អន្តរជាតិ
ប្រជាជនអត់ឃ្លានពិភពលោកកើនដល់ ៨២១លាននាក់ ឯការប្រែប្រួលអាកាសធាតុ និងជម្លោះជាកត្តាជំរុញធំ
× របាយការណ៍អង្គការសហប្រជាជាតិស្តីពីភាពអត់ឃ្លានពិភពលោក (Global Hunger) ដែលចេញផ្សាយថ្ងៃ ១១ ខែកញ្ញាបង្ហាញថា ចំនួនប្រជាជនអត់ឃ្លាននៅលើពិភពលោកបន្តកើនឡើងគួរឲ្យព្រួយបារម្ភចាប់ពីឆ្នាំ ២០១៦ដោយកើនដល់ជាង ៨០០លាននាក់ទូទាំងពិភពលោក។ ហេតុផលចម្បងដែលបណ្តាលឲ្យចំនួនប្រជាជនអត់ឃ្លានកើនឡើងគឺប្រែប្រួលអាកាសធាតុ បញ្ហាសេដ្ឋកិច្ច និងជម្លោះប្រដាប់អាវុធ។
ពិភពលោកទាំងមូលកំពុងប្រឈមបញ្ហាដោយសារប្រជាជនពលរដ្ឋកាន់តែច្រើនឡើងធ្លាក់ក្នុងស្ថានភាពអត់ឃ្លាន។ ខ្លះគ្មានអាហារបរិភោគច្រើនថ្ងៃ ឯខ្លះទៀតមានព្រឹកខ្វះល្ងាច និងខ្លះទៀតមានបរិភោគដែរប៉ុន្តែខ្វះខាតអាហារូបត្ថម្ភទៅវិញ។
បើតាមរបាយការណ៍ប្រចាំឆ្នាំស្តីពី«ស្ថានភាពសន្តិសុខស្បៀង និងអាហារូបត្ថម្ភ» ប្រចាំឆ្នាំរបស់អង្គការសហប្រជាតិ ប្រជាជនដែលអត់ឃ្លានទូទាំងពិភពលោកបានកើនឡើងពី ៨១៥ លាននាក់ក្នុងឆ្នាំ ២០១៦ រហូតដល់ ៨២១ លាននាក់ក្នុងឆ្នាំ ២០១៧ឯណោះ។ ក្នុងចំណោមនោះ ប្រជាជនរហូតដល់ ៥១៥ លាននាក់ឯណោះរស់នៅទ្វីបអាស៊ី។
របាយការណ៍ដដែលនោះរកឃើញថា មូលហេតុចម្បងបំផុតដែលជំរុញឲ្យចំនួនប្រជាជនអត់ឃ្លានកើនឡើងទូទាំងពិភពលោកគឺ ការប្រែប្រួលនៃអាកាសធាតុដែលមានដូចជា គ្រោះរាំងស្ងួត ទឹកជំនន់ ព្យុះ និងរលកកម្តៅជាដើម រួមជាមួយកំណើនយឺតយ៉ាវនៃសេដ្ឋកិច្ច និងជម្លោះប្រដាប់អាវុធផងដែរ។
តាមពិតទៅ អាកាសធាតុមានឥទ្ធិពលលើបរិមាណទឹកភ្លៀងដែលធ្លាក់ក្នុងរដូវធ្វើកសិកម្ម ហើយគ្រោះមហន្តរាយដូចបានរៀបរាប់ខាងលើមានព្យុះភ្លៀង ទឹកជំនន់ និងរាំងស្ងួតនោះធ្វើឲ្យសង្វាក់ផលិតកម្មក្នុងវិស័យកសិកម្មមានការដាំដុះដំណាំកិសកម្មជាដើមនោះប្រឈមនឹងការកាត់ផ្តាច់ និងកើតឡើងបញ្ហាអសន្តិសុខស្បៀង។
របាយការណ៍មួយនេះបង្ហាញឲ្យឃើញថា គោលដៅលុបបំបាត់ការអត់ឃ្លាន និងកង្វះអាហារូបត្ថម្ភត្រឹមឆ្នាំ ២០៣០ ស្របតាមគោលដៅអភិវឌ្ឍប្រកបដោយចីរភាព (SDGs) ពិបាកនឹងទទួលជោគជ័យណាស់ បើសិនជាមិនមានការពង្រឹងចំណាត់ការដើម្បីដោះស្រាយបញ្ហាទាំងនេះ។
ជុំវិញបញ្ហានេះ ប្រមុខទីភ្នាក់ងារជំនាញអង្គការសហប្រជាជាតិមានដូចជា អង្គការស្បៀងអាហារ និងកសិកម្ម (FAO) , អង្គការសុខភាពពិភពលោក (WHO) ក៏ដូចជា មូលនិធិសហប្រជាជាតិ ដើម្បីកុមារ (UNICEF) បានទទូចឲ្យបណ្តាភាគីពាក់ព័ន្ធខិតខំបង្កើនសកម្មភាពបន្ថែមដើម្បីសម្រេចគោលដៅលុបបំបាត់ភាពអត់ឃ្លាននិងកង្វះអាហារូបត្ថម្ភ។ មេដឹកនាំទាំងនេះអះអាងថា វាចាំបាច់ត្រូវមានការសហការគ្នាពង្រឹងសមត្ថភាពនៃភាពអត់ធន់ និងការសម្របខ្លួននៃប្រព័ន្ធសង្វាក់ផលិតកម្មចំណីអាហារ ក្នុងពេលដែលការប្រែប្រួលអាកាសធាតុបន្តកើតឡើងនេះ៕
Tag:
ភាពអត់ឃ្លានពិភពលោក
ប្រែប្រួលអាកាសធាតុ
ជម្លោះប្រដាប់អាវុធ
© រក្សាសិទ្ធិដោយ thmeythmey.com