ប៉ូលិសរំពឹងបានលទ្ធផលដូចឆ្នាំ២០១៤ ពេលប៉ះទ័ពនៅវគ្គផ្តាច់ព្រ័ត្រពានសម្តេច ហ៊ុន សែន

កីឡាជាតិ

ជាតិ

ប៉ូលិសរំពឹងបានលទ្ធផលដូចឆ្នាំ២០១៤ ពេលប៉ះទ័ពនៅវគ្គផ្តាច់ព្រ័ត្រពានសម្តេច ហ៊ុន សែន

08, Sep 2018 , 6:39 pm

រូបភាព

សារ៉េត ស៊ីដន

ដោយ:

លោក សារ៉េត ស៊ីដន គ្រូបង្វឹកក្រុមអគ្គស្នងការនគរបាលជាតិ(ប៉ូលិស)រំពឹងថា ក្រុមលោកនឹងទទួលបានលទ្ធផលល្អដូចកាលឆ្នាំ២០១៤ ពេលប៉ះក្រុមក្រសួងការពារជាតិ(ទ័ព)នៅវគ្គផ្តាច់ព្រ័ត្រពានរង្វាន់សម្តេច ហ៊ុន សែន។ ដើម្បីត្រៀមការប្រកួតមួយនេះកីឡាករអគ្គស្នងការនគរបាលជាតិ នឹងមានកម្មវិធីប្រមូលផ្តុំហ្វឹកហាត់បន្ថែមលក្ខណៈពិសេសដាច់ដោយឡែកថែមទៀតផង។

ក្រោយទម្លាក់ក្រុមអង្គរថាយហ្គឺរជាមួយជ័យជម្នះ ២-០ នៅវគ្គពាក់កណ្តាលផ្តាច់ព្រ័ត្រ ក្រុមអគ្គស្នងការនគរបាលជាតិមានជំនឿថា ពួកគេនឹងបន្តយកឈ្នះក្រសួងការពារជាតិនាជំនួបវគ្គផ្តាច់ព្រ័ត្រ ដើម្បីគ្រងជើងឯកពានរង្វាន់សម្តេច ហ៊ុន សែន ជាលើកទី២។ ការយល់ចិត្ត និងភាពស៊ីចង្វាក់គ្នាក្នុងការលេងជាក្រុម អាចជាកត្តា ដែលជំរុញឲ្យក្រុមនេះមានទំនុកចិត្តខ្ពស់បែបនេះ។

លោក សារ៉េត ស៊ីដន គ្រូបង្វឹកក្រុមអគ្គស្នងការនគរបាលជាតិបាននិយាយថា ក្រៅពីកាលវិភាគហ្វឹកហាត់ប្រចាំថ្ងៃ លោកនឹងមានការប្រមូលផ្តុំហ្វឹកហាត់លក្ខណៈពិសេសក្នុងការពង្រឹងសមត្ថភាពដាច់ដោយឡែកមួយទៀត ដើម្បីត្រៀមការប្រកួតដ៏សំខាន់មួយនេះ។ លោកបានអះអាងថា ការប្រមូលផ្តុំហ្វឹកហាត់លក្ខណៈពិសេសនេះហើយ ដែលជួយឲ្យក្រុមប៉ូលិសអាចយកឈ្នះក្រុមអង្គរថាយហ្គឺរ នៅវគ្គពាក់កណ្តាលផ្តាច់ព្រ័ត្រ។

«នៅក្នុងពានរង្វាន់លីគយើងនៅបន្តការប្រឹងប្រែង ហើយនៅពានរង្វាន់សម្តេច ហ៊ុន សែន យើងរឹតតែប្រឹងប្រែងឲ្យកាន់ខ្លាំងថែមទៀត។ យើងនឹងមានផែនការហ្វឹកហាត់បន្ថែមជាពិសេសមួយ ដើម្បីត្រៀមប្រជែងជាមួយក្រសួងការពារជាតិ។ យើងសង្ឃឹមថា យើងនឹងទទួលបានលទ្ធផលល្អដូចឆ្នាំ២០១៤ ដែលយើងជាម្ចាស់ជើងឯកពានរង្វាន់សម្តេច ហ៊ុន សែន»។ នេះជាការបញ្ជាក់របស់លោក សារ៉េត ស៊ីដន។

ការប្រកួតវគ្គផ្តាច់ព្រ័ត្ររវាងក្រុមអគ្គស្នងការនគរបាលជាតិជាមួយក្រសួងការពារជាតិ ធ្វើឡើងនៅថ្ងៃទី៦ ខែតុលា ឆ្នាំ២០១៨ នាពហុកីឡដ្ឋានជាតិ។ មុនឡើងមកគ្នានៅវគ្គនេះ អគ្គស្នងការនគរបាលជាតិបានទម្លាក់អង្គរថាយហ្គឺរជាមួយជ័យជម្នះ ២-០ នាជំនួបវគ្គពាក់កណ្តាលផ្តាច់ព្រ័ត្រ ខណៈក្រសួងការពារជាតិទម្លាក់ណាហ្គាវើលក្នុងលទ្ធផល ៣-១។ ក្រៅពីជំនួបនេះ ក៏មានការប្រកួតដណ្តើមចំណាត់ថ្នាក់លេខ៣រវាងណាហ្គាវើលជាមួយអង្គរថាយហ្គឺរនៅថ្ងៃនោះផងដែរ៕