាក្សាគ្នាក្នុងសាលប្រជុំ និងសកម្មភាពរស់រវើកនៅទីវាល តាមទីស្ថានល្បីនានាក្នុងទីរួមខេត្តបាត់ដំបងតែម្ដង។
នៅក្នុងបន្ទប់សហសិក្សាដែលមានអមសងខាងដោយទូសៀវភៅរាប់រយក្បាល ដែលនិយាយអំពីសិល្បៈ និងអក្សរសិល្ប៍ ក្នុងការិយាល័យរបស់ខ្លួនក្នុងសង្កាត់ទន្លេបាសាក់ រាជធានីភ្នំពេញ អ្នកស្រី សូ ភីណា បានប្រាប់ VOAយ៉ាងដូច្នេះថា៖
«ព្រោះយើងដឹងហើយថាខេត្តបាត់ដំបងវាមានភាពសំបូរបែប ខាងផ្នែកប្រវត្តិសាស្ត្រ ខាងផ្នែកវប្បធម៌ ហើយនិងធនធានមនុស្ស។ ចឹងយើងគិតថាវាជា សក្តានុពលមួយដែលធំ ដែលយើងធ្វើនៅខេត្តដែលមានសក្តានុពលស្រាប់ហើយ វាធ្វើអោយមហោស្រពយើងកាន់តែមានប្រសិទ្ធភាព»។
អ្នកនិពន្ធខ្មែរអ្នកស្រី សូ ភីណា ដែលដឹកនាំការនិពន្ធសៀវភៅ «ប៊ុនធឿន ២០១៧ និងរឿងខ្លីដទៃទៀត» ដែលសម្ភោធក្នុងកម្មវិធី ពិព័រណ៍សៀវភៅកម្ពុជាលើកទី៦, នៅរាជធានីភ្នំពេញ, នៅថ្ងៃទី ០៨ ខែធ្នូ ឆ្នាំ២០១៨។ (ខាន់ សុគុំមនោ/ VOA)
អ្នកនិពន្ធខ្មែរអ្នកស្រី សូ ភីណា ដែលដឹកនាំការនិពន្ធសៀវភៅ «ប៊ុនធឿន ២០១៧ និងរឿងខ្លីដទៃទៀត» ដែលសម្ភោធក្នុងកម្មវិធី ពិព័រណ៍សៀវភៅកម្ពុជាលើកទី៦, នៅរាជធានីភ្នំពេញ, នៅថ្ងៃទី ០៨ ខែធ្នូ ឆ្នាំ២០១៨។ (ខាន់ សុគុំមនោ/ VOA)
អ្នកស្រី សូ ភីណា ក៏បានបន្ថែមថា កម្មវិធីនៅបាត់ដំបងនេះនឹងមានបូករួមបញ្ចូលការប្រកួត កង់ឌុប និងកំណាព្យ ជុំវិញប្រធានបទនានាដែលទាក់ទងនឹងខេត្តបាត់ដំបង ឬអំពីបទពិសោធសញ្ចេតនាកម្រិតបុគ្គលរបស់បេក្ខជនផ្ទាល់ដែលជាប់ជំពាក់វាក់វិននឹងខេត្តមួយនេះ។
«ដោយសារយើងចង់ឲ្យវាមានការកំសាន្តដែល មិនមែនគ្រាន់តែទៅគឺ ដើម្បីតែអក្សរសិល្ប៍ៗពេកទេ អ៊ីចឹង យើងចង់ឲ្យវាផ្សំគ្នាជាមួយកម្មវិធីសប្បាយ ហ្នឹងទៅ យើងមានអ្នកចូលរួម ហើយយើងលើកកម្ពស់គុណតម្លៃនៃកំណាព្យទៀត»។
អ្នកនិពន្ធរូបនេះ បានបន្តយ៉ាងដូច្នេះទៀតថា៖
«ហើយកម្មវិធីមួយទៀតគឺ ទាក់ទងទៅនឹងឆ្នាំមុនយើងអត់មានការប្រកួតប្រលងប្រជែងស្នាដៃអក្សរសិល្ប៍ទេ តែឆ្នាំនេះយើងមាន អ៊ីចឹងយើងមានប្រភេទរឿងខ្លី និងកំណាព្យ។ ហើយមួយទៀត បងគិតថាអ្វីដែលពិសេសនោះគឺ យើងបញ្ចូលកម្មវិធីសិល្បៈច្រើនជាងមុន ឆ្នាំនេះយើងមាន កង់នេះផង សិល្បៈចំរុះ មានរបាំ មានតន្ត្រី មានល្ខោននិយាយ មានគែន និងខ្សែដៀវទៀត»។
កម្មវិធីឆ្នាំមុនដែលជាឆ្នាំដំបូង នៃមហោស្រពអក្សរសិល្ប៍ខ្មែរលើកទីមួយ តាំងទីរៀបចំឡើងនៅក្នុង មជ្ឈមណ្ឌលខេមរសិក្សា(CKS)ដែលស្ថិតនៅក្នុងបរិវេណវត្តដំណាក់នៃខេត្តសៀមរាប និងដែលបានទទួលការចូលរួមពីសំណាក់ អ្នកនិពន្ធ និងអ្នកអានប្រមាណ ៥០០នាក់។
General photo of Khmer Literature Festival in 2017 at Siem Reap Province, Cambodia. (Courtesy image)
