សម្ដេច ស ខេង ហាមមេឡើងតំណែងថ្មី ដកមន្ត្រីចាស់ចោលដោយគ្មានការពិចារណា

ជាតិ

សម្ដេច ស ខេង ហាមមេឡើងតំណែងថ្មី ដកមន្ត្រីចាស់ចោលដោយគ្មានការពិចារណា

13, Sep 2018 , 7:19 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ បញ្ហារវាងមន្ត្រីកាន់តំណែងថ្មី និងមន្ត្រីចាស់ នៅតាមនាយកដ្ឋាននានា នៃក្រសួងមហាផ្ទៃ នៅតែកើតមាន។ បញ្ហានេះរដ្ឋមន្ត្រីមហាផ្ទៃក្រសួងមហាផ្ទៃ សម្ដេច ស ខេង ក៏ធ្លាប់បានដឹង ។ សម្ដេច ស្នើឲ្យមន្ត្រីទាំងនោះ ចេះសម្របសម្រួលអនុវត្តការងារជាមួយគ្នាឲ្យបានត្រឹមត្រូវ។

និយាយចំពោះមុខមន្ត្រីនគរបាលជាន់ខ្ពស់ ដែលត្រូវចូលកាន់តំណែងថ្មី តាមអគ្គនាយកដ្ឋាននៃក្រសួងមហាផ្ទៃនោះ សម្ដេច ស ខេង បានលើកយកបញ្ហាមន្ត្រីមួយចំនួន ដែលធ្វើមិនត្រឹមត្រូវ មកបង្ហាញថ្នាក់ដឹកនាំជាន់ខ្ពស់ទាំងនេះ ។ ចំណុចអវិជ្ជមានរបស់មន្ត្រីខ្លះ ដែលសម្ដេច ស ខេង ហាក់មិនពេញចិត្តនោះ គឺការចូលកាន់តំណែងថ្មីហើយ ដកមន្ត្រីចាស់ៗ ដែលបំពេញការងារក្នុងអង្គភាពនោះចោល ហើយបែរជាដាក់បក្ខពួកខ្លួនឯងចូលធ្វើការទៅវិញ។ ត្រង់ចំណុចនេះសម្ដេច ស ខេង ហាមមន្ត្រីឡើងតំណែងថ្មី អនុវត្តការងារបែបនេះ។

ថ្លែងក្នុងពិធីប្រកាសចូលកាន់តំណែង រដ្ឋលេខាធិការ អនុរដ្ឋលេខាធិការ និងមន្ត្រីជាន់ខ្ពស់ក្រសួងមហាផ្ទៃ កាលពីថ្ងៃទី១២ ខែកញ្ញា រដ្ឋមន្ត្រីក្រសួងមហាផ្ទៃរូបនេះ បានបញ្ជាក់ដូច្នេះថា៖«វិធីដែលល្អ គឺចូលទៅ(កាន់តំណែងថ្មី) នេះ លើកទឹកចិត្តអ្នកនោះ (មន្ត្រីចាស់) អ្នកដែលបានតែងតាំងហើយហ្នឹង ប្រើប្រាស់គាត់ទៅ។ អើ! បើគាត់នោះ ធ្វើអ្វីមិនកើត វាចៀសមិនផុត(ពីការដកចេញ)ទេ។ ប៉ុន្តែកុំឲ្យទៅដល់ថា អ្នកនោះធ្វើមិនកើត ទៅគាបសង្កត់គំរាមកំហែង ធ្វើឲ្យមានការថ្នាំងថ្នាក់ប្ដឹងផ្ដល់។ យើងត្រួតពិនិត្យទៅ បើត្រួតពិនិត្យទៅ គាត់ធ្វើមិនកើតដកគាត់ទៅ។ ហើយកុំឲ្យទៅភ្លាមដូរអ្នកនេះ ដូរអ្នកនោះ។ អគ្គនាយកដ្ឋានមុន គាត់ដាក់រៀបចំគ្នាគាត់ ឥឡូវខ្ញុំដូរដាក់មនុស្សខ្ញុំ…»។

បើតាមសម្ដេច ស ខេង គោលការណ៍របស់គណបក្សប្រជាជនកម្ពុជា និងរដ្ឋាភិបាល គឺត្រូវរក្សាកម្លាំងចាស់ និងបង្កើនកម្លាំងថ្មី ដើម្បីបន្តយន្តការដោះស្រាយបញ្ហាជូនប្រជាពលរដ្ឋតាមមូលដ្ឋាន និងសង្គម ពោលគឺមិនមែនមានអ្នកថ្មី ហើយភ្លេចអ្នកចាស់ដែរ៕