លោក ត្រាំ អនុញ្ញាតឲ្យដាក់ទណ្ឌកម្មលើប្រទេស ដែលហ៊ានជ្រៀតជ្រែកការបោះឆ្នោតអាមេរិក

អន្តរជាតិ

លោក ត្រាំ អនុញ្ញាតឲ្យដាក់ទណ្ឌកម្មលើប្រទេស ដែលហ៊ានជ្រៀតជ្រែកការបោះឆ្នោតអាមេរិក

13, Sep 2018 , 10:19 pm

រូបភាព

ដោយ:

នៅថ្ងៃទី១២ កញ្ញា លោកប្រធានាធិបតីអាមេរិក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិមួយ (Executive Order) ដែលអនុញ្ញាតឲ្យដាក់ទណ្ឌកម្មប្រឆាំងនឹងបរទេសណា ដែលហ៊ានលូកដៃជ្រៀតជ្រែកក្នុងការបោះឆ្នោតអាមេរិក។ ចំណាត់ការថ្មីរបស់រដ្ឋបាលលោកត្រាំនេះធ្វើឡើង ដើម្បីឆ្លើយតបទៅនឹងកង្វល់របស់ភ្នាក់ងារសម្ងាត់អាមេរិក ដោយបានលើកឡើងថា រុស្ស៊ី មានបំណងចង់លូកលាន់ការបោះឆ្នោតសភាពាក់កណ្ដាលអាណត្តិឆ្នាំ២០១៨។

បទបញ្ជានេះបានធ្វើឡើង ខណៈការបោះឆ្នោតជ្រើសរើសសមាជិកសភាជាន់ខ្ពស់អាមេរិក ខិតជិតមកដល់ ដែលនៅសល់តែ ៨សប្ដាហ៍ទៀតប៉ុណ្ណោះ គឺនៅថ្ងៃទី០៦ វិច្ឆិកាខាងមុខ។ នេះបើយោងតាមទីភ្នាក់ងារសារព័ត៌មាន Reuters។ ជាមួយគ្នានេះ លោកដូណាល់ ត្រាំ បាននិយាយនៅក្នុងសេចក្ដីថ្លែងការណ៍មួយថា៖ «ខ្ញុំសូមបញ្ជាក់ឲ្យច្បាស់ថា សហរដ្ឋអាមេរិក នឹងមិនអនុញ្ញាតឲ្យបរទេសលូកលាន់ក្នុងទម្រង់ណាមួយក៏ដោយ ក្នុងការបោះឆ្នោតរបស់យើងជាដាច់ខាត»។

ទណ្ឌកម្មដែលនឹងត្រូវដាក់ អាចមានដូចជា ការបង្កកទ្រព្យសម្បត្តិ, ការរឹតបន្តឹងលើការជួញដូររូបិយវត្ថុបរទេស, កំណត់ការចូលប្រើប្រាស់ស្ថាប័នហិរញ្ញវត្ថុអាមេរិក និងហាមឃាត់ពលរដ្ឋអាមេរិកមិនឲ្យធ្វើវិនិយោគជាមួយក្រុមហ៊ុន ដែលពាក់ព័ន្ធនឹងការជ្រៀតជ្រែកការបោះឆ្នោតអាមេរិកជាដើម។ ហើយទណ្ឌកម្មនេះ អាចនឹងត្រូវដាក់ ក្នុងអំឡុងពេល ឬក្រោយពេលបោះឆ្នោត ដោយអាស្រ័យទៅលើភស្តុតាងដែលប្រមូលបាន។ នេះការបញ្ជាក់របស់លោក John Bolton ទីប្រឹក្សាសន្តិសុខជាតិអាមេរិក ប្រាប់ទៅកាន់ក្រុមអ្នកសារព័ត៌មាន។

យ៉ាងណាមិញ បទបញ្ជាដែលទើបតែបានដាក់ចេញថ្មីនេះ ក៏រងការរិះគន់ពីសំណាក់សមាជិកសភាមួយចំនួន មកពីគណបក្សទាំងពីរ គឺទាំងបក្សសាធារណរដ្ឋ និងបក្សប្រជាធិបតេយ្យផងដែរ។ ពួកគេ បានអះអាងបែបនេះថា ក្រដាសមួយសន្លឹកនេះ នឹងជួយបានតិចតួចបំផុតក្នុងការផ្លាស់ប្ដូរគំនិតរបស់លោកប្រធានាធិបតីរុស្ស៊ី វ្ល៉ាឌីមៀ ពូទីន។

ជាក់ស្តែង ក្នុងចំណាត់ការថ្មីនេះ គេមិនបាននិយាយចំៗពីឈ្មោះប្រទេសរុស្ស៊ីនោះទេ ប៉ុន្តែវាត្រូវបានអនុវត្តលើបណ្តាប្រទេស, រូបវន្តបុគ្គល និងក្រុមហ៊ុនណា ដែលគាំទ្រ និងព្យាយាមបំផ្លាញប្រព័ន្ធនយោបាយអាមេរិក ដោយប្រើមធ្យោបាយរួមមាន ការហេកចូល (Hack) ប្រព័ន្ធរៀបចំការបោះឆ្នោត ឬសម្របសម្រួលការឃោសនាគោលនយោបាយតាមប្រព័ន្ធឌីជីថលជាដើម។ នេះបើយោងទៅតាមកាសែត The Wall Street Journal ។

គួរបញ្ជាក់ដែរថា ភ្នាក់ងារសម្ងាត់អាមេរិកជាច្រើន បានសន្និដ្ឋានថា ទីក្រុងមូស្គូដែលស្ថិតក្រោមការដឹកនាំរបស់លោក ពូទីន បានចូលជ្រៀតជ្រែកអំឡុងពេលការបោះឆ្នោតអាមេរិកកាលពីឆ្នាំ២០១៦។ លោកពូទីន ត្រូវបានគេសង្ស័យថា បានទម្លាយអ៊ីម៉ែលរបស់លោកស្រី ហ៊ីឡារី គ្លីនតុន (Hillary Clinton) និងជួយពង្រឹងប្រជាប្រិយភាពរបស់លោក ដូណាល់ ត្រាំ ៕