អន្តរជាតិ
នាយករដ្ឋមន្ត្រីថៃ ព្រមានរឿងទិញសន្លឹកឆ្នោត ដែលជាឫសគល់នៃអំពើពុករលួយក្នុងប្រព័ន្ធនយោបាយ
× ប្រមុខរបបសឹកថៃ លោកឧត្តមសេនីយ៍ ប្រាយុទ្ធ ចន្ទ អូចា បានព្រមានផង និងក្រើនរម្លឹកផងដល់ប្រជាពលរដ្ឋកុំឲ្យអ្នកនយោបាយទិញឆន្ទៈ ឬសន្លឹកឆ្នោតបានឲ្យទាល់តែសោះ ខណៈការបោះឆ្នោតជាតិថៃ ក៏កាន់តែខិតជិតមកដល់ផងដែរនោះ។ ប្រមុខរបបសឹកថៃ មើលឃើញសកម្មភាពបែបនេះ ថាជាឬសគល់មួយ នៃកសាងអំពើពុករលួយនៅក្នុងរដ្ឋាភិបាល។
លោកនាយករដ្ឋមន្ត្រី ប្រាយុទ្ធ ចន្ទ អូចា នៅថ្ងៃ៧ កញ្ញា បានទទូចឲ្យប្រជាពលរដ្ឋទៅបោះឆ្នោតដើម្បីការផ្លាស់ប្តូរ និងជួយធានាថារាជាណាចក្រមួយនេះ អាចមានរដ្ឋាភិបាល ដែលមានអភិបាលកិច្ចល្អ ក្រោយពីទទួលបានការគាំទ្រតាមរយៈសំឡេងឆ្នោតរបស់ប្រជាពលរដ្ឋហើយនោះ។ នេះបើយោងតាមការចុះផ្សាយរបស់សារព័ត៌មានថៃ The Nation។
លោកនាយករដ្ឋមន្ត្រី ក៏បានដាស់តឿនដល់ប្រជាពលរដ្ឋក្នុងការសម្រេចចិត្តលើជោគវាសនាប្រទេសជាតិ។ « ប្រសិនបើអ្នកបោះឆ្នោត តាមទម្លាប់ពីមុន អ្នកនឹងទទួលបានលទ្ធផលដដែល (លោកសំដៅលើការផ្ទុះបាតុកម្មធ្វើឲ្យប្រទេសវឹកវរដូចនៅអាណត្តិមុន)។ គ្រប់យ៉ាង ត្រូវតែមានការផ្លាស់ប្តូរ។» លោក បញ្ជាក់យ៉ាងដូច្នេះ។
បន្ថែមពីនេះ លោកនាយករដ្ឋមន្ត្រី ក៏ក្រើនរម្លឹកដល់ប្រជាពលរដ្ឋកុំឲ្យអ្នកនយោបាយទិញឆន្ទៈបាន។ លោក អះអាងថា ប្រជាពលរដ្ឋមានសិទ្ធិសម្រាប់ការបោះឆ្នោតលើមនុស្ស ឬបក្សដែលខ្លួនស្រលាញ់ ក៏ប៉ុន្តែប្រសិនអ្នកបោះឆ្នោតឲ្យអ្នកដែលផ្តល់ប្រាក់ដល់អ្នកដើម្បីជាថ្នូរ នោះនាពេលអនាគត ពួកគេ នឹងព្យាយាមប្រមូលប្រាក់មកវិញហើយនៅពេលដែលពួកគេឡើងកាន់តំណែង។
គួរកត់សម្គាល់នោះ លោកនាយករដ្ឋមន្ត្រី បានទាញចំណាប់អារម្មណ៍ប្រជាពលរដ្ឋឲ្យមើលពីការបំផ្លាញសណ្តាប់ធ្នាប់ថៃដោយអ្នកនយោបាយក្នុងរយៈពេលមុនពេលលោក ឡើងកាន់តំណែង។ លោកនាយករដ្ឋមន្ត្រី លើកឡើងថា រាជាណាចក្រថៃ បានខ្ជះខ្ជាយពេលអស់ពីរទសវត្សរ៍មកហើយដោយសារតែជម្លោះនយោបាយ ដែលបញ្ហាទាំងនេះ ក៏បានរាំងខ្ទប់សេដ្ឋកិច្ចជាតិផងដែរ។
សូមជម្រាបផងដែរថា លោកឧត្តមសេនីយ៍ប្រាយុទ្ធ ចន្ទ អូចា បានឡើងកាន់តំណែងជានាយករដ្ឋមន្ត្រីថៃ បន្ទាប់ពីរូបលោក បានដឹកនាំរដ្ឋប្រហារទម្លាក់អតីតនាយករដ្ឋមន្ត្រីថៃ យីងឡាក់ ស៊ីនណាវ៉ាត់ នៅថ្ងៃ២២ ឧសភា ឆ្នាំ២០១៤។ ការឡើងកាន់អំណាចជាប្រមុខរាជរដ្ឋាភិបាលបែបនេះ ត្រូវបានលោកឧត្តមសេនីយ៍ ពន្យល់ថា ដើម្បីស្តារសណ្តាប់ សន្តិសុខ និងសន្តិភាពថៃឡើងវិញ បន្ទាប់ត្រូវបានអ្នកនយោបាយថៃ ធ្វើឲ្យអាណាធិបតេយ្យ។
តាមការប្រកាសរបស់លោកនាយករដ្ឋមន្ត្រី ប្រាយុទ្ធ នាពេលថ្មីៗនេះ ថៃ នឹងរៀបចំឲ្យមានការបោះឆ្នោតជាតិដើម្បីជ្រើសរើសមេដឹកនាំប្រជាធិបតេយ្យនៅដើមឆ្នាំ២០១៩ខាងមុខនេះហើយ។ បើមិនមានការពន្យារពេលក្រោមហេតុផលនានារបស់លោកនាយករដ្ឋមន្ត្រីដូចពេលមុនៗនោះទេ ការបោះឆ្នោតនេះ នឹងក្លាយជាការបោះឆ្នោតលើកដំបូងក្នុងរយៈពេលប្រមាណពីរទសវត្សរ៍ចុងក្រោយ ដែលអវត្តមានអ្នកនយោបាយដ៏មានប្រជាប្រិយភាពត្រកូល ស៊ីនណាវ៉ាត់៕
© រក្សាសិទ្ធិដោយ thmeythmey.com