បួន ច័ន្ទថារ៉ាត់ ប្រឹងជម្នះអារម្មណ៍តានតឹងរហូតដល់បានមេដាយប្រាក់ ITF ពិភពលោក

កីឡាជាតិ

ជាតិ

បួន ច័ន្ទថារ៉ាត់ ប្រឹងជម្នះអារម្មណ៍តានតឹងរហូតដល់បានមេដាយប្រាក់ ITF ពិភពលោក

30, Aug 2018 , 10:19 pm

រូបភាព

ដោយ:

ម្ចាស់មេដាយប្រាក់កីឡាករ បួន ច័ន្ទថារ៉ាត់ ហាក់បង្ហាញការហួសចិត្តដោយមិននឹកស្មានថា រូបគេអាចទទួលបានលទ្ធផលល្អបែបនេះឡើយ។ មុនការប្រកួតមកដល់ ច័ន្ទថារ៉ាត់ មិនមានទំនុកលើសមត្ថភាពរបស់ខ្លួននោះទេ។ លោក បួន ហ៊ីងសុធីយ៉ា ប្រធានប្រតិភូនិយាយថា ការប្រកួតជើងឯកពិភពលោកនៅបេឡារុស មានភាពស្វិតស្វាញនិងតានតឹងមែនទែន ព្រោះមានកីឡាករខ្លាំងៗជាច្រើនប្រទេសចូលរួម។ តែយ៉ាងណា កម្ពុជាទទួលបានបទពិសោធថ្មីៗជាច្រើន។

កីឡាករតេក្វាន់ដូ ITF វ័យ១៤ឆ្នាំ បួន ច័ន្ទថារ៉ាត់ បានបង្កើតភាពល្បីល្បាញលើឆាកអន្តរជាតិជូនកម្ពុជា តាមរយៈការដណ្តើមបានមេដាយប្រាក់ពីព្រឹត្តិការណ៍ប្រកួតជើងឯកពិភពលោកនៅប្រទេសបេឡារុស។ មេដាយប្រាក់នេះ ច័ន្ទថារ៉ាត់ ទទួលបានលើវិញ្ញាសាប្រយុទ្ធទម្ងន់៤៥គីឡូក្រាម ក្រោយចាញ់កីឡាកររុស្ស៊ីនៅវគ្គផ្តាច់ព្រ័ត្រ។

កីឡាករ បួន ច័ន្ទថារ៉ាត់ បាននិយាយថា មុនចេញដំណើរទៅចូលរួមប្រកួតក្នុងព្រឹត្តិការណ៍ខាងលើ រូបគេពុំមានជំនឿចិត្តថា ខ្លួនអាចធ្វើបានល្អបែបនេះឡើយ។ ថារ៉ាត់ ដែលទើបចូលរួមប្រកួតលើកដំបូង បានបង្ហាញអារម្មណ៍រំភើបសប្បាយរីករាយយ៉ាងខ្លាំងចំពោះលទ្ធផលលើសការរំពឹងទុកមួយនេះ។

ប៉ុន្តែកីឡាករវ័យ១៤ឆ្នាំរូបនេះ បានត្អូញត្អែរថា ការប្រកួតនេះមានការលំបាកខ្លាំងមែនទែន ព្រោះរូបគេត្រូវប្រជែងជាមួយកីឡាករជើងខ្លាំងមកពីបណ្តាប្រទេសផ្សេងៗ ដែលមានមាឌធំ និងកម្ពស់ខ្ពស់។ បើសិនមានឱកាសចូលរួមប្រកួតលើកក្រោយ ម្ចាស់មេដាយប្រាក់រូបនេះប្តេជ្ញាថា រូបគេនឹងខិតខំប្រឹងប្រែងឲ្យអស់ពីសមត្ថភាព ក្នុងការស្វែងរកមេដាយមាសជូនជាតិមាតុភូមិ។

លោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជាសង្កេតឃើញថា ព្រឹត្តិការណ៍ប្រកួតជើងឯកពិភពលោកនៅបេឡារុស មានការប្រកួតប្រជែងគ្នាស្វិតស្វាញនិងតានតឹងបំផុត ព្រោះមានកីឡាករមកពីប្រទេសជាច្រើនចូលរួម ទាំងតំបន់អឺរ៉ុប និងអាស៊ី។

ក្រៅពីទទួលបានបច្ចេកទេស និងបទពិសោធថ្មីៗ ដើម្បីអភិវឌ្ឍន៍សមត្ថភាពសម្រាប់កីឡាករ លោក បួន ហ៊ីងសុធីយ៉ា ដែលជាប្រធានប្រតិភូផងនោះបានអះអាងថា តាមរយៈការចូលរួមនេះកម្ពុជាទទួលបទពិសោធថ្មីបន្ថែមទៀត គឺផ្នែកបច្ចេកទេសរៀបចំការប្រកួត។ ពាក់ព័ន្ធបញ្ហានេះលោកបានរៀបរាប់ថា៖«សម្រាប់ការប្រកួតនេះ គឺគេបានបង្កើតក្បូនច្បាប់ថ្មីដែលយើងមិនធ្លាប់ឆ្លងកាត់។ ពីមុនការប្រកួតលើវិញ្ញាសាប្រយុទ្ធយើងបែងចែកជាមែកធាង ប៉ុន្តែគេបែងចែងជាពូល បន្ទាប់មកគេយកកីឡាករលេខ១និងលេខ២ក្នុងពូល បែងចែកជាមែកធាងប្រកួត»។

ជាមួយគ្នានេះ លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជាបានក្រើនរំលឹកដល់កីឡាករដែលទទួលបានជ័យជម្នះថា កុំឲ្យមានមោទកភាពលើខ្លួនឯងខ្លាំងពេក គឺត្រូវបន្តខិតខំប្រឺងប្រែងហ្វឹកហាត់ពង្រឹងសមត្ថភាពឲ្យកាន់តែខ្លាំងថែមទៀត ដើម្បីត្រៀមប្រជែងដណ្តើមមេដាយនៅលើកក្រោយៗទៀត។

ក្រុមប្រតិភូកីឡាតេក្វាន់ដូ ITF បាននាំយកមេដាយប្រាក់ និងសំរឹទ្ធពិភពលោកនៅបេឡារុស មកដល់កម្ពុជាកាលពីរសៀលថ្ងៃទី២៩ ខែសីហា ឆ្នាំ២០១៨។ ប្រតិភូកីឡាតេក្វាន់ដូ ITF ទទួលបានការស្វាគមន៍យ៉ាងកក់ក្តៅពីសំណាក់លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា និងលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា រួមនឹងថ្នាក់ដឹកនាំជាច្រើនរូបទៀត នៅអាកាសយានដ្ឋានអន្តរជាតិភ្នំពេញ៕