ប្រធានាធិបតីវ៉េណេស៊ុយអេឡា ទៅចិនរកជំនួយដើម្បីស្រោចស្រង់សេដ្ឋកិច្ចដែលដុនដាប

អន្តរជាតិ

ប្រធានាធិបតីវ៉េណេស៊ុយអេឡា ទៅចិនរកជំនួយដើម្បីស្រោចស្រង់សេដ្ឋកិច្ចដែលដុនដាប

13, Sep 2018 , 11:33 am

រូបភាព

ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ (រូបភាព AFP)

ដោយ: តន ចាន់រិទ្ធារ៉ា

ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ កំពុងធ្វើដំណើរទៅកាន់ទឹកដីចិន ក្នុងគោលដៅស្វែងរកកញ្ចប់ជំនួយថ្មីៗថែមទៀតពីសម្ព័ន្ធមិត្តរបស់ខ្លួន ដើម្បីស្រោចស្រង់សេដ្ឋកិច្ចដែលកំពុងធ្លាក់ចុះខ្លាំង។ លោក ម៉ាឌុយរ៉ូ នឹងជជែកពីកិច្ចព្រមព្រៀងសេដ្ឋកិច្ចមួយចំនួនជាមួយសមភាគីចិន ស៊ី ជិនភីង អំឡុងពេលទស្សនកិច្ចនេះ ហើយលោកជឿថា ចិននឹងផ្ដល់ជូនតាមសំណើរបស់វ៉េណេស៊ុយអេឡាផងដែរ។

ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ នឹងធ្វើទស្សនកិច្ចនៅទីក្រុងប៉េកាំងចាប់ពីថ្ងៃទី១៣ ដល់ថ្ងៃទី១៥ ខែកញ្ញា តាមការអញ្ជើញរបស់ប្រធានាធិបតីចិន ស៊ី ជិនភីង ។ នេះជាដំណើរទស្សនកិច្ចនៅបរទេសលើកទីមួយ ចាប់តាំងពីរួចផុតពីការប៉ុនប៉ងធ្វើឃាតកាលពីខែសីហា ដែលលោកបានចោទអាមេរិក និងកូឡុំប៊ី ថា រៀបចំផែនការនេះ។ លោក ម៉ាឌុយរ៉ូ នឹងប្រើទស្សនកិច្ចលើកនេះដើម្បីស្នើកញ្ចប់ថវិកាដោះស្រាយបញ្ហាសេដ្ឋកិច្ចក្នុងស្រុកដែលដាំក្បាលចុះ។

មុនចាកចេញទៅកាន់ក្រុងប៉េកាំង លោក ម៉ាឌុយរ៉ូ ហាក់មានសុទិដ្ឋិនិយមខ្ពស់ថា នឹងត្រឡប់មកផ្ទះវិញជាមួយនឹងអ្វីដែលលោកចង់បាន។ ថ្លែងតាមកញ្ចក់ទូរទស្សន៍នៅថ្ងៃទី១២ ខែកញ្ញា ប្រធានាធិបតីវ៉េណេស៊ុយអេឡារូបនេះនិយាយថា ទស្សនកិច្ចរបស់លោកពេលនេះ ជារឿងចាំបាច់ និងពោរពេញដោយឱកាស និងក្ដីរំពឹង។ ដំណើរទស្សនកិច្ចនេះ ក៏នឹងពង្រីកទំនាក់ទំនងវ៉េណេស៊ុយអេឡា និងចិនឲ្យកាន់តែស៊ីជម្រៅថែមទៀត។

សូមបញ្ជាក់ថា វ៉េណេស៊ុយអេឡា ដែលជាធ្លាប់មានបានដោយសារធនធានប្រេង បានផុងខ្លួនក្នុងវិបត្តិយ៉ាងជ្រៅក្រោមការដឹកនាំរបស់លោក ម៉ាឌុយរ៉ូ ។ ជម្លោះផ្នែកនយោបាយ និងសេដ្ឋកិច្ច បានបង្ខំឲ្យប្រជាជនរាប់ពាន់នាក់ភៀសខ្លួនទៅកាន់ប្រទេសជិតខាង។ ក្នុងការដោះស្រាយបញ្ហា រដ្ឋាភិបាលក្រុងការ៉ាកាស់ បានសម្រេចទម្លាក់តម្លៃរូបិយវត្ថុក្នុងស្រុកដើម្បីទប់ស្កាត់កំណើនអតិផរណា។ មូលនិធិរូបិយវត្ថុអន្តរជាតិទស្សទាយថា អតិផរណានៅវ៉េណេស៊ុយអេឡានឹងកើនដល់១លានភាគរយនៅចុងឆ្នាំនេះ។

មុនដំណើរទស្សនកិច្ចរបស់លោក ម៉ាឌុយរ៉ូ អនុប្រធានាធិបតីវ៉េណេស៊ុយអេឡា Delcy Rodriguez ក៏កំពុងស្ថិតក្នុងទឹកដីចិនស្រាប់ដែរ។ ក្នុងសន្និសីទសារព័ត៌មានថ្ងៃទី១២ ខែកញ្ញា អ្នកនាំពាក្យក្រសួងការបរទេសចិនប្រកាសថា លោក Rodriguez បានជួបជាមួយសមភាគីចិន វ៉ាង ជីសាន ហើយលោក វ៉ាង ក៏បានប្រាប់អនុប្រធានាធិបតីវ៉េណេស៊ុយអេឡាពីការរីកចម្រើនក្នុងទំនាក់ទំនងប្រទេសទាំងពីរលើគ្រប់វិស័យទាំងអស់។

ចិន គឺជាប្រទេសមួយដែលនៅតែជាខ្នងបង្អែករឹងមសម្រាប់វ៉េណេស៊ុយអេឡា ដែលជួបបញ្ហាមិនចេះមិនចេះហើយ។ ក្នុងមួយទសវត្សរ៍មកនេះ ចិនបានផ្ដល់លុយច្រើនជាង៥០ពាន់លានដុល្លារទៅឲ្យវ៉េណេស៊ុយអេឡា ហើយវ៉េណស៊ុយអេឡាបានផ្គត់ផ្គង់ប្រេងទៅឲ្យចិនវិញដែរ។ ទំនាក់ទំនងនេះក៏ជួយចិនពង្រីកឥទ្ធិពលនៅតំបន់អាមេរិកឡាទីនដែរ ខណៈអាមេរិកក្រោមរដ្ឋបាលលោក ដូណាល់ ត្រាំ មិនសូវខ្វល់ខ្វាយពីប្រទេសភូមិផងខ្លួនប៉ុន្មានទេ៕