គ្រូបង្វឹក៖ គួច សុកុម្ភៈ ជាកីឡាករមានវិន័យល្អ សឹងតែអាចធ្វើគ្រូបង្វឹកបាន

កីឡាជាតិ

ជាតិ

គ្រូបង្វឹក៖ គួច សុកុម្ភៈ ជាកីឡាករមានវិន័យល្អ សឹងតែអាចធ្វើគ្រូបង្វឹកបាន

05, Sep 2018 , 1:29 pm

រូបភាព

គួច សុកុម្ភៈ នាជំនួបរវាងកម្ពុជាទល់នឹងហ្សូកដានីនាពេលកន្លងមក

ដោយ:

ខ្សែបម្រើជើងចាស់ណាហ្គាវើល គួច សុកុម្ភៈ ត្រូវបានជ្រើសរើសឲ្យចូលរួមហ្វឹកហាត់ក្នុងជម្រើសជាតិកម្ពុជា ដើម្បីត្រៀមប្រកួតមិត្តភាពអន្តរជាតិជាមួយក្រុមម៉ាឡេស៊ី នៅថ្ងៃទី១០ ខែកញ្ញា ឆ្នាំ២០១៨។ ភាពចាស់ទុំប្រកបដោយបទពិសោធ និងមានវិន័យល្អ របស់ សុកុម្ភៈ ត្រូវបានគេចាត់ទុករូបគេប្រៀបបាននឹងគ្រូបង្វឹក១រូបនៅលើទីលាន។

ក្រោយទទួលបានកៅអីក្នុងក្រុមជម្រើសជាតិក្រោមការដឹកនាំរបស់លោក Keisuke Honda សម្រាប់ត្រៀមជំនួបមិត្តភាពអន្តរជាតិជាមួយម៉ាឡេស៊ី ខ្សែបម្រើ គួច សុកុម្ភៈ ត្រូវបានគ្រូបង្វឹកលោក មាស ចាន់ណា ប្រដូចរូបគេទៅនឹងគ្រូបង្វឹកមួយរូប ដែលបញ្ជាការប្រកួតនៅលើទីលាន។ ការប្រដូចបែបនេះ ដោយសាររូបគេជាកីឡាករចាស់ទុំ ដែលមានបទពិសោធច្រើននៅលើទីលានប្រកួត និងមានវិន័យល្អក្នុងការហ្វឹកហាត់។

«ខ្ញុំគិតថា គាត់(គួច សុកុម្ភៈ) ជាមនុស្សចាស់ទុំមានបទពិសោធ ដែលយើងអាចទុកថា សឹងតែអាចធ្វើជាគ្រូបង្វឹក១រូបបាននៅលើទីលាន។ ខ្ញុំជឿជាក់ថា គាត់នឹងធ្វើបានល្អជាមួយក្រុមជម្រើសជាតិ។ ព្រោះគាត់ជាមនុស្សមានវិន័យផ្ទាល់ខ្លួន ចេះរៀបចំខ្លួនធ្វើយ៉ាងឲ្យមានសុខភាពបានល្អ ដើម្បីបន្តការប្រកួត»។ នេះជាការលើកឡើងរបស់លោក មាស ចាន់ណា គ្រូបង្វឹកណាហ្គាវើល។

គួច សុកុម្ភៈ មានស្រុកកំណើតនៅខេត្តកំពង់ធំ បច្ចុប្បន្នមានអាយុ៣១ឆ្នាំ។ មុនមករួមរស់ជាមួយណាហ្គាវើលនៅឆ្នាំ២០១៥ដល់បច្ចុប្បន្ន សុកុម្ភៈ ជាយុវជនរបស់ក្លិបក្រសួងការពារជាតិពីឆ្នាំ២០០៣-២០០៤។ បន្ទាប់មករូបគេ បានផ្លាស់ទៅចូលរួមជាមួយក្លិបខេមរាកីឡាពីឆ្នាំ២០០៥-២០១០ មុនផ្លាស់ទៅភ្នំពេញក្រោនពីឆ្នាំ២០១០-២០១៥។

កីឡាករមកពីខេត្តកំពង់ធំរូបនេះ បានក្លាយជាសមាជិកក្រុមជម្រើសជាតិតាំងពីឆ្នាំ២០០៦។ ក្នុងចំណោមការបង្ហាញខ្លួន៤៥លើកក្នុងក្រុមជម្រើសជាតិ រូបគេរកបាន៦គ្រាប់។

ក្រុមជម្រើសជាតិកម្ពុជាក្រោមការដឹកនាំរបស់លោក Keisuke Honda បានចាប់ផ្តើមប្រមូលផ្តុំហ្វឹកហាត់លើកដំបូងកាលពីថ្ងៃទី៤ ខែកញ្ញា ឆ្នាំ២០១៨។ ការហ្វឹកហាត់ ដែលរៀបចំនៅពហុកីឡដ្ឋានជាតិ ទទួលបានការចាប់អារម្មណ៍យ៉ាងច្រើនពីទស្សនិកជនជាតិនិងអន្តរជាតិ។ លើសពីនេះ មានអ្នកសារព័ត៌មានជាតិនិងអន្តរជាតិយ៉ាងច្រើនកុះករ បានមកថតរូប និងវីដេអូនៃសកម្មភាពហ្វឹកហាត់ថ្ងៃដំបូងនេះទៀតផង៕