ភ្នំពេញ៖ សារព័ត៌មានថ្មីៗ បានបើកវគ្គបណ្ដុះបណ្តាលមួយដល់យុវជនចំនួន១០នាក់ ដែលមកពីបណ្ដារាជធានី និងខេត្តមួយចំនួនក្នុងប្រទេសកម្ពុជា។ វគ្គបណ្ដុះបណ្តាលនេះផ្តោតសំខាន់លើ របៀប សរសេរ និង របៀប ធ្វើ សេចក្តីរាយការណ៍ អំពី វិស័យ កសិកម្ម បរិស្ថាន ទេសចរណ៍ និង ជំនួញ ខ្នាតតូច នៅតាម បណ្តា ខេត្ត ក្រុង ទាំង ២៥ នៃ ព្រះរាជាណាចក្រ កម្ពុជា ។ សិក្ខាកាមដែលចូលរួម ភាគច្រើនជានិស្សិត កំពុង សិក្សាថ្នាក់ មហាវិទ្យាល័យ និងមិនធ្លាប់ទទួលបានការបណ្ដុះបណ្តាលជំនាញសារព័ត៌មានពីមុន។ សម្រាប់ពួកគេ នេះជាការចំណេះដឹងថ្មី និងបានធ្វើឱ្យពួកគេដឹងថា ការសរសេរព័ត៌មានដែលល្អបាន មិនមែនជារឿង ងាយស្រួលឡើយ។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកស្រី អ៊ីសា រ៉ហានី ដូចតទៅ៖
យុវនិស្សិត១០នាក់ មកពី តាម បណ្តា ខេត្ត និងរាជធានី បានចូលរួមក្នុងវគ្គបណ្ដុះបណ្តាលសរសេរអត្ថបទកាសែត រយៈពេលពេញមួយសប្ដាហ៍ដែលរៀបចំដោយសារព័ត៌មានអេឡិចត្រូនិកថ្មីៗ។ វគ្គបណ្ដុះបណ្តាលត្រូវបានរៀបចំនៅក្រុមហ៊ុនស្តារអូតូ ខេមបូឌា។
យុវជន ប៉ាន់ បូនី ដែលចូលរួមក្នុងវគ្គបណ្ដុះបណ្ដាលខាងលើ បាននិយាយថា វាជាបទពិសោធន៍ថ្មីសម្រាប់រូបគេ ដែលមិនធ្លាប់បានឆ្លងកាត់ការសិក្សាលើជំនាញមួយនេះ។ បូនីបន្តថា ពីមុនគេជាអ្នកថតវីដេអូនៅសារព័ត៌មានថ្មីៗ ដោយមិនបានខ្វល់ពីអ្វីជាព័ត៌មានឡើយ។ វគ្គបណ្ដុះបណ្តាលនេះ គឺជាទុនមួយសម្រាប់ឱ្យខ្លួនគេយកទៅបន្ថែមលើការងារបច្ចុប្បន្ន និងអភិវឌ្ឍន៍ជាអ្នកសារព័ត៌មានមួយរូបនៅថ្ងៃមុខ។
ខុសពីមុន ដែលធ្លាប់មើលរំលងពីអ្វីដែលជាព័ត៌មាន បូនី បានស្វែងយល់ពីចំណុចមួយចំនួនដែលគេមិនបានដឹងថាជាព័ត៌មាន។ ក្រោយទទួលបានការបណ្ដុះបណ្តាលជាមួយគ្រូសារព័ត៌មានបារាំង និងគ្រូខ្មែរ ពេញមួយសប្ដាហ៍នេះ បូនី បានផ្លាស់ប្ដូរការគិតខ្លះៗ ដែលធ្លាប់យល់ថា សារព័ត៌មានពិបាក មិនដឹងថាការសរសេរដោយរបៀបណា។
កញ្ញា តុង ស្រីល័ក្ខ ជាយុវនារី មកពីខេត្ត កំពង់ចាម។ ស្រីល័ក្ខ ជាយុវជនស្ម័គ្រចិត្តរបស់អង្គការតម្លាភាពកម្ពុជា ដែលធ្លាប់បានធ្វើការងារសង្គមច្រើនដែរនាពេលកន្លងមក។ នាងយល់ថា ខ្លួនក៏មាននិស្ស័យ និងស្រឡាញ់ការងារទាក់ទងនឹងព័ត៌មាននេះដែរ ប៉ុន្តែយល់ខុសថា ជំនាញជាពិធីករ និងសារព័ត៌មានគឺតែមួយ។
ខុសពីយុវជន បូនី ពីមុនទទួលបានការបណ្ដុះបណ្តាល ស្រីល័ក្ខ យល់ថា សារព័ត៌មានជាកិច្ចការដែលងាយស្រួលធ្វើ តែតាមពិតវាមានរូបមន្ដត្រឹមត្រូវ មិនមែនចេះតែសរសេរៗឡើយ។ ស្រីល័ក្ខ មានជំនឿក្នុងខ្លួនថា គេនឹងអាចក្លាយជាអ្នកកាសែតដ៏ល្អមួយរូប ដែលអាចផលិតព័ត៌មានពីវិស័យកសិកម្ម និងទេសចរណ៍ក្នុងខេត្ត កំពង់ចាម ឱ្យប្រជាពលរដ្ឋផ្សេងទៀតបានដឹងផងដែរ។
រីឯ យុវជន ណាក់ ធីនុង ដែលនិស្សិតឆ្នាំទី៤ ផ្នែកកសិកម្ម មកពីខេត្ត ព្រៃវែង វិញ យុវជនរូបនេះបានចាត់ទុកវគ្គបណ្ដុះបណ្តាលនេះ ថាជាសុបិនដែលបានក្លាយជាការពិត។ ធីនុង ចង់ក្លាយជាអ្នកកាសែតយូរណាស់មកហើយ។ ធីនុង បញ្ជាក់ថា ដោយសារតែរូបគេក៏ចូលចិត្តផ្នែកកសិកម្មដែរនោះ ការហ្វឹកហាត់សរសេរអត្ថបទសារព័ត៌មាននេះ គឺជាឱកាសមួយដ៏ល្អសម្រាប់គេ ក្នុងការរួមចំណែកផ្សព្វផ្សាយវិស័យកសិកម្មក្នុងខេត្តព្រៃវែង ដើម្បីឱ្យប្រជាពលរដ្ឋដទៃទៀតបានឃើញពីសក្កានុពលនៃខេត្ដរបស់ខ្លួន។
ចំណែក ចន្ទ្រា ជាយុវជនមកពីខេត្ត បាត់ដំបង។ ជានិស្សិតឆ្នាំទី៤ ផ្នែកច្បាប់ និងមានចំណូលចិត្តតាមដានព័ត៌មានមួយចំនួនផងដែរ ចន្ទ្រា ចូលចិត្តស្ដាប់ព័ត៌មានជាវិទ្យុ និងទូរទស្សន៍ តែមិនធ្លាប់បានអានជាអត្ថបទព័ត៌មានឡើយ។ មិនខុសពីយុវជនដទៃទៀត សារព័ត៌មានជាការងារថ្មី ដែលនាងមិនធ្លាប់ធ្វើពីមុន តែចន្ទ្រា បានតាំងចិត្តខ្ពស់ចំពោះការងារនេះ ដើម្បីរួមចំណែកជួយសហគមន៍របស់គេ។