មហាវិថី សម្តេច ហ៊ុន សែន ឬផ្លូវ៦០ម៉ែត្រ ជាតំបន់មួយដែលកំពុងមានកំណើនវិនិយោគខ្លាំងក្លាបើធៀបនឹងតំបន់ដ៏ទៃទៀត នៅក្នុងរាជធានីភ្នំពេញ។ បច្ចុប្បន្ន តំបន់នេះមានភាពទាក់ទាញ និងមានសក្តានុពលខ្លាំងសម្រាប់វិស័យអចលនទ្រព្យ ស្របពេលជាមួយនឹងគម្រោងផែនការអភិវឌ្ឍន៍ទីក្រុងរបស់សាលាក្រុងភ្នំពេញនៅឆ្នាំ២០៣៥ ។
ផ្លូវ៦០ម៉ែត្រ មានទទឹង៦០ម៉ែត្រ និងបណ្តោយជិត១០គីឡូម៉ែត្រ ដែលជាផ្លូវតភ្ជាប់ដ៏សំខាន់មួយនៅក្នុងរាជធានីភ្នំពេញ ដើម្បីជួយសម្រួលដល់ការកកស្ទះចរាចរនៅភាគខាងត្បូងនៃទីក្រុង។ ផ្លូវនេះបានភ្ជាប់គ្នារវាងផ្លូវលេខ២៧១ភាគខាងជើង ជាមួយផ្លូវជាតិលេខ២ភាគខាងត្បូង។
លោក Ken Lo ប្រធាន និងជានាយកប្រតិបត្តិរបស់ក្រុមហ៊ុន Century 21 Imperial Realty មានប្រសាសន៍ថា មានគម្រោងធំៗជាច្រើនបានចាប់ផ្តើមដំណើរការសាងសង់ និងកំពុងរៀបចំការសាងសង់នៅតាមបណ្តោយផ្លូវ៦០ម៉ែត្រនេះ។
ទីក្រុងរណប ING City មានទំហំ ២៦០០ហិកតា ជាគម្រោងអភិវឌ្ឍន៍ដ៏ធំបំផុតនៅកម្ពុជា និងនៅក្នុងតំបន់អាស៊ីអាគ្នេយ៍ មានគម្រោងអភិវឌ្ឍន៍ផ្សេងៗគ្នាជាច្រើន ដែលកំពុងដំណើរការសាងសង់។ ក្នុងនោះមានគម្រោងលំនៅដ្ឋាន ផ្សារទំនើប ពាណិជ្ជកម្ម និងកន្លែងលក់រាយ រួមនឹងសេវាកម្មទូទៅចម្រុះ។
ជាមួយគ្នានេះ មានគម្រោងបុរីល្បីៗជាច្រើន រួមមាន បុរីជីបម៉ុង បុរីពិភពថ្មី និងបុរីប៉េងហួត ក៏បានចាប់ផ្តើមការវិនយោគរបស់ខ្លួននៅតាមបណ្តោយផ្លូវ៦០ម៉ែត្រនេះផងដែរ។
លោក Ken Lo បាននិយាយថា វិនិយោគិនចិន កំពុងស្វែងរកទិញដីធំៗសម្រាប់ការសាងសង់គម្រោងលំនៅដ្ឋាន និងមជ្ឍមណ្ឌលពាណិជ្ជកម្ម។
ជាក់ស្តែង គម្រោង Urban Village មានទំហំ ៧.៦ហិកតា គម្រោង Lingnan Garden មានទំហំ ២.១ហិកតា និងគម្រោង R&F City ដែលជាគម្រោងអភិវឌ្ឍន៍ចម្រុះ វិនិយោគដោយក្រុមហ៊ុន ចិន ឬក្រុមហ៊ុនបុត្រសម្ព័ន្ធរបស់ចិននៅកម្ពុជា បានចាប់យកទីតាំងនៅតាមបណ្តោយផ្លូវនេះ។
កន្លងមកក៏ធ្លាប់មានការចុះផ្សាយថា ក្រុមហ៊ុនវិនិយោគរបស់ជប៉ុនក៏បានគ្រោងនឹងសាងសង់ផ្សារទំនើបអ៊ីអនទី៣នៅក្នុងទីតាំងនេះផងដែរ។
អ្នកនាង Jessie Mao អ្នករៀបចំផែនការរបស់គម្រោង R&F City មានប្រសាសន៍ថាគម្រោងបានសិក្សាឃើញប៉ែកខាងត្បូងនៃទីក្រុងភ្នំពេញជាពិសេសតាមបណ្តោយ ផ្លូវ៦០ម៉ែត្រ គឺជាទីតាំងល្អបំផុតសម្រាប់ការអភិវឌ្ឍអចលនទ្រព្យ។
