ពីនេះ ពីនោះ
កុមាររស់នៅក្នុងបឹងទន្លេសាប ចេះអុំទូក និងចេះហែលទឹកយ៉ាងស្ទាត់ជំនាញ កុមារីកំពុងអុំទូកម្នាក់ឯងសំដៅទៅផ្ទះ ក្នុងភូមិបណ្តែតទឹកមួយក្នុងបឹងទន្លេសាប។ រូបភាព៖ ឈុត ឈាណា
× ក្មេងស្រីតូចនេះ កំពុងអុំទូកម្នាក់ឯងសំដៅទៅផ្ទះនៅក្នុងភូមិបណ្តែតទឹក។ នៅក្នុងបឹងទន្លេសាប ទូកគឺជាមធ្យោបាយធ្វើដំណើរដ៏ចាំបាច់មិនអាចខ្វះបានមួយ។ កុមារតូចៗ ភាគច្រើន ពួកគេអាចមានសមត្ថភាពអុំទូកដើម្បីធ្វើដំណើរទៅសាលារៀន ឬទៅគោលដៅណាមួយជាក់លាក់ ដោយខ្លួនឯងបាន។ ក្រៅពីចេះអុំទូក កុមារទាំងនោះ ក៏ចេះហែលទឹកយ៉ាងស្ទាត់ជំនាញផងដែរ។ ម្តងម្កាល ក្រោយពីពេលទំនេរពីការសិក្សា ពួកគេអាចជួយឪពុកម្តាយចេញទៅនេសាទផងដែរ។ ពួកគេអាចជួយការងារស្រាលៗ ដូចជាទប់ចង្កួតទូក ពេលឪពុកម្តាយរបស់គេសារមង ឬជួយរើសត្រី ដោះត្រីចេញពីមងផងដែរ។
កុមារាម្នាក់ និងប្អូនស្រីរបស់គេ កំពុងអុំទូកនៅក្នុងភូមិបណ្តែតទឹកមួយក្នុងបឹងទន្លេសាប។ រូបភាព៖ ឈុត ឈាណា
មិនតែប៉ុណ្ណោះ ពួកគេមានសមត្ថភាពស្គាល់ប្រភេទត្រីមួយចំនួនផងដែរ។ មានកុមារមួយចំនួន មិនទទួលបានការអប់រំនៅសាលាទេ ដោយសារឪពុកម្តាយរបស់ពួកគេ ជាអ្នកនេសាទចំណាកស្រុក។ ដោយសារតែចំនួនត្រីមានការធ្លាក់ចុះ បង្កឲ្យមានបញ្ហាសន្តិសុខស្បៀង កុមារមួយចំនួន បានបោះបង់ការសិក្សាចោល ហើយចេញទៅនេសាទជាមួយឪពុកម្តាយរបស់ពួកគេ។
ក្នុងរយៈពេលប៉ុន្មានឆ្នាំចុងក្រោយនេះ ការប្រែប្រួលអាកាសធាតុ ការទន្ទ្រានកាប់ឆ្ការ ដុតបំផ្លាញព្រៃលិចទឹក ដើម្បីយកធ្វើជាដីកសិកម្ម ការនេសាទហួសកម្រិត ការប្រើប្រាស់ឧបករណ៍ខុសច្បាប់គ្រប់ប្រភេទនៅក្នុងបឹងទន្លេសាប ពិសេសក្នុងរដូវត្រីពង-កូន និងធំធាត់ បានធ្វើឲ្យមច្ឆជាតិគ្រប់ប្រភេទ មាននិន្នាការធ្លាក់យ៉ាងខ្លាំង និងមានប្រភេទខ្លះ ឈានទៅផុតពូជតែម្តង។
© រក្សាសិទ្ធិដោយ thmeythmey.com