ទីប្រឹក្សារដ្ឋមីយ៉ាន់ម៉ាលោកស្រី អ៊ុងសាន ស៊ូជី បានអះអាងថា អ្វីដែលមីយ៉ាន់ម៉ាត្រូវការនៅពេលនេះគឺ សន្តិភាព ស្ថិរភាព និងវិបុលភាពក្នុងប្រទេស។ លោកស្រីបានព្យាយាមបកស្រាយផងដែរការចាប់ខ្លួននិងដាក់គុកអ្នកសារព័ត៌មានដែលធ្វើឲ្យមានការទិទៀនខ្លាំងពីសហគមន៍អន្តរជាតិកន្លងមក។
ស្ថិរភាព និងវិបុលភាពសេដ្ឋកិច្ច និងសង្គមជាគោលដៅអាទិភាពរបស់រដ្ឋាភិបាលមីយ៉ាន់ម៉ា ខណៈដែលមីយ៉ាន់ម៉ាកំពុងលូតលាស់ទៅមុខ។ នេះជាសម្តីរបស់លោកស្រី អ៊ុងសាន ស៊ូជី នៅវេទិកាសេដ្ឋកិច្ចពិភពលោកស្តីពីអាស៊ាននៅថ្ងៃ ១៣ ខែកញ្ញានៅវៀតណាម។
ជាតំណាងរដ្ឋាភិបាលស៊ីវិលមីយ៉ាន់ម៉ា លោកស្រី ស៊ូជី បានកត់សម្គាល់ថា មីយ៉ាន់ម៉ានៅប្រឈមបញ្ហាច្រើនជាពិសេសប្រព័ន្ធអប់រំ សន្តិសុខ និងនយោបាយ ហើយវាជារឿងដែលរដ្ឋាភិបាលលោកស្រីកំពុងយកចិត្តទុកដាក់ព្យាយាមដោះស្រាយដូចគ្នា។
ទាក់ទិនការអប់រំ លោកស្រីទទួលស្គាល់ថា ការអប់រំនៅមីយ៉ាន់ម៉ានៅអន់ខ្សោយណាស់។ ដូច្នេះវាជារឿងអាទិភាពដែលរដ្ឋាភិបាលប្រឹងប្រែងកែលម្អរ និងធានាថា ប្រជាជនគ្រប់រូបមានឱកាសទទួលបានការសិក្សាដើម្បីឆ្លើយតបនឹងតម្រូវការសង្គមដែរ។
ថ្វីបើការអប់រំខ្សោយក្តី លោកស្រី អួតអាងថា ប្រជាជនក្មេងៗនៅមីយ៉ាន់ម៉ាមានសក្តានុពលនិងមានការច្នៃប្រឌិតខ្ពស់។ ប៉ុន្តែទីប្រឹក្សារដ្ឋនេះបានអំពានាវ និងស្វាគមន៍រាល់អ្នកជំនួញក្នុងវេទិកាសេដ្ឋកិច្ចពិភពលោកនេះដែលចង់ចូលរួមវិនិយោគឲ្យកាន់តែច្រើនលើយុវជន និងពង្រឹងសមត្ថភាពនិងជំនាញរបស់ពួកគេផង។
តាមពិតទៅវិនិយោគទុនបរទេសកើនឡើងច្រើនចាប់ពីពេលមីយ៉ាន់ម៉ាស្គាល់ប្រជាធិបតេយ្យពេញលេញពីឆ្នាំ ២០១៥។ កាលពីឆ្នាំមុនរដ្ឋអាស៊ីអាគ្នេយ៍នេះបានទាក់ទាញវិនិយោគទុនបរទេសមានទំហំប្រមាណ ៨ ពាន់លានដុល្លារអាមេរិកឯណោះ។
ក្រៅពីសេដ្ឋកិច្ចនិងការអប់រំនេះ លោកស្រីក៏បានលើកឡើងផងដែរពីឧបសគ្គនៃលទ្ធិប្រជាធិបតេយ្យនៅមីយ៉ាន់ម៉ា។ នោះគឺ ការកាន់កាប់អាសនៈសភា ២៥ភាគរយរបស់ក្រុមយោធាដែលមិនស្របតាមគោលការណ៍ប្រជាធិបតេយ្យឡើយ ហើយរដ្ឋាភិបាលលោកស្រីនៅតែបន្តតស៊ូមតិដើម្បីធានាថា ការផ្លាស់ប្តូរដើម្បីឲ្យរាល់អាសនៈទាំងអស់ត្រូវជ្រើសរើសដោយប្រជាជនដោយសេរី។ ប៉ុន្តែទីប្រឹក្សារដ្ឋនេះសង្កត់ធ្ងន់ថា រាល់ការផ្លាស់ប្តូរត្រូវធ្វើតាមការចរចា និងផ្សះផ្សាជាតិ មិនមែនធ្វើទាំងបង្ខំឡើយព្រោះសន្តិភាព និងស្ថិរភាព ក៏ដូចជាការផ្សះផ្សាជាតិជាគោលដៅធំបំផុតមួយរបស់រដ្ឋាភិបាលស៊ីវិល។
