លោក អាបេ ត្រៀមធ្វើដំណើរទៅ ចិនខែក្រោយ ស្របពេលទំនាក់ទំនងល្អប្រសើរ

អន្តរជាតិ

លោក អាបេ ត្រៀមធ្វើដំណើរទៅ ចិនខែក្រោយ ស្របពេលទំនាក់ទំនងល្អប្រសើរ

12, Sep 2018 , 10:39 pm

រូបភាព

រូបភាព AFP

ដោយ:

នាយករដ្ឋមន្ត្រីជប៉ុន ស៊ីនហ្សូ អាបេ បាននិយាយនៅថ្ងៃទី១២ កញ្ញាថា រដ្ឋបាលរបស់លោក និងទីក្រុងប៉េកាំង បានយល់ព្រមរៀបចំទស្សនកិច្ចរបស់លោកទៅកាន់ប្រទេសចិន។ ការបញ្ជាក់របស់លោក គឺធ្វើឡើង នៅក្នុងក្រុង Vladivostok ក្រោយពីជំនួបជាមួយប្រធានាធិបតីចិន លោក ស៊ី ជិនភីង។

ពីទឹកដីរុស្ស៊ី នាយករដ្ឋមន្ត្រីជប៉ុន លោក ស៊ីនហ្សូ អាបេ ជួបជាមួយប្រធានាធិបតីចិន ស៊ី ជិនភីង ដែលនេះជាសញ្ញាបង្ហាញពីភាពល្អប្រសើររវាងប្រទេសទាំងពីរ។ លោក អាបេ និយាយថា រូបលោក និងលោក ស៊ី ជិនភីង បានចែករំលែកការយល់ឃើញជាមួយគ្នាថា ជប៉ុន និងចិន ត្រូវរួមចំណែកទទួលខុសត្រូវសម្រាប់ភាពរីកចម្រើន និងសន្តិភាពពិភពលោក ក៏ដូចជាគោលដៅក្នុងការរំសាយអាវុធនុយក្លេអ៊ែររបស់កូរ៉េខាងជើងផងដែរ។ យោងតាមទីភ្នាក់ងារសារព័ត៌មាន Reuters ។

នាយករដ្ឋមន្ត្រីជប៉ុនវ័យ ៦៣ឆ្នាំរូបនេះ បានវិលចូលកាន់តំណែងនៅក្នុងអាណត្តិទី២ កាលពីខែធ្នូ ២០១២ ដោយលោកបានសន្យាដាក់សម្ពាធលើប្រទេសចិន ជុំវិញបញ្ហាជម្លោះដែនអធិបតេយ្យភាពនៅលើកោះតូចមួយក្នុងសមុទ្រចិនខាងកើត។

ប៉ុន្តែភាពតានតឹងរវាងប្រទេសទាំង២ បានថមថយទៅវិញ រីឯទំនាក់ទំនង កាន់តែជិតស្និទ្ធជាងមុន ដោយហេតុតែសម្ពាធផ្នែកពាណិជ្ជកម្មរបស់សហរដ្ឋអាមេរិកទៅលើប្រទេសទាំងពីរ។ គម្រោងទស្សនកិច្ចលោក អាបេ នៅប៉េកាំង ធ្វើឡើងចំខួបទី៤០ នៃការចុះហត្ថលេខាលើសន្ធិសញ្ញាសន្តិភាព និងមិត្តរវាងជប៉ុន និងចិនដែរ។ ជាមួយគ្នានេះ លោក អាបេ ក៏សង្ឃឹមថា ប្រធានាធិបតីចិនអាចធ្វើទស្សនកិច្ចមកកាន់ប្រទេសជប៉ុន ដើម្បីលើកកម្ពស់ទំនាក់ទំនងទ្វេភាគីឲ្យដល់កម្រិតថ្មី។

គេមិនទាន់ដឹងច្បាស់ពីថ្ងៃនៃការធ្វើទស្សនកិច្ចរបស់លោកអាបេនៅឡើយទេ ប៉ុន្តែសារព័ត៌មានជប៉ុន បានបង្ហើបថ្ងៃទី២៣ តុលា ទំនងជាពេលវេលាដែលលោកអាបេធ្វើដំណើរទៅកាន់ប្រទេសចិន។ ថ្ងៃទី២៣ តុលា ជាថ្ងៃដែលសន្ធិសញ្ញាមិត្តភាពរវាងជប៉ុននិងចិន បានចូលជាធរមាន កាលពីឆ្នាំ១៩៧៨ ។

កន្លងមកមន្ត្រីជប៉ុន និងចិន បានជួបពិភាក្សាគ្នាអំពីកិច្ចសហប្រតិបត្តិការសម្រាប់វិស័យឯកជន ក្នុងបណ្ដាប្រទេសទីបី។ ចិន ត្រូវបានគេមើលឃើញថា ចង់ឲ្យក្រុមហ៊ុនជប៉ុន ចូលរួមនៅក្នុងគំនិតផ្ដួចផ្ដើមខ្សែក្រវាត់ និងវិថីរបស់ខ្លួន និងបណ្ដាញពាណិជ្ជកម្មរវាងចិន និងតំបន់អឺរ៉ាស៊ី៕