ភ្នំពេញ៖ សមាជិកអនុគណៈកម្មការគ្រប់គ្រងសន្លឹក MCS និងអនុគណៈកម្មការស្រង់បូកពិន្ទុដោយកុំព្យូទ័រ កំពុងមានភាពមមាញឹកក្នុងការបំពេញភារកិច្ច ស្រង់-បូក និងពិនិត្យផ្ទៀងផ្ទាត់ពិន្ទុបេក្ខជនប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់ឆ្នាំ២០១៨នេះ។ លទ្ធផលប្រឡងអាចនឹងប្រកាសមុនការកំណត់ ពោលគឺនៅថ្ងៃទី៩ និង១០ ខែកញ្ញាវិញ បើសិនជាការបូកសរុបពិន្ទុនេះ លឿនជាងការគ្រោងទុក។នេះបើតាមរដ្ឋមន្ត្រីក្រសួងអប់រំ យុវជន និងកីឡា។
សូមស្ដាប់សំឡេងលោក ហង់ ជួន ណារ៉ុន៖
រដ្ឋមន្ត្រីក្រសួងអប់រំ ដែលតាមដានយ៉ាងយកចិត្តទុកដាក់លើ ការកំណែនិងស្រង់ពិន្ទុនេះ បានវាយតម្លៃវិជ្ជមានលើលទ្ធផលប្រឡង។ ដ្បិតមិនទាន់អាចបញ្ជាក់ឲ្យបានច្បាស់ក្តី ប៉ុន្តែលោក ហង់ ជួន ណារ៉ុន ហ៊ាននិយាយមុនថា សិស្សជាប់និទ្ទេសAឆ្នាំនេះ នឹងកើនឡើងច្រើនជាងឆ្នាំមុន។ នោះក៏ព្រោះតែលោក ហង់ ជួន ណារ៉ុន មើលឃើញថា ការរឹតបន្តឹងការប្រឡង៥ឆ្នាំនេះ បានធ្វើឲ្យបេក្ខជនប្រឡងបាក់ឌុបទាំងអស់ ប្រឹងប្រែងសិក្សាខ្លាំង ដើម្បីទទួលបាននិទ្ទេសល្អ។
ថ្លែងប្រាប់អ្នកកាសែត ក្រោយចូលរួមពិធីអបអរនិស្សិត ២១ នាក់ ដែលទទួលបានអាហារូបករណ៍ទៅសិក្សានៅអង់គ្លេស កាលពីថ្ងៃទី៤ កញ្ញា រដ្ឋមន្ត្រីអប់រំ បានបញ្ជាក់ដូច្នេះថា៖«ខ្ញុំមានជំនឿជឿជាក់ថា ដោយសារសិស្សយើងខំប្រឹងរៀនជាង៥ឆ្នាំមកហើយ ដូច្នេះនិទ្ទេសA ប្រហែលជាច្រើនជាងមុន កាលមុនយើងមាន៤២៤នាក់។ ប្រហែលជាច្រើនជាងមុន ប៉ុន្តែប៉ុន្មានខ្ញុំមិនទាន់ដឹងទេ ព្រោះអីមិនទាន់(ស្រង់ពិន្ទុ)ចប់»។
សម្រាប់ពិន្ទុនិទ្ទេសA ត្រូវបានក្រសួងអប់រំកំណត់៤២៧ពិន្ទុ ដែលស្មើនឹង៩០ភាគរយ ,និទ្ទេសB ត្រូវបានកំណត់៣៨០ពិន្ទុ ដែលស្មើ៨០ភាគរយ ,និទ្ទេសC ត្រូវបានកំណត់៣៣២ពិន្ទុ ដែលស្មើ៧០ភាគរយ ,និទ្ទេសD ត្រូវបានកំណត់២៨៥ពិន្ទុ ដែលស្មើនឹង៦០ភាគរយ និងនិទ្ទេសE ត្រូវបានកំណត់២៣៧ពិន្ទុ ដែលស្មើ៥០ភាគរយ នៃពិន្ទុប្រឡងអតិបរមា៥០០ពិន្ទុ។
តាមពិតពិន្ទុប្រឡងអតិបរមា៥០០ពិន្ទុនេះ តម្រូវឲ្យអ្នកជាប់និទ្ទេសE មាន២៥០ពិន្ទុ ប៉ុន្តែដោយសារមុខវិជ្ជាភាសាបរទេសជាវិញ្ញាសាតាមស្ម័គ្រ ដូច្នេះពិន្ទុប្រឡងជាប់គឺ ៥០០ ដក ២៥ រួចចែកនឹង ២ ស្មើនឹង ២៣៧,៥ពិន្ទុ ទើបសម្រេចយកត្រឹម ២៣៧ពិន្ទុ ជាប់សម្រាប់និទ្ទេសE។ នេះបើតាមក្រសួងអប់រំ។
ដើមឡើយក្រសួងគ្រោងប្រកាសលទ្ធផលប្រឡងនៅថ្ងៃទី១១ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល។ ចំណែកនៅថ្ងៃទី១២ ខែកញ្ញា សម្រាប់មណ្ឌលប្រឡងតាមបណ្តាខេត្ត។ ប៉ុន្តែការប្រកាសនេះ អាចលើកមកថ្ងៃទី៩ និង១០ កញ្ញាវិញ បើការស្រង់-បូកពិន្ទុលឿនមុនការរំពឹងទុក។
គួរបញ្ជាក់ថា កាលពីឆ្នាំ២០១៧កន្លងមក មានសិស្សដែលប្រឡងជាប់៦៣៦៦៨នាក់ ត្រូវជា៦៣,៨៤ភាគរយ ក្នុងចំណោមបេក្ខជនវត្តមានប្រឡង៩៩,៧២៨នាក់ ដោយក្នុងនោះបេក្ខជនជាប់និទ្ទេស A មានចំនួន ៤២៤នាក់ និទ្ទេស B មានចំនួន ២ ៤៦៤នាក់ និទ្ទេស C មានចំនួន ៥០០០នាក់ និទ្ទេស D មានចំនួន ៩១២៣នាក់ និងនិទ្ទេស E មានចំនួន ៤៦ ៦៥៧នាក់ ៕