ជាតិ
សង្គមជាតិ
ស្នងការភ្នំពេញ លោក ជួន សុវណ្ណ និងនាយឧត្តមសេនីយ៍៩រូបទៀត នឹងត្រូវដាក់ឲ្យចូលនិវត្ត
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានថ្វាយលិខិតទៅព្រះមហាក្សត្រ ដើម្បីក្រាបបង្គំសុំឲ្យព្រះអង្គ រាជានុញ្ញាត ដាក់នាយនគរបាលថ្នាក់ឧត្តមសេនីយ៍១០រូប នៃក្រសួងមហាផ្ទៃ ឲ្យចូលនិវត្ត ដោយក្នុងនោះ ក៏មានលោក ជួន សុវណ្ណ ដែលជាអគ្គស្នងការរងនគរបាលជាតិ និងជាស្នងការរាជធានីភ្នំពេញផងដែរ។
នាយឧត្តមសេនីយ៍៩រូបទៀត រួមមាន សុខ ផល, លោក ម៉ៅ ច័ន្ទតារា , លោក ម៉ៅ ប៊ុនណារិន , លោក ថោង សំអាត, លោក ផាយ ពៅ, លោក សួស អង្គារ៍, លោក មួន សារ៉ន, លោក ឯម សំណាង, និងលោក លី គឹមឡុង។ នេះបើតាមលិខិតរបស់សម្តេច ហ៊ុន សែន ដែលចុះនៅថ្ងៃទី៣១ ខែសីហា ឆ្នាំ២០១៨ ហើយថ្វាយទៅព្រះមហាក្សត្រ ដើម្បីសុំរាជានុញ្ញាត ដាក់នាយឧត្តមសេនីយ៍ទាំងនោះ ឲ្យចូលនិវត្ត។
គេ មិនទាន់ទទួលបានព័ត៌មាននោះទេ ថានាយនគរបាលរូបណា ដែលនឹងជំនួសតំណែងរបស់លោក ជួន សុវណ្ណ។ តែចំពោះតំណែងរបស់អគ្គនាយក៣រូបនៃក្រសួងមហាផ្ទៃ ដែលរួមមានលោក សុខ ផល អគ្គនាយកនៃអង្គនាយកដ្ឋានអន្តោប្រវេសន៍ លោក ម៉ៅ ច័ន្ទតារា អគ្គនាយកនៃអគ្គនាយកដ្ឋានអត្តសញ្ញាណកម្ម និងលោក ម៉ៅ ប៊ុនណារិន អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ បានបង្ហាញហើយ។
អ្នកដែលនឹងត្រូវជំនួសនោះ គឺលោក គៀត ច័ន្ទថារិទ្ធ អគ្គស្នងការរងនគរបាលជាតិ នឹងជំនួសលោក សុខ ផល, លោក កង សុខន អគ្គស្នងការរងនគរបាលជាតិ នឹងត្រូវជំនួសលោក ម៉ៅ ច័ន្ទតារា និងលោកសេង យូអ៊ាន់ អគ្គនាយករងនៃអគ្គនាយកដ្ឋានភស្តុភារ និងហិរញ្ញវត្ថុ នឹងត្រូវជំនួសលោក ម៉ៅ ប៊ុនណារិន។ នេះបើតាមលិខិតមួយផ្សេងទៀតរបស់សម្តេច ហ៊ុន សែន ដែលបានថ្វាយទៅព្រះមហាក្សត្រ ដើម្បីក្រាបបង្គំសុំឲ្យព្រះអង្គ រាជានុញ្ញាត ផ្ទេរភារកិច្ច និងតែងតាំងមុខតំណែងទាំងនោះ៕
Tag:
ហ៊ុន សែន
ព្រះមហាក្សត្រ
© រក្សាសិទ្ធិដោយ thmeythmey.com