អន្តរជាតិ
មន្ត្រីចិនអះអាងថា រដ្ឋាភិបាលចិនកំពុងអប់រំជនជាតិភាគតិច Uighur មិនមែនកំពុងធ្វើទុក្ខបុកម្នេញពួកគេទេ
×![]()
ថ្ងៃទី ១៣ ខែកញ្ញាកន្លងទៅ រដ្ឋាភិបាលចិនអះអាងថា ខ្លួនមិនបានធ្វើទុក្ខបុកម្នេញជនជាតិមូស្លីម Uighur ក្នុងតំបន់ស៊ីនជាំងនោះដូចការចោទប្រកាន់ឡើយ។ ផ្ទុយទៅវិញ ខ្លួនកំពុងបញ្ជូនប្រជាជនទាំងនោះទៅទទួលការហ្វឹកហាត់ ដើម្បីឲ្យពួកគេអាចចៀសផុតពីការរីកសាយភាយនៃមនោគមន៍វិជ្ជាជ្រុលនិយម។
របាយការណ៍ជាច្រើនដែលបានបង្ហាញពីការឃុំឃាំងជនជាតិ Uighur និងប្រជាជនមូស្លីមផ្សេងទៀតជាច្រើនម៉ឺននាក់នោះក្នុងខេត្តភាគខាងលិចប្រទេសចិន បានធ្វើឲ្យផ្ទុះឡើងនូវការទិតៀនពីសំណាក់សហគមន៍អន្តរជាតិ។ ចំណែក រដ្ឋបាលលោក ដូណាល់ ត្រាំ ក៏ពិចារណាដាក់ទណ្ឌកម្មប្រឆាំងនឹងមន្ត្រីចិន និងក្រុមហ៊ុន ដែលពាក់ព័ន្ធនឹងករណីរំលោភសិទ្ធិមនុស្សធ្ងន់ធ្ងរនេះដែរ។
អត្ថបទទាក់ទង
បើតាមការចុះផ្សាយរបស់ទីភ្នាក់ងារព័ត៌មាន Reuters លោក Li Xiaojun នាយកទទួលបន្ទុកឃោសនាការនៃការិយាល័យព័ត៌មាននៃក្រុមប្រឹក្សារដ្ឋចិន បានច្រានចោលការចោទប្រកាន់ និងអះអាងថា វាជាការហ្វឹកហ្វឺនទប់ទល់នឹងការសាយភាយនៃមនោគមន៍វិជ្ជាជ្រុលនិយមប៉ុណ្ណោះ។
លោកបាននិយាយថា៖ «វាមិនមែនជាការធ្វើទុក្ខបុកម្នេញស្អីទេ។ អ្វីដែលរដ្ឋាភិបាលក្រុងប៉េកាំងកំពុងធ្វើនេះ គឺដើម្បីបង្កើតមជ្ឈមណ្ឌលហ្វឹកហាត់ និងមជ្ឈមណ្ឌលសិក្សា»។
លោក Li ក៏បានច្រានចោលការលើកឡើងថា ជំរំឃុំខ្លួននេះ យកលំនាំតាមជំរំឃុំខ្លួន Gulag របស់សហភាពសូវៀត ដែលបានបង្កើតឡើងអំឡុងសង្គ្រាមត្រជាក់។ លោកបានពន្យល់ថា៖ «និយាយឲ្យចំទៅ ជំរំនេះគឺស្រដៀងទៅនឹងមជ្ឈមណ្ឌលហ្វឹកហាត់...ប្រៀបដូចជាកូនៗរបស់អ្នកទៅកាន់សាលារៀន ដើម្បីបណ្ដុះជំនាញឲ្យបានប្រសើរជាងមុន ហើយទទួលបានការងារល្អបន្ទាប់ពីបញ្ចប់ការសិក្សា។ អ្នកខ្លះរៀនត្រឹម៥ថ្ងៃ អ្នកខ្លះ៧ថ្ងៃ ១០ថ្ងៃ ១ខែ និង២ខែជាដើម»។
នៅក្រៅកិច្ចពិភាក្សារបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នៅក្នុងទីក្រុង ហ្សឺណែវ ប្រទេសស្វីស មន្ត្រីជាន់ខ្ពស់រូបនេះពន្យល់បន្ថែមទៅកាន់អ្នកកាសែតថា វាជាវិធីចាំបាច់បំផុតដើម្បីទប់ទល់នឹងក្រុមជ្រុល ព្រោះថានៅប្រទេសលោកខាងលិច បានបរាជ័យរួចទៅហើយក្នុងការដោះស្រាយបញ្ហានេះ។ ជាឧទាហរណ៍ប្រទេសបែលហ្សិក និងទីក្រុងប៉ារីសជាដើម។
គួរបញ្ជាក់ដែរថា ប្រទេសចិន ជារឿយៗ ត្រូវបានសហគមន៍អន្តរជាតិរិះគន់ជុំវិញគោលនយោបាយស្តីពីសិទ្ធិមនុស្សរបស់ខ្លួន។ ជាក់ស្ដែងកាលពីថ្ងៃទី១២ កញ្ញា លោក Antonio Guterres អគ្គលេខាធិការ UN បានចោទប្រកាន់ប្រទេសចិនជុំវិញការធ្វើបាបក្រុមសកម្មជនសិទ្ធិមនុស្សដែរ៕
Tag:
ចិន
Uighur
អង្គការសហប្រជាជាតិ
Li Xiaojun
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
