អន្តរជាតិ
អ្នកបង្កើតបណ្តាញ Haqqani ក្នុងប្រទេសប៉ាគីស្ថានបានស្លាប់ហើយក្រោយពីមានជំងឺយ៉ាងយូរ
រូបភាព៖ AFP
×![]()
ដោយ: VOA
បុរសដែលបានបង្កើតបណ្តាញ Haqqani ដែលជាសាខាមួយគេខ្លាចបំផុតនិងបានសម្លាប់មនុស្សច្រើនបំផុតនៃពួកតាលីបង់អាហ្វហ្គានីស្ថានបានស្លាប់ហើយក្រោយពីមានជំងឺក្នុងរយៈពេលយូរ។
នៅថ្ងៃអង្គារនេះ អ្នកនាំពាក្យរបស់ពួកតាលីបង់ឈ្មោះ Zabihullah Mujahid បានចេញផ្សាយសេចក្តីថ្លែងការណ៍មួយបញ្ជាក់អំពីការស្លាប់របស់ឈ្មោះ Jalaluddin Haqqani ហើយបានសម្តែងការគោរពដល់ «ការតស៊ូរបស់លោកក្នុងសង្គ្រាមសាសនា Jihad» និងបានសម្តែងមរណទុក្ខដល់ «គ្រួសារលោកដែលស្មោះស្ម័គ្រក្នុងសង្គ្រាមសាសនា Jihad»។
បណ្តាញ Haqqani បានចូលរួមក្នុងសង្គ្រាមសាសនា Jihad របស់ប្រទេសអាហ្វហ្គានីស្ថានប្រឆាំងនឹងសហភាពសូវៀតនៅក្នុងទសវត្សរ៍ឆ្នាំ១៩៨០។
នៅពេលនោះដែរ បណ្តាញ Haqqani ក៏ជិតស្និទ្ធជាមួយទីភ្នាក់ងារស៊ើបការណ៍សម្ងាត់ស.រ.អា. CIA ដែលបានគាំទ្រពួកយុទ្ធជនប្រឆាំងនឹងអតីតសហភាពសូវៀត។
នៅក្រោយពួកតាលីបង់ឡើងកាន់អំណាចក្នុងទសវត្សរ៍ឆ្នាំ១៩៩០ បណ្តាញ Haqqani បានចូលរួមជាមួយពួកនេះហើយបានកាន់តំណែងជារដ្ឋមន្ត្រីខាងព្រំដែននិងបានក្លាយទៅជាសមាជិកម្នាក់នៃក្រុមប្រឹក្សាដឹកនាំរបស់ពួកនេះផងដែរ។
នៅពេលដែលពួកតាលីបង់បានត្រូវបណ្តេញចេញពីអំណាចដោយការវាយប្រហារដឹកនាំដោយស.រ.អា.កាលពីឆ្នាំ២០០១ គាត់បានរត់គេចខ្លួនទៅប្រទេសប៉ាគីស្ថាននៅជិតខាង។
ក្រុមរបស់គាត់គឺបណ្តាញ Haqqani បានធ្វើការវាយប្រហារខ្លះមានភាពសាំញ៉ាំ ចំៗ និងនាំឱ្យមានមនុស្សស្លាប់ច្រើននៅក្នុងប្រទេសអាហ្វហ្គានីស្ថាន។ ពួកមន្ត្រីអាហ្វហ្គានីស្ថាន និងបស្ចិមប្រទេសមានជំនឿថា ការបំផ្ទុះគ្រាប់បែកក្នុងឡាន camion មួយគ្រឿងនៅក្នុងក្រុងកាប៊ុលកាលពីឆ្នាំ២០១៧ ដែលបានបណ្តាលឱ្យមនុស្សជាង១៥០នាក់ស្លាប់ និងបានធ្វើឱ្យមានការខូចខាតដល់ស្ថានទូតអាល្លឺម៉ង់ជាសកម្មភាពវាយប្រហាររបស់បណ្តាញនេះ។
នៅពេលនេះក្រុមនេះត្រូវដឹកនាំដោយកូនគាត់ឈ្មោះ Sirajuddin Haqqani ដែលជាបុរសមានឋានៈទីពីរនៅក្នុងចំណោមពួកអ្នកដឹកនាំតាលីបង់អាហ្វហ្គានីស្ថាននៅបន្ទាប់ពីមេដឹកនាំរបស់ពួកគេគឺ Mawlawi Hibatullah Akhundzada។ គេមានជំនឿជាទូទៅថាគាត់ជាជនដែលដឹកនាំកិច្ចខិតខំប្រឹងប្រែងខាងយោធាប្រឆាំងនិងកងកម្លាំងរបស់អង្គការអូតង់ និងរដ្ឋាភិបាលអាហ្វហ្គានីស្ថាន៕
© រក្សាសិទ្ធិដោយ thmeythmey.com