ទីតាំងដែលត្រូវទទួលរៀបចំកម្មវិធីនានារបស់មហោស្រពអក្សរសិល្ប៍ខ្មែរឆ្នាំនេះ រួមមាន អង្គការហ្វារពន្លឺសិល្បៈ ដើមដូងទី១០ មុខវត្តពោធិ៍វាល វត្តកណ្ដាល វត្តដំរីស សាលាខេត្តចាស់ និងស្ពានថ្មចាស់ជាដើម។
អ្នកស្រី សូ ភីណា បានប្រាប់ថា៖
«ទីតាំងដែលយើងរើសច្រើនកន្លែងហ្នឹង ពីព្រោះដោយសារតែយើងចង់ឲ្យ អ្នកចូលរួមរបស់យើងស្គាល់អំពី ហេដ្ឋារចនាសម្ព័ន្ធវប្បធម៌ ដែលមានស្រាប់នៅខេត្តបាត់ដំបង។ ហើយយើងអាចទាក់ទាញការចាប់អារម្មណ៍ឡើងវិញអំពីគុណតម្លៃនៃកន្លែងៗទាំងអស់ហ្នឹង ព្រោះដោយសារកន្លែងមួយៗវាមានប្រវត្តិរបស់វា វាមានឈ្មោះ អត្ថន័យអ៊ីចឹង»។
ដោយឡែក កញ្ញា ថុន ថាវរី ដែលជាអ្នកនិពន្ធសៀវភៅ«នារីប្រពៃ»បាននិយាយថា ក្នុងកម្មវិធីមហោស្រពអក្សរសិល្ប៍ខ្មែរលើកទី២នេះ ខ្លួនរំពឹងថានឹងទទួលបានអ្វីដែលថ្មីច្រើន លើសពីកម្មវិធីឆ្នាំមុននៅខេត្តសៀមរាបទៅទៀត។
«និយាយរួមទៅខ្ញុំមានអារម្មណ៍សប្បាយរីករាយ ដោយសារបានជួបជុំអ្នកនិពន្ធចាស់ៗ និងអ្នកនិពន្ធផ្សេងៗជាច្រើនមកផ្តុំគ្នា»។
កញ្ញា ថាវរី បាននិយាយបន្ថែមប្រាប់VOAយ៉ាងដូច្នេះថា៖
«ដោយសារខ្ញុំជាអ្នកនិពន្ធដែរ ហើយខ្ញុំចង់ចូលរួមចំណែកក្នុងការលើកស្ទួយអក្សរសិល្ប៍ខ្មែរនៅក្នុងប្រទេសកម្ពុជា អ៊ីចឹងអាចលើកកម្ពស់ឡើងបាន ក្នុងនាមជាអ្នកនិពន្ធ ទាល់តែយើងទៅចូលរួម ទៅជួយផ្សព្វផ្សាយ ទៅចែករំលែកពីបទពិសោធ ក្នុងនាមជាអ្នកនិពន្ធ ហើយទៅរៀនពីរៀមច្បងផ្សេងៗ ក្នុងកំឡុង២ទៅ៣ថ្ងៃហ្នឹងដែរ»។
General photo of Khmer Literature Festival in 2017 at Siem Reap Province, Cambodia. (Courtesy image)
កញ្ញា សែត ហត្ថា ដែលជាម្ចាស់និពន្ធសៀវភៅ«វិញ្ញាសាជីវិត»បានសម្ដែងមតិលើកឡើងដូចជាការលើកឡើងរបស់អ្នកនិពន្ធ ថុន ថាវរី ដែរ ដោយគាត់យល់ឃើញថា ការចូលរួមមហោស្រពអក្សរសិល្ប៍ខ្មែរកាលពីឆ្នាំមុនគឺល្អខ្លាំងមែនទែន។
កញ្ញា ហត្ថា ដែលគេស្គាល់តាមរយៈនាមលើស្លាបប៉ាកាថាជា«កូនចាបមាស»នោះ បានប្រាប់ VOAថា៖
«ពីព្រោះពេលដែលខ្ញុំចាប់ផ្តើមសរសេរសៀវភៅហ្នឹងភ្លាម ក៏គេបង្កើតកម្មវិធីហ្នឹង ក្រោមប្រធានបទថា ការបង្ហាញនូវស្នាដៃថ្មី ដែលរៀបនឹងចេញផ្សាយ ហើយវាគឺជាផលល្អមួយដែរ ដោយសារតែពេលចូលរួមក្នុងកម្មវិធីហ្នឹងទៅ យើងបាននិយាយអំពីស្នាដៃរបស់យើងរៀបចំនឹងចេញផ្សាយ ហ្នឹងហើយចឹងក៏ធ្វើឱ្យមានអ្នកកាន់តែស្គាល់ច្រើន ជាពិសេសគឺអ្នកនិពន្ធដែលខ្ញុំអត់ធ្លាប់បានស្គាល់ពីមុន ឬក៏អ្នកខ្លះគឺយើងស្គាល់ឈ្មោះតែអត់ដែលបានជួប ក៏បានទៅជួបគ្នានៅទីនោះ»។
សម្រាប់កម្មវិធីឆ្នាំទី២ នៃមហោស្រពអក្សរសិល្ប៍ខ្មែរនេះ ដែលរៀបចំឡើងនៅខេត្តបាត់ដំបង អ្នករៀបចំរំពឹងថាមានអ្នកចូលរួមប្រមាណ ១ពាន់នាក់ ពោលគឺកើនឡើងមួយគុណនឹងពីរ បើធៀបនឹងកម្មវិធីឆ្នាំមុននៅខេត្តសៀមរាប៕
© រក្សាសិទ្ធិដោយ thmeythmey.com
