អន្តរជាតិ
ថៃ, ប្រាយុទ្ធ ចន្ទអូចា
×![]()
ដោយ: តន ចាន់រិទ្ធារ៉ា
មហាក្សត្រថៃ មហាវជិរាលង្ករណ៍ (Maha Vajiralongkorn) បានឡាយព្រះហស្តលើច្បាប់សំខាន់ៗចំនួនពីរដែលចាំបាច់សម្រាប់ការបោះឆ្នោត។ ច្បាប់ស្ដីការជ្រើសតាំងតំណាងរាស្ត្រ និងការតែងតាំងសមាជិកព្រឹទ្ធសភា ក៏ត្រូវបានចុះក្នុងរាជកិច្ចនៅថ្ងៃទី១២ ខែកញ្ញារួចហើយដែរ។ ការប្រកាសឲ្យប្រើច្បាប់នេះ នឹងបើកផ្លូវដល់ការបោះឆ្នោតជ្រើសរើសសមាជិកសភា ត្រូវតែរៀបចំឡើងយ៉ាងយូរនៅត្រឹមខែឧសភា ឆ្នាំ២០១៩ ខាងមុខនេះ។ 
ការរាប់ថយក្រោយទៅកាន់ការបោះឆ្នោតនៅថៃដែលគេរំពឹងជាច្រើនឆ្នាំ បានចាប់ផ្ដើមហើយ បន្ទាប់ពីព្រះចៅ មហាវជិរាលង្ករណ៍ បានយល់ព្រមលើច្បាប់ស្ដីការជ្រើសតាំងតំណាងរាស្ត្រ និងការតែងតែងសមាជិកព្រឹទ្ធសភា។ ច្បាប់សំខាន់ទាំងពីរដែលបម្រើឲ្យការបោះឆ្នោតនៅពេលខាងមុខ ត្រូវបានចុះក្នុងរាជកិច្ចនៅថ្ងៃទី១២ ខែកញ្ញា ហើយនឹងចូលធរមាននៅរយៈពេល៩០ថ្ងៃបន្ទាប់ គឺក្នុងអំឡុងខែធ្នូខាងមុខតែម្ដង។
បើតាមច្បាប់ថៃ ក្រោយការដាក់ឲ្យអនុវត្តជាផ្លូវការរួច ការបោះឆ្នោតទូទៅមួយ ត្រូវរៀបចំក្នុងអំឡុងពេល១៥០ថ្ងៃក្រោយ ដែលនេះមានន័យថា គណៈកម្មការរៀបចំការបោះឆ្នោតរបស់ថៃមានពេលដល់ខែឧសភា ឆ្នាំ២០១៩ ដើម្បីបោះឆ្នោតជ្រើសរើសសមាជិកសភាតំណាងរាស្ត្រ។ ឯក្នុងច្បាប់ស្ដីពីការតែងតាំងសមាជិកព្រឹទ្ធសភាវិញចែងថា សមាជិកព្រឹទ្ធសភាចំនួន២០០នាក់ជ្រើសរើសដោយរបបយោធា ៥០នាក់ដោយគណៈកម្មការរៀបចំការបោះឆ្នោត។
បើតាមកាសែតបាងកកប៉ុស្តិ៍ រដ្ឋធម្មនុញ្ញចែងថា សមាជិកសភាតំណាងរាស្ត្រមានចំនួន៥០០រូប ដែល៣៥០រូបជ្រើសតាំងតាមរយៈការបោះឆ្នោតក្នុងមណ្ឌលទូទាំងប្រទេស ហើយ១៥០នាក់ទៀតត្រូវជ្រើសតាំងតាមប្រព័ន្ធសមាមាត្រ។ រដ្ឋសភាមានភារកិច្ចជ្រើសរើសនាយករដ្ឋមន្ត្រីពីចំណោមបក្សឈ្នះឆ្នោត។ តែបើមិនអាចធ្វើតាមនីតិវិធីបាន នោះសមាជិកព្រឹទ្ធសភាក៏ចូលរួមក្នុងការជ្រើសរើសនាយករដ្ឋមន្ត្រីដែរ ហើយដែលជាឥស្សរជនមិនមែនជាតំណាងរាស្ត្របានទៀតផង។
ជុំវិញកាលបរិច្ឆេទបោះឆ្នោតវិញ រដ្ឋាភិបាលយោធាធ្លាប់បានប្រកាសហើយថា ទំនងជាធ្វើនៅថ្ងៃទី២៤ ខែកុម្ភៈ ឆ្នាំ២០១៩ ខាងមុខនេះ។ ការប្រកាសរបស់របបយោធានេះ មិនទាន់ធ្វើឲ្យប្រជាជនថៃកក់ក្ដៅនៅឡើយទេ ព្រោះតែយោធាធ្លាប់ពន្យារពេលការបោះឆ្នោតនេះម្ដងជាពីរដងរួចទៅហើយ។ កាលពីខែសីហា នាយករដ្ឋមន្ត្រីរដ្ឋាភិបាលសឹក ប្រាយុទ្ធ ចន្ទអូចា ក៏នៅតែចំហរទ្វារដល់ការអូសបន្លាយការបោះឆ្នោតទៀតដែរ។
ក្នុងដំណើរទៅកាន់បោះឆ្នោតនេះដែរ របបយោធាក៏ត្រៀមលើកលែងបម្រាមជួបជុំលើអ្នកនយោបាយដែរ ដើម្បីឲ្យពួកគេមានឱកាសត្រៀមខ្លួនប្រជែងការបោះឆ្នោតឆ្នាំក្រោយ។ កន្លងមក ក្រុមយោធាបានរងការរិះគន់យ៉ាងខ្លាំងលើរឿងនេះ ដ្បិតបក្សនយោបាយនានាបានត្អូញត្អែរថា ពួកគេអាចគ្មានពេលគ្រប់គ្រាន់ដើម្បីប្រកួត ហើយពេលវេលាក៏កាន់តែខើចខ្លីដែរនោះ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
