កីឡាជាតិ
ជាតិ
Asian Games៖ អត្តពលិកសូហ្វតិន្នីសកម្ពុជាអស់ឱកាសឡើងទៅវគ្គ១/៤
×
ក្រុមអត្តពលិកកីឡាសូហ្វតិន្នីសកម្ពុជា បានរងការខកចិត្តសម្រាប់ការប្រកួតបើកឆាកក្នុងព្រឹត្តិការណ៍ Asian Games លើកទី១៨ នៅប្រទេសឥណ្ឌូណេស៊ី ក្រោយអស់ឱកាសឡើងវគ្គបន្តលើវិញ្ញាសាវាយឯកត្តជន។ ប៉ុន្តែក្រុមអត្តពលិកទាំងនេះ មិនទាន់ចប់បេសកកម្មរបស់ខ្លួនក្នុងព្រឹត្តិការណ៍នេះនៅឡើយទេ។
សូហ្វតិន្នីស ដែលជាកីឡាសក្តានុពលរបស់កម្ពុជា មិនទាន់បង្ហាញសញ្ញាល្អណាមួយ ក្នុងការស្វែងរកមេដាយពីព្រឹត្តិការណ៍ Asian Games លើកទី១៨ នៅឥណ្ឌូណេស៊ីនៅឡើយ។ សម្រាប់ការប្រកួតបើកឆាកលើវិញ្ញាសាវាយឯកត្តជន នៅថ្ងៃទី១៨ ខែសីហានេះ ទាំងកីឡាការិនី ម៉េត ម៉ារីយ៉ាន, រិន សុធារី, កីឡាករ កាន់ សោភ័ណ្ឌ និង ឌឹម សំសុជាភារុណ សុទ្ធតែអស់ឱកាសឡើងទៅវគ្គបន្ត។
ក្នុងចំណោមពួកគេទាំងនេះ មានតែកីឡាការិនី ម៉េត ម៉ារីយ៉ាន ម្នាក់ប៉ុណ្ណោះ ដែលបានផ្តល់ក្តីសង្ឃឹមដល់ប្រជាពលរដ្ឋកម្ពុជា តាមរយៈជ័យជម្នះ ៤-៣ លើកីឡាការិនីឥណ្ឌា Namita Seth ក្នុងជំនួបបើកឆាកពូល H។ ប៉ុន្តែកីឡាការិនីវ័យ១៤ឆ្នាំរូបនេះ បានប្រកួតចាញ់កីឡាការិនីឥណ្ឌូណេស៊ី Pitri Dwi Rahayu វ័យ២៥ឆ្នាំ ក្នុងលទ្ធផល ៤-០ ដែលនាំឲ្យនាងធ្លាក់ពីការប្រកួត។
ជាមួយគ្នានេះ កីឡាការិនី រិន សុធារី ដែលស្ថិតនៅក្នុងពូល D បានចាញ់កីឡាការិនីកូរ៉េខាងត្បូង Kim Jiyeon ៤-០ ហើយបន្តចាញ់កីឡាការិនីម្ចាស់ផ្ទះ Kusrini Dede Tari ក្នុងលទ្ធផល៤-១។ ចំណែកកីឡាករ កាន់ សោភ័ណ្ឌ ដែលស្ថិតនៅពូល E បានចាញ់កីឡាករថៃ Uayporn Sorrachet ៤-១ និងចាញ់កីឡាករឥណ្ឌា Meena Jay ៤-៣។
ដោយឡែក កីឡាករ ឌឹម សំសុជាភារុណ ចាញ់កីឡាករឥណ្ឌូណេស៊ី Sie Alexander Elbert ៤-០ តែឈ្នះកីឡាករវៀតណាម Le Phuoc Vinh ៤-២ និងឈ្នះកីឡាករឡាវ Vannasak Samxay ៤-១។ ប៉ុន្តែលទ្ធផលនេះ មិនអាចជួយឲ្យរូបគេឡើងទៅវគ្គបន្តបានឡើយ ដោយចាញ់ពិន្ទុកីឡាករម្ចាស់ផ្ទះ Sie Alexander Elbert ដែលឈ្នះទាំង៣ប្រកួត៕
Tag:
ម៉េត ម៉ារីយ៉ាន
Asian Games
សូហ្វតិន្នីស
ឥណ្ឌូណេស៊ី
© រក្សាសិទ្ធិដោយ thmeythmey.com