តំណាងរដ្ឋាភិបាល៖ ស្ថាប័នពាក់ព័ន្ធ គួរចាប់ដៃជាមួយអង្គការសង្គមស៊ីវិល រកដំណោះស្រាយរួមលើបញ្ហាដីធ្លី

ជាតិ

តំណាងរដ្ឋាភិបាល៖ ស្ថាប័នពាក់ព័ន្ធ គួរចាប់ដៃជាមួយអង្គការសង្គមស៊ីវិល រកដំណោះស្រាយរួមលើបញ្ហាដីធ្លី

04, Sep 2018 , 11:00 pm

រូបភាព

ដោយ: ញឹក ស្រីល័ក្ខ (Nhek Sreyleak)

ណាខនរាជសីមា,ថៃ៖ អង្គការសង្គមស៊ីវិល, វិស័យឯកជន និងក្រសួងពាក់ព័ន្ធ បានស្វែងយល់ និងចាប់អារម្មណ៍លើអភិបាលកិច្ចដីធ្លី និងធនធានធម្មជាតិនៅក្នុងតំបន់ស្រុកវ៉ាងណាមខៀវ នៃខេត្តណាខនរាជសីមា ដែលជាតំបន់មានជម្លោះដីធ្លីដ៏រ៉ាំរ៉ៃ។ ក្នុងកិច្ចពិភាក្សា និងការធ្វើបទបង្ហាញរបស់ភាគីថៃ ដែលតំណាងឲ្យរដ្ឋបាលព្រៃឈើ, NGO និងអភិបាលរងស្រុកវ៉ាងណាមខៀវ បានចំណាយពេលពេញមួយថ្ងៃ ក្នុងការពន្យល់ និងបកស្រាយពីបញ្ហា រួមទាំងការដោះស្រាយជម្លោះដីធ្លីនានាដល់ភាគីកម្ពុជា។

លោក សុខ បូរ៉ា ប្រធាននាយកដ្ឋានសន្ធានកម្ម និងយុត្តិធម៌មូលដ្ឋាន នៃក្រសួងយុត្តិធម៌ បានលើកឡើងថា ក្រសួងពាក់ព័ន្ធ គួរតែចាប់ដៃគ្នា ជាមួយអង្គការសង្គមស៊ីវិល ដើម្បីរកចំណុចរួមមួយក្នុងការដោះស្រាយបញ្ហាដីធ្លី។

ការលើកឡើងដូច្នេះ នៅក្នុងកិច្ចពិភាក្សាពីបញ្ហា និងការដោះស្រាយជម្លោះដីធ្លី, ធនធានធម្មជាតិ និងព្រៃឈើនៅក្នុងស្រុកវ៉ាងណាមខៀវ ប្រទេសថៃ។ កិច្ចពិភាក្សានេះជាផ្នែកមួយនៃទស្សនកិច្ចស្ដីពីអភិបាលកិច្ចដីធ្លី និងធនធានធម្មជាតិ ក្នុងបរិបទនៃការទទួលខុសត្រូវសង្គមរបស់ក្រុមហ៊ុនសាជីវកម្ម និងការអភិវឌ្ឍប្រកបដោយចីរភាព ដែលរៀបចំដោយ NGO Forum។ ភាគីថៃ បានចំណាយពេលពេញ១ថ្ងៃពេញ ធ្វើបទបង្ហាញលើប្រធានបទចំនួន២ គឺច្បាប់ និងគោលនយោបាយស្ដីពីសិទ្ធិកាន់កាប់ដីធ្លី រួមទាំងសិទ្ធិប្រើប្រាស់ដីធ្លី(ព្រៃឈើ និងធនធានធម្មជាតិ) និងការដោះស្រាយជម្លោះ។

អត្ថបទទាក់ទង

NGO Forum និងអ្នកកាសែតទៅទស្សនកិច្ចនៅថៃ ស្ដីពីអភិបាលកិច្ចដីធ្លី និងធនធានធម្មជាតិ

សម្រាប់ លោក សុខ បូរ៉ា ការធ្វើបទបង្ហាញនេះ មានចំណុចល្អច្រើន ដែលធ្វើឲ្យសហគមន៍ចូលរួមដាំដើមឈើ ហើយចំណុចនេះ គួរតែយកទៅអនុវត្តនៅកម្ពុជា។ លោកបញ្ជាក់ដូច្នេះថា៖«ការលើកឡើងរបស់ភាគីថៃ ធ្វើឲ្យខ្ញុំចាប់អារម្មណ៍ខ្លាំងលើបញ្ហាដីធ្លី និងព្រៃឈើ ផ្ដោតលើការគ្រប់គ្រង និងអភិរក្សលើតំបន់ព្រៃសហគមន៍»។

លោក សុម សុខម្ភូ អគ្គនាយកក្រុមហ៊ុនធុរៈវឌ្ឍន៍ ដែលតំណាងឲ្យវិស័យឯកជន ក៏យល់ស្របដែរថា សង្គមស៊ីវិលមានតួនាទីដ៏សំខាន់ ក្នុងការដោះស្រាយជម្លោះដីធ្លី ក៏ដូចជាចូលរួមអប់រំ និងបង្រៀនពលរដ្ឋឲ្យយល់ពីការអភិវឌ្ឍប្រកបដោយចីរភាព។ នៅក្នុងកិច្ចពិភាក្សានេះ លោក សុម សុខម្ភូ ក៏បានយល់ដឹងបន្ថែមទៀតពីរបៀប និងបច្ចេកទេស ក្នុងការចរចាជាមួយដៃគូ និងសេចក្ដីត្រូវការរបស់រដ្ឋ និងឯកជនផងដែរ។

អ្នកស្រី ជា សុភាព ដែលធ្វើការទាក់ទងនឹងសហគមន៍ និងជាតំណាងពីខាងអង្គការសង្គមស៊ីវិល អះអាងថា ខ្លួននឹងព្យាយាមសហការអាជ្ញាធរដែនដី និងប្រជាសហគមន៍ឲ្យបានស្វែងយល់ពីចំណុចនេះ ក្នុងការការពារព្រៃឈើ និងបញ្ហាដីធ្លី។

សូមបញ្ជាក់ថា ក្នុងដំណើរទស្សនកិច្ចនេះ មានរយៈពេល ៦ថ្ងៃ ដែលគណៈប្រតិភូមកពីតំណាងក្រសួង, អង្គការសង្គមស៊ីវិល, វិស័យឯកជន, ប្រជាសហគមន៍ និងប្រព័ន្ធផ្សព្វផ្សាយ។ ដំណើរទស្សនកិច្ចនេះ នឹងធ្វើដំណើរទៅកាន់តំបន់រងផលប៉ះពាល់ផ្ទាល់ ដើម្បីឲ្យភាគីពាក់ព័ន្ធបានយល់ដឹងកាន់តែច្បាស់ពីការការពារធនធានធម្មជាតិ និងការដោះស្រាយបញ្ហាដីធ្លីឲ្យមានប្រសិទ្ធភាព៕