ជាតិ
សង្គមជាតិ
ល្ខោនខោលខ្មែរ និងល្ខោនខូនថៃ ស្នើចុះបញ្ជីផ្សេងគ្នា មិនមែនជាការប្រទាញប្រទង់គ្នាឡើយ
× ទីប្រឹក្សាក្រសួងវប្បធម៌ និងវិចិត្រសិល្បៈលោក ព្រឿង ឈៀង បញ្ជាក់ថា ល្ខោនខោលខ្មែរ និងល្ខោនខូន ឬរបាំល្ខោនស្បែកមុខ (Khon masked dance) របស់ថៃ មានលក្ខណៈដាច់ដោយឡែកពីគ្នា ហើយកម្ពុជាមានឯកសារគ្រប់គ្រាន់ទាក់ទងនឹងបេតិកភណ្ឌអរូបីរបស់ខ្លួនដែលត្រូវបានស្នើសុំការចុះបញ្ជីនៅអង្គការយូណេស្កូ។
លោក ព្រឿង ឈៀង ដែលជាអ្នកជំនាញសិល្បៈបុរាណដ៏ល្បីល្បាញនៅកម្ពុជារូបនេះ បានបញ្ជាក់ថា ការទទួលស្គាល់ល្ខោនណាមួយមុន នឹងមិនចោទជាបញ្ហានោះឡើយ ប៉ុន្តែបើមានការកាត់សេចក្តីល្ខោនជាបេតិកភណ្ឌរួម ឬជារបស់ថៃនោះ ក្រសួងវប្បធម៌ និងវិចិត្រសិល្បៈ នឹងរៀបចំឯកសារដើម្បីតវ៉ាភ្លាមៗទៅកាន់យូណេស្កូ។
អង្គការអប់រំវិទ្យាសាស្ត្រនិងវប្បធម៌របស់អង្គការសហប្រជាជាតិ ហៅកាត់ថា យូណេស្កូ នឹងប្រកាសជាផ្លូវការទាក់ទងនឹងការចុះទាំងល្ខោនខោល និងល្ខោនខូន ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ នាអំឡុងកិច្ចប្រជុំលើកទី១៣នៃគណៈកម្មាធិការអន្តររដ្ឋាភិបាលសម្រាប់ការការពារបេតិកភណ្ឌវប្បធម៌អរូបិយ នឹងប្រព្រឹត្តទៅនៅក្រុង Port Louis ប្រទេសមូរីទូស ពីថ្ងៃទី២៦ ខែវិច្ឆិកា ដល់ថ្ងៃទី១ ខែធ្នូ នៅមជ្ឈមណ្ឌល Swami Vivekananda International Convention Centre (SVICC)។
បើតាមលោក ព្រឿង ឈៀង ក្នុងដំណាក់កាលនេះ យូណេស្កូកំពុងតែពិនិត្យ និងផ្ទៀងផ្ទាត់ បន្ថែមទាក់ទងនឹងល្ខោនទាំងពីរ ដែលហាក់ដូចជាមានភាពចម្រូងចម្រាស ជាពិសេសសំនៀងមានលក្ខណៈស្រដៀងគ្នា។
លោកបានបញ្ជាក់ថា បច្ចេកទេសសិល្បៈបង្ហាញឲ្យឃើញភាពដាច់ដោយឡែករវាងល្ខោនទាំងពីរ ហើយអ្នកខ្លះយល់ច្រលំថា ជាល្ខោនតែមួយ។ ទាក់ទងនឹងការបំផុសបំផុលឲ្យនាំគ្នាលើក កម្ពស់ ល្ខោនខោលនារយៈពេលចុងក្រោយនេះ លោក ព្រឿង ឈៀង មិនមានការយល់ទាស់អ្វីនោះឡើយ ប៉ុន្តែលោកសំណូមពរដល់កូនខ្មែរទាំងអស់សិក្សាពីសិល្បៈរបស់ខ្លួនឲ្យបានស៊ីជម្រៅ ដោយចៀសវាងនូវប្រតិកម្ម និងការចោទគ្នាទៅវិញទៅមក៕
Tag:
ក្រសួងវប្បធម៌ និងវិចិត្រសិល្បៈ
ល្ខោនខោល
សិល្បៈ
របាំ
ព្រឿង ឈៀង
© រក្សាសិទ្ធិដោយ thmeythmey.com