ស្ថានបេសកកម្មការទូតប៉ាឡេស្ទីនប្រចាំនៅរដ្ឋធានីវ៉ាស៊ីនតោនត្រូវបញ្ឈប់សកម្មភាពរបស់ខ្លួននៅថ្ងៃព្រហស្បតិ៍ ១៣ ខែកញ្ញា ក្រោយមានការទាមទារពីរដ្ឋាភិបាលអាមេរិករបស់លោក ដូណាល់ ត្រាំ ឲ្យបិទដំណើរការនោះ។ ប៉ាឡេស្ទីននៅសង្ឃឹមថា ការផ្អាកដំណើរការនេះនឹងកើតឡើងត្រឹមពេលខ្លីប៉ុណ្ណោះ។
មន្ត្រីក្រសួងការបរទេសអាមេរិកបានចេញបញ្ជាតាំងពីថ្ងៃចន្ទដើមសប្តាហ៍កន្លងទៅដើម្បីទាមទារឲ្យមានការបិទស្ថានបេសកកម្មការទូតរបស់ប៉ាឡស្ទីនចោល ដើម្បីដាក់សម្ពាធលើប៉ាឡេស្ទីនឲ្យត្រឡប់ចូលតុចរចាជាមួយអ៊ីស្រាអែលវិញ។ ថ្ងៃព្រហស្បតិ៍ទី ១២ ខែកញ្ញាជាថ្ងៃចុងក្រោយនៃឱសានវាទសម្រាប់ប៉ាឡេស្ទីនដែរ។
បើតាមការចុះផ្សាយរបស់ទីភ្នាក់ងារព័ត៌មាន AFP ប្រមុខបេសកកម្មការទូតប៉ាឡេស្ទីនប្រចាំអាមេរិកលោក Husam Zomlot បានបង្ហាញការខកចិត្តខ្លាំង និងថ្កោលទោសរាល់ការសម្រេចចិត្តរបស់រដ្ឋបាលលោក ត្រាំ ប៉ុន្តែលោកសង្កត់ធ្ងន់ថា ប៉ាឡេស្ទីនជ្រើសរើសយកសិទ្ធិក្នុងនាមជារដ្ឋមួយ ហើយមិនឱនក្បាលឡើយ។
មន្ត្រីទូតរូបនេះបាននិយាយដូច្នេះ៖ «វាមិនមែនជារឿងគួរឲ្យភ្ញាក់ផ្អើលសម្រាប់យើងឡើយដែលរដ្ឋបាលលោក ត្រាំ ផ្តល់ជម្រើសពីរដល់យើងក្នុងនោះមានមួយបាត់បង់សម្ព័ន្ធភាពជាមួយអាមេរិក ឬបិទបង់សិទ្ធិរបស់យើងក្នុងការក្លាយខ្លួនជារដ្ឋ។ ប្រធានាធិបតីយើង របបដឹកនាំយើង និងប្រជាជនយើងទាំងអស់ជ្រើសរើសយកសិទ្ធិ»។
តាមពិតទៅការបិទដំណើរបេសកកម្មការទូតប៉ាឡេស្ទីននៅអាមេរិកនេះជាចំណុចប្រទាំងប្រទើសនិងតានតឹងបំផុតថ្មីមួយទៀតរវាងមេដឹកនាំអាមេរិក និងប្រជាជនប៉ាឡេស្ទីន ក្រោយលោក ត្រាំ ប្តូរទីតាំងស្ថានទូតអាមេរិក និងទទួលស្គាល់ក្រុងពិសិដ្ឋហ្សេរ៊ុយសាឡិមជារដ្ឋធានីរបស់អ៊ីស្រាអែលកាលពីខែធ្នូកន្លងទៅនោះ។
ក្រៅពីនេះ ការសម្រេចបញ្ជាឲ្យបិទដំណើរការស្ថានបេសកកម្មការទូតប៉ាឡេស្ទីន កើតឡើងចំខួប ២៥ឆ្នាំនៃការបង្កើតកិច្ចព្រមព្រៀងសន្តិភាពក្រុងអូស្លូ (Oslo Accords) ដែលជាកិច្ចព្រមព្រៀងដំបូងមួយរវាងភាគីជម្លោះអ៊ីស្រាអែល និងប៉ាឡេស្ទីន។ កាលនោះភាគីទាំងពីរសន្យាបញ្ចប់ជម្លោះដ៏រ៉ាំរ៉ៃ និងបង្ហូរឈាមគ្នាអស់រាប់ទសវត្សរ៍នេះផង។ ប៉ុន្តែការប្តេជ្ញាចិត្តនេះមិនត្រូវបានអនុវត្តឡើយ ហើយភាគីកាន់តែដើរឆ្ងាយពីផ្លូវទៅរកសន្តិភាពថែមទៀតដែលពិបាកស្តារបំផុត។
យ៉ាងណាក៏ដោយ មន្ត្រីប៉ាឡេស្ទីនខាងលើអះអាងថា ប្រជាជនអាមេរិកច្រើនលាននាក់ដែលចាត់ទុកប៉ាឡេស្ទីនជាមិត្ត ហើយលោកសង្ឃឹមផងដែរថា នៅពេលអនាគតឆាប់ៗខាងមុខនេះស្ថានការណ៍នឹងប្រសើរឡើង ហើយវាអាចឆ្លុះបញ្ចាំងពីទំនាក់ទំនងប្រវត្តិសាស្ត្ររវាងប្រជាជនអាមេរិក និងប្រជាជនប៉ាឡេស្ទីនដែរ។
មុនមានការសម្រេចបង្ខំឲ្យប៉ាឡេស្ទីនបិទចោលស្ថានបេសកកម្មខ្លួន រដ្ឋបាលលោក ត្រាំ បានសម្រេចផ្តាច់ជំនួយមានទំហំ ២០០លានដុល្លារដែលជួយទ្រទ្រង់ជីវភាពប្រជាជនប៉ាឡេស្ទីន និងលុបចោលការគាំទ្រចំពោះភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន។
ការបញ្ចប់បេសកកម្មការទូតនេះដែរ ក៏ដោយសារអាមេរិកខឹងសម្បារដែលប៉ាឡេស្ទីនអំពាវនាវឲ្យមានការកាត់ទោសមន្ត្រីអ៊ីស្រាអែលនៅតុលាការព្រហ្មទណ្ឌអន្តរជាតិនៅទីក្រុងឡាអេផងដែរ។ មន្ត្រីជាន់ខ្ពស់ប៉ាឡេស្ទីនបានចោទប្រកាន់ថា ត្រាំ កំពុងធ្វើសកម្មភាពដែលលម្អៀងខ្លាំងទៅរកអ៊ីស្រាអែល ហើយអាមេរិកក៏លែងជាសន្ធានការីអព្យាក្រឹត្យ និងគួរឲ្យទុកចិត្តដែលអាចសម្របសម្រួល និងជួយគាំទ្រការស្វែររកសន្តិភាពក្នុងជម្លោះរវាងអ៊ីស្រាអែល និងប៉ាឡេស្ទីនទៀតដែរ៕