ណាហ្គាវើលបារម្ភពីបញ្ហាអវត្តមានកីឡាករ រីឯទ័ពអះអាងថា ត្រៀមខ្លួនបានល្អ

កីឡាជាតិ

ជាតិ

ណាហ្គាវើលបារម្ភពីបញ្ហាអវត្តមានកីឡាករ រីឯទ័ពអះអាងថា ត្រៀមខ្លួនបានល្អ

01, Sep 2018 , 3:06 pm

រូបភាព

រូបភាពពីហ្វេសប៊ុក CNCC

ដោយ:

ក្រុមណាហ្គាវើលត្រូវប្រជែងតទល់ជាមួយក្រសួងការពារជាតិ(ទ័ព) សម្រាប់ជំនួបវគ្គពាក់កណ្តាលផ្តាច់ព្រ័ត្រនៃពានរង្វាន់សម្តេច ហ៊ុន សែន នៅម៉ោង៦:៣០នាទីល្ងាចថ្ងៃទី១ ខែកញ្ញា ឆ្នាំ២០១៨នេះ នាពហុកីឡដ្ឋានជាតិ។ គ្រូបង្វឹកណាហ្គាវើលហាក់បង្ហាញក្តីបារម្ភចំពោះបញ្ហាអវត្តមានកីឡាករ ខណៈគ្រូបង្វឹកក្រសួងការពារជាតិអះអាងពីការត្រៀមខ្លួនយ៉ាងល្អសម្រាប់ជំនួបល្ងាចនេះ។

ណាហ្គាវើល នឹងផ្លាស់ប្តូរប្រព័ន្ធលេងពេលប៉ះក្រសួងការពារជាតិ បន្ទាប់ពីអវត្តមានខ្សែការពារ ឡេង មករា ដែលរងពិន័យព្យួរ១ប្រកួតក្រោយទទួលបានកាតលឿងពីរជាប់គ្នា។ ការអះអាងពីការផ្លាស់ប្តូរនេះ ក្រោយណាហ្គាវើលខ្វះខ្សែការពារល្អជំនួសទីតាំងខ្សែការពាររូបនេះ។ នេះបើតាមការបញ្ជាក់របស់លោក មាស ចាន់ណា គ្រូបង្វឹកក្រុមណាហ្គាវើល។

លោក មាស ចាន់ណា បានប្រាប់សារព័ត៌មានថ្មីៗថា៖«ការអវត្តមានខ្សែការពារ ឡេង មករា ដែលទទួលបានកាតលឿងពីរ អាចប៉ះពាល់តិចតួចសម្រាប់យើង។ ដូច្នេះយើងត្រូវផ្លាស់របៀបលេងតិចតួច ដោយសារយើងខ្វះកីឡាករខ្សែការពារ ព្រោះឆ្នាំនេះយើងដាក់ខ្សែការពារយុវជនច្រើន»។

ការស្នាក់នៅ និងប្រមូលផ្តុំហ្វឹកហាត់ជាប់ជាប្រចាំរបស់ក្រុមកីឡាករក្រសួងការពារជាតិ ដែលលោក មាស ចាន់ណា ចាត់ទុកថា ជាក្រុមមានទម្រង់លេងល្អ និងឆន្ទៈខ្ពស់ក្នុងការប្រកួត ក៏ជាក្តីកង្វល់សម្រាប់ណាហ្គាវើលផងដែរ។ ជាមួយនឹងក្តីរំពឹង៥០ភាគរយ គ្រូបង្វឹករូបនេះប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាពក្នុងការស្វែងរកជ័យជម្នះពីការប្រកួតមួយនេះ។

ជាមួយគ្នានេះ លោក ភា សុភ័ក្ត្រា គ្រូបង្វឹកក្រសួងការពារជាតិបានអះអាងថា ក្រសួងការពារជាតិពុំមានបញ្ហាកីឡាករមានរបួស ឬអវត្តមាននោះទេ។ លើសពីនេះ ថែមទាំងត្រៀមខ្លួនបានយ៉ាងល្អក្នុងការតទល់ជាមួយណាហ្គាវើល។ «ខ្ញុំគិតថា កីឡាករកម្ពុជារបស់ណាហ្គាវើលមានសមត្ថភាពល្អ និងពោរពេញដោយបទពិសោធ ពិសេសក្រុមនេះកំពុងគ្រងកំពូលតារាងលីគកំពូល។ តែយ៉ាងណា យើងប្តូររៀងៗខ្លួន ព្រោះការប្រកួតមិនមានប្រកួតជើងទី២នោះទេ»។ នេះជាការបន្ថែមរបស់លោក មាស ចាន់ណា។

ក្រុមណាហ្គាវើលត្រូវប្រជែងជាមួយក្រសួងការពារជាតិ ដើម្បីដណ្តើមកៅអីឡើងទៅលេងវគ្គផ្តាច់ព្រ័ត្រនៃពានរង្វាន់សម្តេច ហ៊ុន សែន នៅម៉ោង៦:៣០នាទីល្ងាចថ្ងៃទី១ ខែកញ្ញា ឆ្នាំ២០១៨នេះ នាពហុកីឡដ្ឋានជាតិ។ នាជំនួបវគ្គផ្តាច់ព្រ័ត្រពានរង្វាន់សម្តេច ហ៊ុន សែន កាលពីឆ្នាំ២០១៣ ណាហ្គាវើលបានយកឈ្នះក្រសួងការពារជាតិ ដោលបាល់កាត់សេចក្តី ៥-៣ ក្រោយក្រុមទាំងពីររក្សាលទ្ធផលស្មើ ០-០៕