លោក ពូទីន ស្នើចុះកិច្ចព្រមព្រៀងសន្តិភាពជាមួយជប៉ុន ដោយគ្មានលក្ខខណ្ឌ

អន្តរជាតិ

លោក ពូទីន ស្នើចុះកិច្ចព្រមព្រៀងសន្តិភាពជាមួយជប៉ុន ដោយគ្មានលក្ខខណ្ឌ

12, Sep 2018 , 4:08 pm

រូបភាព

រូបភាព AFP

ដោយ: តន ចាន់រិទ្ធារ៉ា

នៅថ្ងៃទី១២ ខែកញ្ញា ប្រធានាធិបតីរុស្ស៊ី វ្ល៉ាឌីមៀ ពូទីន បានស្នើទៅកាន់ជប៉ុនឲ្យបញ្ចប់ជម្លោះរវាងប្រទេសទាំងពីរនៅត្រឹមចុងឆ្នាំ២០១៨ ។ រុស្ស៊ី និងជប៉ុន នៅមានជម្លោះទឹកដីនៅប្រជុំកោះគូរីល ដែលគ្រប់គ្រងរុស្ស៊ី តែជប៉ុនទាមទារធ្វើម្ចាស់។ ដោយសារជម្លោះទឹកដីនេះ ទំនាក់ទំនងរុស្ស៊ី និងជប៉ុន មិនសូវល្អប្រសើរឡើយ ហើយក៏ជាឧបសគ្គដល់ការចុះកិច្ចព្រមព្រៀងសន្តិភាពទៅទៀត។ យ៉ាងណា លោក ពូទីន បានប្រកាសច្បាស់ហើយថា រុស្ស៊ីចង់បញ្ចប់បញ្ហាដោយគ្មានលក្ខខណ្ឌអ្វីជាមុនឡើយ។

ប្រជុំកោះគូរីលហៅតាមរុស្ស៊ី ឬដែលត្រូវជប៉ុនឲ្យឈ្មោះថា ដែនដីខាងជើង គឺជាចំណុចស្នូលក្នុងទំនាក់ទំនងរវាងរុស្ស៊ី និងជប៉ុន។ ដោយសារតែការទាមទាររបស់ជប៉ុនលើដែនកោះដែលកំពុងត្រួតត្រាដោយរុស្ស៊ី ភាគីទាំងពីរមិនបានចុះកិច្ចសន្ធិសញ្ញាសន្តិភាពឡើយក្រោយការបញ្ចប់សង្គ្រាមលោកលើកទីពីរក្នុងឆ្នាំ១៩៤៥ ។ ជាង៧០ឆ្នាំនៃការចរចាបញ្ចប់ជម្លោះ គេមិនឃើញមានលទ្ធផលដុំកំភួនអ្វីឡើយលើសំណុំរឿងរ៉ាំរ៉ៃមួយនេះ។

យ៉ាងណាក្ដី នៅថ្ងៃទី១២ ខែកញ្ញា ប្រធានាធិបតីរុស្ស៊ី វ៉ា្លឌីមៀ ពូទីន បានស្នើដោយចំហរទៅកាន់នាយករដ្ឋមន្ត្រីជប៉ុន ស៊ីនហ្សូ អាបេ ឲ្យរុស្ស៊ី និងជប៉ុនចុះកិច្ចព្រមព្រៀងបញ្ចប់ជម្លោះប្រទេសទាំងពីរ។ លោក ពូទីន ស្នើបែបនេះក្នុងកិច្ចប្រជុំវេទិកាសេដ្ឋកិច្ចភាគខាងកើតនៅទីក្រុងវ្ល៉ាឌីវ៉ូស្តុក ដែលនៅមិនឆ្ងាយប៉ុន្មានពីដែនជម្លោះ។ សំណើរបស់លោក ពូទីនក៏ទទួលបានការស្វាគមន៍ពីលោក អាបេ និងមេដឹកនាំផ្សេងទៀត។

យោងតាមទីភ្នាក់ងារព័ត៌មាន AFP លោក ពូទីន និយាយថា៖ យើងព្យាយាមដោះស្រាយបញ្ហាទឹកដី៧០ឆ្នាំមកហើយ។ យើងបានជជែកគ្នាអស់ពេល៧០ឆ្នាំហើយដែរ។ ដល់ពេលបញ្ចប់សន្ធិសញ្ញាសន្តិភាពហើយ ប៉ុន្តែមិនមែនឥឡូវនេះទេ គឺនៅចុងឆ្នាំនេះ ហើយគ្មានលក្ខខណ្ឌទុកមុនអ្វីទាំងអស់។» លោកបន្តថា ការបញ្ចប់ការចរចា នឹងអនុញ្ញាតឲ្យប្រទេសទាំងពីរបន្តដោះស្រាយបញ្ហាទាំងអស់ដែលមិនអាចរកច្រកចេញបាន៧០ឆ្នាំមកនេះ។

តបនឹងសំណើរបស់ប្រធានាធិបតីរុស្ស៊ី លោក អាបេ បានប្រកាសគាំទ្រភ្លាមដែរ។ ចំពោះមេដឹកនាំដែលចូលរួមវេទិកាសេដ្ឋកិច្ចប្រចាំឆ្នាំខាងលើ នាយករដ្ឋមន្ត្រីជប៉ុនបានលើកឡើងពីភាពចាំបាច់ដែលជប៉ុន និងរុស្ស៊ី ត្រូវសម្លឹងទៅមុខ និងការបញ្ចប់ជម្លោះឲ្យបានឆាប់ សំដៅឈានដល់ការចុះសន្ធិសញ្ញាបញ្ចប់ជម្លោះដែលបន្សល់ទុកតាំងពីឆ្នាំ១៩៤៥ មកនោះ។ លោក អាបេ លើកជាសំណួរថា បើមិនដោះស្រាយឥឡូវ តើទុកឲ្យនរណាដោះស្រាយ?

កន្លងមក លោក ពូទីន បានជួបចរចាជាមួយលោក អាបេ ជាច្រើនដើម្បីស្វែងរកដំណោះស្រាយបញ្ចប់ជម្លោះដែនដីលើប្រជុំកោះគូរីល។ ជាមួយនឹងការប្រកាសរបស់លោក ពូទីន ខាងលើនេះ ការចរចារវាងក្រុងមូស្គូ និងក្រុងតូក្យូ ទំនងជាអាចជឿនលឿនទៅមុខបានឆាប់រហ័សជាងមុខមិនខាន។ ប៉ុន្តែកាលពីជំនួបតទល់ជាមួយលោក អាបេ នៅថ្ងៃទី១១ ខែកញ្ញា លោក ពូទីន ក៏ព្រមានថា បញ្ហានេះក៏មិនអាចដោះស្រាយស្រួលៗដែរ៕