ជាតិ
សិល្បះ
សពតន្ត្រីករជើងចាស់ លោក ម៉ម ប៊ុនណារាយ ត្រូវបូជានាម៉ោង១រសៀលនេះហើយ
× អ្នកស្រី ឱម វណ្ណថាត ដែលត្រូវជាភរិយារបស់តន្ត្រីករជើងចាស់លោក ម៉ម ប៊ុនណារាយ បានបញ្ជាក់ប្រាប់សារព័ត៌មាន ThmeyThmey សពរបស់ស្វាមីខ្លួននឹងត្រូវបូជានាវេលាម៉ោង១រសៀលថ្ងៃទី៥ ខែកញ្ញា នេះ នៅវត្តសន្តិវ័ន ហៅវត្តទួលអស់លោក បន្ទាប់ពីបានដង្ហែចេញពីព្រះវិហារកាតូលិកផ្សារតូច។
លោក ម៉ម ប៊ុនណារាយ តន្ត្រីករ និងជាកវី នាអំឡុងទសវត្សរ៍ឆ្នាំ១៩៦០ និង១៩៧០ បានទទួលមរណភាពក្នុងអាយុ៨៥ឆ្នាំ កាលពីព្រឹកថ្ងៃទី៣ ខែកញ្ញា ដោយសារជរាពាធ។ ដោយសារតែដំណឹងមរណភាពមិនមានការផ្សាយទូលំទូលាយ អ្នកស្រី ឱម វណ្ណថាត រំពឹងថា ញាតិមិត្តជិតឆ្ងាយ ជាពិសេសសិស្សរៀនភ្លេងរបស់ស្វាមីខ្លួន នឹងចូលរួមក្នុងពិធីដង្ហែ និងបូជាសពនៅថ្ងៃនេះ។
អ្នកស្រី ឱម វណ្ណថាត បញ្ជាក់៖«ពេលគាត់ចែកឋាន ខ្ញុំមិនបានប្រាប់សិស្សគាត់ច្រើនទេ ប្រាប់បានតែសិស្សជិតដិតប៉ុន្មាននាក់។ ដូច្នេះខ្ញុំសុំឱ្យការផ្សព្វផ្សាយនេះទៅដល់កូនសិស្សគាត់ទាំងអស់បានដឹង បានមកដង្ហែសព និងពិធីបូជាសពផង។ គាត់សប្បាយចិត្តណាស់ពេលឃើញសិស្សមកច្រើន។ ខ្ញុំមិនចង់បានអ្វីទេ គ្រាន់តែចង់ឱ្យបានឃើញមុខគ្នាទៅបានហើយ»៕
Tag:
ម៉ម ប៊ុនណារាយ
សិល្បៈ
តន្ត្រីករ
តន្ត្រី
© រក្សាសិទ្ធិដោយ thmeythmey.com