បន្ថែមពីនេះ លោកស្រី ស៊ូជី បានផ្តោតការយកចិត្តទុកដាក់ផងដែរលើការដោះស្រាយបញ្ហាហិង្សាប្រដាប់អាវុធនានាដែលប៉ះពាល់ដល់ដំណើរការនៃការអភិវឌ្ឍ និងគំរាមកំហែងសន្តិភាព។ បញ្ហាចម្រូងចម្រាសជាងគេ គឺវិបត្តិរ៉ូហ៊ីងយ៉ានៅរដ្ឋ Rakhine ដែលសំដៅលើការបង្ក្រាបចលនាប្រដាប់អាវុធ និងមានការភៀសខ្លួនរបស់ជនជាតិភាគតិចមូស្លីមជាង ៧សែននាក់ទៅកាន់បង់ក្លាដែសផង។
ខណៈដែលពិភពលោកចង់ឲ្យមានការកាត់ក្តីទាហានជាន់ខ្ពស់មីយ៉ាន់ម៉ារឿងបំពានសិទ្ធិមនុស្សធ្ងន់ធ្ងរ លោកស្រី ស៊ូជី នៅតែបង្ហាញការតាំងចិត្ត និងទំនួលខុសត្រូវរបស់រដ្ឋាភិបាលលោកស្រីក្នុងនាំប្រជាជនរ៉ូហ៊ីងយ៉ាមកស្រុកវិញ និងស្តារសណ្តាប់ធ្នាប់ និងសន្តិភាពក្នុងរដ្ឋទាំងមូលឡើងវិញដែរ។
«បើទោះបីជាយើងមានកៅអីសភាត្រឹម ៧៥ភាគរយក្តី យើងត្រូវទទួលខុសត្រូវចំពោះបញ្ហានេះ ១០០ភាគរយតែម្តង»។ នេះជាការអះអាងរបស់លោកស្រី។
តាមពិតទៅបញ្ហាវិបត្តិរ៉ូហ៊ីងយ៉ាក្លាយជារឿងចម្រូងចម្រាស ហើយមីយ៉ាន់ម៉ារងការថ្កោលទោសខ្លាំងផងកន្លងមកពីក្រុមសិទ្ធិមនុស្ស និងអង្គការអន្តរជាតិ។ អ្វីដែលរឹតតែធ្ងន់ធ្ងរជាងនេះទៀតនោះ គឺកាលពីខែមុនទីភ្នាក់ងារអង្គការសហប្រជាជាតិបានបញ្ចេញរបាយការណ៍ចោទប្រកាន់ថា យោធាមីយ៉ាន់ម៉ាប្រព្រឹត្តបទប្រល័យពូជសាសន៍ និងទាមទារឲ្យមានការកាត់ទោសក្រុមយោធាទាំងនោះផង។
លោកស្រី អ៊ុងសាន ស៊ូជី ការពារការចាប់អ្នកកាសែតស៊ើបអង្កេតវិបត្តិរ៉ូហ៊ីងយ៉ា
យ៉ាងណាក៏ដោយ ក្រៅពីរៀបរាប់ពីបញ្ហាប្រឈមមីយ៉ាន់ម៉ា លោកស្រី ស៊ូជី ក៏បានឆ្លើយសំណួរជុំវិញការចាប់ និងដាក់អ្នកសារព័ត៌មានទីភ្នាក់ងារព័ត៌មាន Reuters ឲ្យជាប់គុក ៧ឆ្នាំដែរ។ លោកស្រីបានការពារចំណាត់ការ និងការសម្រេចរបស់តុលាការដោយអះអាងថា វាមានតម្លាភាព ហើយលោកស្រីបកស្រាយថា អ្នកសារព័ត៌មានទាំងពីរអ្នកមិនមែនជាប់គុកដោយសារធ្វើការងារសារព័ត៌មានឡើយ។
« ពួកគេមិនមែនជាប់គុកដោយសារពួកគេជាអ្នកសារព័ត៌មានឡើយ។ ពួកគេត្រូវដាក់គុកព្រោះតែតុលាការរកឃើញថា ពួកគេបានបំពានច្បាប់កិច្ចការសម្ងាត់រដ្ឋ»។ លោកស្រី ស៊ូជី អះអាងដូច្នេះ។