ក្រុងបាត់ដំបង សម្ពោធផ្សាររាត្រីថ្មីជាផ្លូវការ

ជាតិ

សេដ្ឋកិច្ច

ក្រុងបាត់ដំបង សម្ពោធផ្សាររាត្រីថ្មីជាផ្លូវការ

30, Aug 2018 , 8:59 pm

រូបភាព

ដោយ:

បាត់ដំបង៖ ផ្សាររាត្រីថ្មី ដែលជាជំនួយឥតសំណងរបស់រដ្ឋាភិបាលជប៉ុន ត្រូវបានសម្ពោធឲ្យប្រើប្រាស់ជាផ្លូវការ នៅថ្ងៃទី៣០ខែសីហា។

ផ្សាររាត្រីនេះ ស្ថិតក្នុងសង្កាត់ស្វាយប៉ោ និងនៅចំកណ្ដាលក្រុងបាត់ដំបង ចន្លោះរវាងសាលាខេត្ត និងដងស្ទឹងសង្កែ។ ផ្សារនេះត្រូវបានសាងសង់ចាប់ពីខែសីហាឆ្នាំ២០១៧ និងរួចរាល់នៅខែមេសាឆ្នាំ២០១៨ នៅលើផ្ទៃដី ៣០៦៤ម៉ែត្រក្រឡា ដោយចំណាយថវិកាចំនួនជាង ៣០ម៉ឺនដុល្លារអាមេរិក ក្រោមហិរញ្ញប្បទានឥតសំណងពីរដ្ឋាភិបាលជប៉ុន។

ការកសាងផ្សាររាត្រីក្រុងបាត់ដំបងនេះ គឺស្ថិតក្នុងគម្រោងអភិវឌ្ឍន៍ក្រុងរបៀងសម្រាប់លើកស្ទួយជីវភាពរបស់ពលរដ្ឋ ដែលត្រូវបានផ្ដល់ហិរញ្ញប្បទានដោយមូលនិធិជប៉ុនដើម្បីកាត់បន្ថយភាពក្រីក្រ។

គម្រោងនេះមានបំណងសាកល្បងការអភិវឌ្ឍទីផ្សារហើយជាវិធីសាស្ត្រមួយ ដើម្បីលើកស្ទួយជីវភាពរស់នៅរបស់ប្រជាជនរស់នៅតាមតំបន់ជុំវិញទន្លេមេគង្គ។ ក្រុមអាជីវករក្រីក្រចំនួន ១៥២នាក់ ដែលនឹងលក់ដូរក្នុងផ្សារនេះ ត្រូវបានចងក្រងជាសមាគមអាជីវករ ដែលគ្រប់គ្រងដោយគណៈកម្មការគ្រប់គ្រងផ្សាររាត្រី ដែលដឹកនាំដោយអភិបាលក្រុង។ អ្នកទាំងនេះ ទទួលបានការបណ្ដុះបណ្ដាល និងថវិកាសម្រាប់អាជីវកម្មរបស់ពួកគាត់ ដែលគាំទ្រដោយគម្រោងនេះ។