ជាតិ
សម្ដេច ហ៊ុន សែន៖ ប្រទេសក្រៅតំបន់ឥណ្ឌូចិន គួរទុកសេចក្ដីសុខខាងនយោបាយឲ្យប្រទេសក្នុងតំបន់
× ភ្នំពេញ៖ ប្រទេសក្រៅតំបន់ឥណ្ឌូចិន គួរតែទុកសេចក្តីសុខខាងនយោបាយឲ្យប្រទេសក្នុងតំបន់ អាចមានលទ្ធភាពដោះស្រាយបញ្ហាដោយខ្លួនឯង។ នេះជាការលើកឡើងរបស់សម្ដេច ហ៊ុន សែន នៅក្នុងវេទិកាសេដ្ឋកិច្ចពិភពលោក លើកទី២៧ នៅទីក្រុងហាណូយ ប្រទេសវៀតណាម។
ថ្លែងចំពោះមុខមេដឹកនាំប្រទេសចំនួន៤ទៀត សម្ដេច ហ៊ុន សែន បាននិយាយថា ប្រទេសក្នុងតំបន់មេគង្គ តែងតែរងសម្ពាធផ្នែកនយោបាយក្នុងការដឹកនាំ ពីសំណាកប្រទេសលោកសេរី ។ដូច្នេះប្រទេសទាំងនោះ គួរតែទុកឲ្យប្រទេសក្នុងតំបន់មេគង្គ ដោះស្រាយបញ្ហាដោយខ្លួនឯង ពោលគឺកុំលូកដៃចូលផ្ទៃក្នុងប្រទេសក្នុងតំបន់មេគង្គ។
នាយករដ្ឋមន្ត្រីកម្ពុជា បាននិយាយយ៉ាងដូច្នេះថា៖«ប្រទេសខាងក្រៅតំបន់របស់យើង គេតែងតែទះក្បាលរបស់យើងផង ថាត្រូវធ្វើតាមគេ តាមនេះ តាមនោះផង ក្នុងពេលលក្ខខណ្ឌតាមប្រទេសនីមួយៗ មិនអាចទទួលយកបាន។ ទុកឲ្យប្រទេសទាំងនេះមានសេចក្ដីសុខខាងនយោបាយខ្លះ ដើម្បីជំរុញដល់ការកសាងប្រទេស។ ខ្ញុំលើកបញ្ហានេះមិនមែនចង់សំដៅជូនសារដល់ប្រទេសណាទាំងអស់ ក៏ប៉ុន្តែខ្ញុំគិតថា ពួកមេក្រុមនេះសុទ្ធតែពួករងគ្រោះខាងនយោបាយ ដូច្នេះខ្ញុំស្នើថាពួកអ្នកក្រៅតំបន់ដែលមិនដឹងរឿងរបស់យើង ទុកឲ្យយើងដោះស្រាយបញ្ហារបស់យើងបានឬទេ?»។
ភ្ជាប់ជាមួយការស្នើទៅប្រទេសក្រៅតំបន់នេះ លោកនាយករដ្ឋមន្ត្រី ហ៊ុន សែន ក៏បាននិយាយគាំទ្ររដ្ឋាភិបាលលោកស្រី អ៊ុងសាន ស៊ូជី ដែលបានអនុវត្តវិធានការច្បាប់ប្រទេសខ្លួន ក្នុងការទប់ស្កាត់បញ្ហាចលាចលនៅមីយ៉ានម៉ាផងដែរ។ «ឯមីយ៉ាន់ម៉ាគឺកាន់តែធ្ងន់ធ្ងរទៅទៀត គឺត្រូវគេចោទថា ជាអ្នកប្រល័យពូជសាសន៍ ប៉ុន្តែអ្នកទាំងអស់គ្នាបានយល់ពីប្រទេសមីយ៉ាន់ម៉ាទេ ស្គាល់ពីមីយ៉ាន់ម៉ាទេ ដែលត្រូវដោះស្រាយបញ្ហាប្រឈមយ៉ាងច្រើនទាក់ទងទៅនឹងសន្តិសុខជាតិ ពីក្រុមមួយទៅក្រុមមួយ ត្រូវមានការយោគយល់ចំពោះមីយ៉ាន់ម៉ា»។ នេះជាការលើកឡើងរបស់ប្រមុខរដ្ឋាភិបាលកម្ពុជា។
កម្ពុជា ត្រូវបានប្រទេសលោកខាងលិច រិះគន់ឥតស្រាកស្រាន្តពីរឿងបញ្ហាសិទ្ធិមនុស្ស និងការធ្វើទុក្ខបុកម្នេញក្រុមអ្នកនយោបាយ និងអ្នកប្រឆាំងរដ្ឋាភិបាល។ ជាពិសេសការបោះឆ្នោតជ្រើសតាំងតំណាងរាស្ត្រនីតិកាលទី៦កន្លងមក បណ្ដាប្រទេសលោកខាងលិច មិនគាំទ្រឡើយ ដោយសារអវត្តមានគណបក្សសង្គ្រោះជាតិ ដែលត្រូវបានតុលាការរំលាយ កាលពីចុងឆ្នាំ២០១៧។ បណ្ដាប្រទេសទាំងនោះ ចាត់ទុកការបោះឆ្នោតនេះ មិនឆ្លុះបញ្ចាំងពីឆន្ទៈប្រជាពលរដ្ឋ។ ប៉ុន្តែរដ្ឋាភិបាល អះអាងថា ការបោះឆ្នោតនេះ គឺត្រឹមត្រូវតាមច្បាប់ ស្របពីពលរដ្ឋជិត៨៣ភាគរយនាំគ្នាបោះឆ្នោត ដែលបង្ហាញពីលទ្ធិប្រជាធិបតេយ្យនៅកម្ពុជាពិតប្រាកដ៕
Tag:
ហ៊ុន សែន
វេទិកាសេដ្ឋកិច្ចពិភពលោក
© រក្សាសិទ្ធិដោយ thmeythmey.com