ជាតិ
សេដ្ឋកិច្ច
គណៈកម្មការប្រឹក្សាការងារបើកកិច្ចប្រជុំលើកទី២ ដោយសហជីពស្នើប្រាក់ខែកម្មករ២១១ដុលា្លរក្នុងឆ្នាំ២០១៩
រូបភាព បានពីហ្វេសហ៊ុក សម្តេច ហ៊ុន សែន
×![]()
ភ្នំពេញ៖ គណៈកម្មការប្រឹក្សាការងារ នឹងបើកកិច្ចប្រជុំពិភាក្សាចរចាប្រាក់ឈ្នួលគោលរបស់កម្មករ ជាលើកទី២ នៅថ្ងៃទី១៤ ខែកញ្ញា បន្ទាប់ពីការចរចាលើកទី១ មិនទាន់ទទួលបានផ្លែផ្កា។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរលោក អាត់ ធន តំណាងឲ្យភាគីនិយោជិត បានកំណត់ប្រាក់ខែគោលជាង២០០ដុល្លារ សម្រាប់កម្មករនៅឆ្នាំ២០១៩។ បើតាមលោក អាត់ ធន តួលេខប្រាក់ខែនេះ គឺស្របទៅតាមតម្លៃទំនិញឡើងថ្លៃ និងការចំណាយលើតម្រូវការផ្សេងៗប្រចាំថ្ងៃបច្ចុប្បន្ននេះ។
ថ្លែងប្រាប់សារព័ត៌មានថ្មីៗ លោក អាត់ ធន បានបញ្ជាក់ថា៖ «ការកំណត់យកប្រាក់ឈ្នួលកម្មករអប្បរមាចំនួន២១១.៩៤ដុល្លារ យកមកចរចានេះ គឺដើម្បីឆ្លើយតបទៅនឹងជីវភាពរស់នៅរបស់កម្មករបច្ចប្បន្ន ដែលកំពុងប្រឈមមុខនឹងអតិផរណា ក្នុងស្រុក។ ចំនួនប្រាក់អប្បរមានេះ ក៏បានគិតទៅលើលទ្ធភាពនៃការផលិតរបស់កម្មករ គិតទៅលើភាពផលចំណេញនៃវិស័យរោងចក្រ និងគិតទៅលើតម្រូវការផ្សេងៗរបស់កម្មករផងដែរ»។
ដោយឡែក ភាគីនិយោជកមិនបានបង្ហាញតួលេខអ្វីទេ ក្រៅពីឲ្យភាគីរដ្ឋាភិបាលពិនិត្យស្រាវជ្រាវ រកបញ្ហាមួយចំនួន នៃការកំណត់ដំឡើងប្រាក់ឈ្នួលកម្មករ។ ផ្ទុយមកវិញភាគីនិយោជក សុំពេលពិភាក្សាផ្ទៃក្នុងសិន ដោយរង់ចាំដល់កិច្ចប្រជុំត្រីភាគីម្តងធ្វើឡើង។ ប៉ុន្តែភាគីខាងរដ្ឋាភិបាល បានបង្ហាញតួលេខក្នុងកិច្ចប្រជុំត្រីភាគីលើកទី១ ដោយកំណត់ប្រាក់ឈ្មួលកម្មករអតិបរមាត្រឹម១៧៧.៥៧ដុល្លារ។ តួលេខទាំងនេះ នឹងលើកយកទៅពិភាក្សាក្នុងកិច្ចប្រជុំត្រីភាគីលើកទី២ នៅថ្ងៃស្អែកនេះ។ នេះបើតាមលោក អាត់ ធន។
លោក អាត់ ធន រំពឹងទុកថា ការចរចានេះ នឹងអាចទទួលបានលទ្ធផលវិជ្ជមានដូចឆ្នាំ២០១៨កន្លងមក៕
Tag:
អតិផរណា
កម្មករ
ប្រាក់ឈ្នួល
អាត់ ធន
© រក្សាសិទ្ធិដោយ thmeythmey.com
