កីឡាជាតិ
ជាតិ
Honda៖ «ខ្ញុំចង់ផ្លាស់ប្តូរកីឡាបាល់ទាត់កម្ពុជា ប៉ុន្តែមិនងាយស្រួលទេ» Honda កំពុងឆ្លើយសំណួរអ្នកកាសែតខ្មែរក្រោយបញ្ចប់ការហ្វឹកហាត់ក្រុមជម្រើសជាតិកម្ពុជានាកីឡដ្ឋានជាតិ
× លោក Keisuke Honda បានដឹកនាំការហ្វឹកហាត់លើកដំបូង ជាមួយក្រុមជម្រើសជាតិកម្ពុជាក្នុងនាមជាអ្នកចាត់ការទូទៅថ្មី នៅថ្ងៃទី៤ ខែកញ្ញា នាពហុកីឡដ្ឋានជាតិអូឡាំពិក។ ក្រោយបញ្ចប់ការហ្វឹកហាត់ និងបានមើលជើងកីឡាករមួយចំនួន សមាជិកក្រុម Melbourne នៃលីគកំពូលអូស្ត្រាលី ថាខ្លួននឹងផ្លាស់ប្តូរកីឡាបាល់ទាត់កម្ពុជានៅពេលនេះ ទោះវាពិបាកក៏ដោយ។
សមាជិកក្រុមជម្រើសជាតិជប៉ុនវ័យ៣២ឆ្នាំ បច្ចុប្បន្នជាកីឡាកររបស់ក្លិប Melbourne Victory នៃក្របខណ្ឌ A-League ផងនោះ បានធ្វើដំណើរមកកាន់ទឹកដីកម្ពុជាកាលពីថ្ងៃទី៣ ខែកញ្ញា ដើម្បីកោះហៅកីឡាករ២៣រូប របស់ក្រុមរហស្សនាមគោព្រៃកម្ពុជា ហ្វឹកហាត់ត្រៀមទទួលភ្ញៀវម៉ាឡេស៊ី សម្រាប់ជំនួបមិត្តភាពអន្តរជាតិនាថ្ងៃទី១០ ខែកញ្ញា ខាងមុខ។
បន្ទាប់ពីការហ្វឹកហាត់លើកដំបូងរបស់ខ្លួន ជាមួយក្រុមជម្រើសជាតិ Honda បានបញ្ជាក់ពីផែនការរបស់គេក្នុងការ«ជួសជុល និងកែលម្អក្រុម»សម្រាប់ការប្រកួតលើទីលាន។
«ខ្ញុំចង់រួមចំណែករាល់បទពិសោធន៍ទាំងអស់របស់ខ្ញុំ ជូនដល់ក្រុមជម្រើសជាតិកម្ពុជា។ បេសកកម្មរបស់ខ្ញុំ គឺចង់ផ្លាស់ប្តូរកីឡាបាល់ទាត់កម្ពុជានាពេលបច្ចុប្បន្ននេះ ... ប៉ុន្តែជាការពិតវាមិនងាយស្រួលនោះទេ»។ នេះជាការលើកឡើងរបស់អតីតខ្សែប្រយុទ្ធ AC Milan នៅចំពោះមុខអ្នកកាសែតខ្មែរជាច្រើននាក់ នៅក្រោយបញ្ចប់ការហ្វឹកហាត់នៅកីឡដ្ឋានជាតិ។
លោក Honda ដែលជាអ្នកចាត់ការទូទៅស្ម័គ្រចិត្ត ដោយមិនគិតប្រាក់ឈ្នួលសម្រាប់ក្រុមជម្រើសជាតិកម្ពុជា មិនមានសុទិដ្ឋិនិយមអំពីឱកាសរបស់ក្រុមកម្ពុជា ក្រោមការដឹកនាំរបស់ខ្លួនសម្រាប់ការប្រកួតទល់នឹងក្រុមម៉ាឡេស៊ី នៅសប្តាហ៍ក្រោយឡើយ។
«វានឹងក្លាយជាការប្រកួតដ៏តានតឹងមួយ ខណៈម៉ាឡេស៊ីជាក្រុមខ្លាំង និងល្អណាស់»។ Honda និយាយបែបនេះ៕
Tag:
បាល់ទាត់
Keisuke Honda
© រក្សាសិទ្ធិដោយ thmeythmey.com