មុនឡើងដំណែង លោក គៀត ច័ន្ទថារិទ្ធ និងមន្ត្រីជាន់ខ្ពស់២រូបទៀត ត្រូវបានសម្ដេច ស ខេង ជ្រើសទុក១ឆ្នាំមុន

ជាតិ

មុនឡើងដំណែង លោក គៀត ច័ន្ទថារិទ្ធ និងមន្ត្រីជាន់ខ្ពស់២រូបទៀត ត្រូវបានសម្ដេច ស ខេង ជ្រើសទុក១ឆ្នាំមុន

13, Sep 2018 , 10:45 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ «ខ្ញុំសុំនិយាយជាចំហរតែម្ដងថា មនុស្ស៣នាក់តែងតាំងជាអគ្គនាយកនេះ ខ្ញុំបានរើសទុក១ឆ្នាំរួចហើយ»។ នេះជាការប្រកាសជាចំហររបស់សម្ដេច ស ខេង រដ្ឋមន្ត្រីក្រសួងមហាផ្ទៃ ចំពោះមុខមន្ត្រីនគរបាលជាន់ខ្ពស់ ដែលត្រូវទទួលបានតំណែងថ្មី ក្នុងអាណត្តិទី៦នេះ។

មនុស្ស៣រូប ដែលសម្ដេច ស ខេង បានជ្រើសតាំងជាអគ្គនាយកដ្ឋាននៃក្រសួងមហាផ្ទៃនេះ គឺសំដៅទៅលើលោក គៀត ច័ន្ទថារិទ្ធ ពីអគ្គស្នងការរងនគរបាលជាតិ ទៅជាអគ្គនាយកនៃអគ្គនាយកដ្ឋានអន្តោប្រវេសន៍ជំនួសលោក សុខ ផល។ លោក កង សុខន ពីអគ្គស្នងការរងនគរបាលជាតិ ទៅជាអគ្គនាយក អគ្គនាយកដ្ឋានអត្តសញ្ញាណកម្មជំនួសលោក ម៉ៅ ច័ន្ទតារា និងលោក សេង យូអ៊ាន់ ពីអគ្គនាយករង ទៅជាអគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុជំនួសលោក ម៉ៅ ប៊ុនណារិន។

សម្រាប់រដ្ឋមន្ត្រីក្រសួងមហាផ្ទៃ ការជ្រើសតាំងមន្ត្រីបម្រើការងារតាមនាយកដ្ឋាននានា គឺត្រូវសង្កេតមើលទៅលើអតីតភាពការងារ សមត្ថភាព និងគុណសម្បត្តិការងារ។ កន្លងមក ក៏ធ្លាប់មានដែរ មន្ត្រីមួយចំនួន ដែលបានស្នើសុំតំណែង និងតួនាទីនានា តាមរយៈអ្នកមានបុណ្យសក្តិធំ និងដោយផ្ទាល់ពីសម្ដេច ស ខេង។ ប៉ុន្តែការសម្រេចជ្រើសតាំងនេះ សម្រាប់សម្ដេច ស ខេង គឺមិនមែនពឹងផ្អែកលើមនោសញ្ចេតនា ឬការយោគយល់ទេ ពោលគឺលើគុណភាពការងារជាចម្បង។

សូមស្ដាប់ប្រសាសន៍រដ្ឋមន្ត្រីក្រសួងមហាផ្ទៃ៖

« ខ្ញុំស្នើការយោគយល់អាធ្យាស្រ័យ។ ខ្ញុំអត់មានបោះបង់ចោលអ្នកណាទេ។ ហើយកុំគិតថា គាត់ស្អប់ខ្ញុំ គាត់មិនស្រលាញ់ខ្ញុំ គាត់មិនជ្រើសរើសខ្ញុំតែងតាំង។ តើឲ្យខ្ញុំធ្វើយ៉ាងម៉េច បើតគ្នាមកសុំតំណែងអ៊ីចឹង ឲ្យខ្ញុំធ្វើយ៉ាងម៉េច។ ខ្ញុំសូមជម្រាបថា គ្មានពេលណាដែលធ្វើឲ្យខ្ញុំពិបាកចិត្តជាងពេលហ្នឹងទេ ក្នុងការរៀបចំមន្ត្រី»។ នេះជាការបញ្ជាក់របស់រដ្ឋមន្ត្រីក្រសួងមហាផ្ទៃ ។

ថ្លែងក្នុងពិធីប្រកាសចូលកាន់តំណែង រដ្ឋលេខាធិការ អនុរដ្ឋលេខាធិការ និងមន្ត្រីជាន់ខ្ពស់ក្រសួងមហាផ្ទៃ កាលពីថ្ងៃទី១២ ខែកញ្ញា រដ្ឋមន្ត្រីក្រសួងមហាផ្ទៃរូបនេះ បានព្រលយដូច្នេះថា ទោះមន្ត្រីទាំងនោះ ត្រូវបានតែងតាំងហើយក៏ដោយ ក៏អាចធ្លាក់ចេញពីតំណែងវិញដែរ បើសិនជាពួកគេអនុវត្តការងារមិនបានល្អត្រឹមត្រូវ៕