អ្នកនាងបានបញ្ជាក់ថា «តម្លៃដីបានកើនឡើងខ្លាំង ប៉ុន្តែនៅតែមានកម្រិតទាបនៅឡើយបើប្រៀបធៀបទៅនឹងដីក្នុងតំបន់ផ្សេងទៀតនៅក្នុងទីក្រុង ហើយដីតំបន់ផ្លូវ៦០ម៉ែត្រមានសក្តានុពលខ្លាំងសម្រាប់ការអភិវឌ្ឍផ្សេងៗបន្ថែមទៀត។ ភាគខាងត្បូងនៃរាជធានីភ្នំពេញ នឹងពិតជាក្លាយជាមជ្ឈមណ្ឌលនៃក្រុងថ្មីមួយទៀតនាពេលអនាគត»។
អ្នកនាងបានបន្ថែមថា បច្ចុប្បន្ននេះដីក្នុងនៅក្នុងទីក្រុងកាន់តែចង្អៀត ហើយតម្លៃក៏កាន់តែថ្លៃខ្លាំងពិសេសដីនៅតំបន់កណ្តាលក្រុងភ្នំពេញ។
ផ្លូវ៦០ម៉ែត្រ បានលាតសន្ធឹងដោយឆ្លងកាត់សង្កាត់ចំនួនបី គឺសង្កាត់ចាក់អង្រែលើ និងចាក់អង្រែក្រោមក្នុងខណ្ឌមានជ័យ និងសង្កាត់ជើងឯកក្នុងខណ្ឌដង្កោ។
យោងតាមរបាយការណ៍តម្លៃដីជាមធ្យមនៃទីក្រុងភ្នំពេញសម្រាប់ពាក់កណ្តាលឆមាសទី១ឆ្នាំ២០១៨ របស់ក្រុមហ៊ុន ឃី រៀល អ៊ីស្ទេត ដីសម្រាប់ពាណិជ្ជកម្ម ឬអាជីវកម្មនៅសង្កាត់ចាក់អង្រែលើមានតម្លៃជាមធ្យម១៦៥០ដុល្លារក្នុងមួយម៉ែត្រការ៉េ។ ដីអាជីវកម្មក្នុងសង្កាត់ចាក់អង្រែក្រោមមានតម្លៃជាមធ្យម១២៥០ដុល្លារក្នុងមួយម៉ែត្រការ៉េ។ ចំណែកឯដីអាជីវកម្មក្នុងសង្កាត់ជើងឯកវិញមានតម្លៃ៦០០ដុល្លារក្នុងមួយម៉ែត្រការ៉េ។
លោក សន សៀប ស្ថាបនិក និងជានាយកប្រតិបត្តិរបស់ក្រុមហ៊ុន ឃី រៀល អ៊ីស្ទេត មានប្រសាសន៍ថា ផ្លូវ៦០ម៉ែត្រ បានរួមចំណែកយ៉ាងខ្លាំងដល់កំណើនអចលនទ្រព្យក្នុងតំបន់។ លោកបានលើកឡើងថា ប្រជាប្រិយភាព និងការអភិវឌ្ឍរបស់តំបន់នេះនឹងកើនឡើងថែមទៀត ដោយសារថ្ងៃអនាគតគម្រោងហេដ្ឋារចនាសម្ព័ន្ធសំខាន់ៗនឹងតភ្ជាប់គ្នា។ ការលើកឡើងបែបនេះ គឺចង់សំដៅដល់ផ្លូវក្រវ៉ាត់ទី៣ និងគម្រោងព្រលានយន្តហោះអន្តរជាតិថ្មីដែលបានស្នើសុំនៅស្រុកកណ្តាលស្ទឹង ខេត្តកណ្តាល។
ការចាប់អារម្មណ៍ និងការហូរចូលកាន់តែច្រើនពីសំណាក់អ្នកអភិវឌ្ឍន៍បានធ្វើឲ្យតម្លៃដីធ្លីកើន ឡើងជាលំដាប់នៅក្នុងតំបន់។ លោក Ken Lo បានបញ្ជាក់ថា «តម្លៃដីកើនឡើងថ្លៃជាងពីមុន»។
ដីតាមបណ្តោយផ្លូវ៦០ម៉ែត្រ ដែលស្ថិតនៅចន្លោះផ្លូវ២៧១ ដល់បុរីប៉េងហួតបានកើនឡើងដល់ ២០០០ដុល្លារក្នុងមួយម៉ែត្រការ៉េ ធៀបនឹងឆ្នាំមុនមានតម្លៃពី១០០០ដុល្លារទៅ១២០០ដុល្លារក្នុងមួយម៉ែត្រការ៉េ។ ចំណែកដីដែលស្ថិតនៅចាប់ពីបុរីប៉េងរហូតដល់ផ្លូវជាតិលេខ២បច្ចុប្បន្នមានតម្លៃ ពី៨០០ទៅ១៥០០ដុល្លារក្នុងមួយម៉ែត្រការ៉េ បើធៀបទៅនឹងចុងឆ្នាំ២០១៧ដីមានតម្លៃចាប់ពី៤០០ ទៅ១២០០ដុល្លារក្នុងមួយម៉ែត្រការ៉េ។ នេះបើតាមលោក Ken Lo៕