កីឡាជាតិ
ជាតិ
៤៥ឆ្នាំហើយដែលកម្ពុជាលេងមិនឈ្នះម៉ាឡេស៊ី តើ Honda អាចជួយប្តូរកំណត់ត្រាបានដែរទេ?
គ្រូបង្វឹកកម្ពុជា និងម៉ាឡេស៊ីនាសន្និសីទសារព័ត៌មាន។ រូបថត FFC
×![]()
ក្រុមកីឡាករបាល់ទាត់ជម្រើសជាតិកម្ពុជា ស្វាគមន៍ក្រុមជម្រើសជាតិម៉ាឡេស៊ី នាវេលាម៉ោង៦ និង៣០នាទីល្ងាចនេះ នៅពហុកីឡដ្ឋានជាតិអូឡាំពិក។ នេះជាដំណើរស្វែងរកជ័យជម្នះលើកដំបូងរបស់កម្ពុជា បើគិតចាប់តាំងពីឆ្នាំ១៩៧៣មក។ នាជំនួប១១លើកកន្លងមក កម្ពុជាចាញ់១០លើក និងស្មើ១លើកកាលពីឆ្នាំ២០០០។ 
ជំនួបមិត្តភាពអន្តរជាតិជាមួយម៉ាឡេស៊ីនាល្ងាចនេះ មិនត្រឹមតែជាការដឹកនាំលើកដំបូងរបស់លោក Keisuke Honda ក្នុងតួនាទីជាអ្នកចាត់ការទួទៅក្រុមកម្ពុជានោះឡើយ ប៉ុន្តែវាជាការព្យាយាមបំបែកកំណត់ត្រាផងដែរសម្រាប់ក្រុមគោព្រៃមួយនេះ ដែលបានខកខានជ័យជម្នះលើក្រុមរួមតំបន់អស់រយៈពេល៤៥ឆ្នាំ។
អតីតក្រុមសាធារណរដ្ឋខ្មែរ បានឈ្នះម៉ាឡេស៊ី ២-០ នៅវគ្គពាក់កណ្តាលផ្តាច់ព្រ័ត្រនៃពានរង្វាន់ King Cup នៅក្រុងសេអ៊ូល ប្រទេសកូរ៉េខាងត្បូង កាលពីថ្ងៃទី២៨ ខែកញ្ញា ឆ្នាំ១៩៧៣ ដែលសម្រេចបានដោយកីឡាករ សុខ ស៊ុនហ៊ាន និងឌឿ សុខុម ប៉ុន្តែសម្រាប់ជំនួប១១លើកជាបន្តបន្ទាប់ទៀត គ្មានឡើយជ័យជម្នះសម្រាប់កម្ពុជា។
នាជំនួបចុងក្រោយ កម្ពុជាបានចាញ់ម៉ាឡេស៊ី ៣-២ ក្នុងព្រឹត្តិការណ៍ AFF Championship កាលពីឆ្នាំ២០១៦ នៅក្រុងយ៉ាំងហ្គោន ទឹកដីមីយ៉ាន់ម៉ា។ ចាន់ វឌ្ឍនាកា ជាអ្នកស៊ុតបាល់បញ្ចូលទីទាំងពីរគ្រាប់ឲ្យកម្ពុជានាពេលនោះ ប៉ុន្តែដោយសារបញ្ហារបួស ខ្សែប្រយុទ្ធដែលធ្លាប់ប្រកបអាជីពនៅម៉ាឡេស៊ីរូបនេះ មិនស្ថិតក្នុងជម្រើសរបស់លោក Honda Keisuke នោះឡើយ។
លោក Tan Cheng Hoe គ្រូបង្វឹកក្រុមជម្រើសជាតិម៉ាឡេស៊ី ដែលទើបបរាជ័យក្រោមថ្វីជើងក្រុមឆាយនីសតៃប៉ិ ២-០ នាជំនួបមិត្តភាពកាលពីពេលថ្មីៗបានបញ្ជាក់ថា ម៉ាឡេស៊ីអាចនឹងជួបការលំបាកខ្លាំងនៅល្ងាចនេះ ដោយសារកីឡាករកម្ពុជាម្នាក់ៗ ត្រូវខិតខំប្រឹងប្រែងឲ្យអស់ពីសមត្ថភាពក្នុងការស្វែងរកលទ្ធផលល្អ ដើម្បីផ្គាប់ចិត្តអ្នកគាំទ្រ និងគ្រូបង្វឹកថ្មី។
«យើងធ្លាប់ជួបកម្ពុជាជាច្រើនលើករួចមកហើយ មិនមែនជាលើកទី១នោះទេ ហើយប្រកួតទាំងនោះ យើងមិនមែនអាចយកឈ្នះកម្ពុជាដោយងាយស្រួលនោះទេ។ សម្រាប់ការប្រកួតថ្ងៃនេះ កម្ពុជាជាក្រុមមានកីឡាករពោរពេញដោយឆន្ទៈក្នុងការលេង ព្រោះពួកគាត់នឹងបញ្ចេញសមត្ថភាពឲ្យលើសពី១០០ភាគរយ ដើម្បីផ្គាប់ចិត្តអ្នកគាទ្រ និងគ្រូបង្វឹកថ្មីរបស់ពួកគេ»។ នេះជាការបញ្ជាក់របស់លោក Tan Cheng Hoe។
ទន្ទឹមនឹងសរសើរកម្ពុជាមានកីឡាករល្អៗច្រើន កីឡាករ Muhammad Nazmi Faiz ប្រធានក្រុមម៉ាឡេស៊ីបានប្តេជ្ញាថា រូបគេនឹងប្រឹងប្រែងឲ្យអស់ពីសមត្ថភាព ពិសេសរៀបចំយុទ្ធសាស្ត្រប្រយុទ្ធ ដើម្បីយកឈ្នះកម្ពុជានៅល្ងាចនេះ។ ប្រធានក្រុមរូបនេះមានការភ្ញាក់ផ្អើលយ៉ាងខ្លាំងសម្រាប់វត្តមានកីឡាករ Keisuke Honda នៅកម្ពុជា ហើយគេជឿជាក់ថា កម្ពុជានឹងមានទម្រង់លេងថ្មីប្លែក ដែលអាចឲ្យរូបគេរៀនសូត្របានច្រើនពីជំនួបមិត្តភាពនេះ។
លោក Keisuke Honda អ្នកចាត់ការទូទៅក្រុមជម្រើសជាតិកម្ពុជារំពឹងថា ក្រោមការដឹកនាំរបស់ខ្លួនកម្ពុជានឹងធ្វើបានល្អក្នុងជំនួប ដែលលោកចាត់ទុកថាតានតឹងមួយនេះ។ ជាមួយគ្នានេះ កីឡាករ គួច សុកុម្ភៈ ដែលជាប្រធានក្រុមបានអះអាងថា កម្ពុជាអាចធ្វើបានល្អពី៧០ទៅ៨០ភាគរយ ក្រោយប្រមូលផ្តុំហ្វឹកហាត់ជាមួយគ្នាមួយរយៈពេលខ្លីកន្លងមកនេះ។ រូបគេប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាព ពិសេសធ្វើតាមអ្វី ដែលគ្រូបានរៀបចំ៕
Tag:
បាល់ទាត់
Keisuke Honda
Tan Cheng Hoe
ជម្រើសជាតិកម្ពុជា
© រក្សាសិទ្ធិដោយ thmeythmey.com
