កីឡាអន្តរជាតិ
អន្តរជាតិ
Real ត្រៀម ៤៣២លានដុល្លារ ដើម្បីយក Neymar ឬ Mbappe ពី PSG
× ក្លិបយក្សអេស្ប៉ាញ Real Madrid ត្រៀមប្រាក់ ៣៣០លានផោន (៤៣២លានដុល្លារអាមេរិក) ដើម្បីទិញយក Neymar ឬ Kylian Mbappe របស់ Paris Saint-Germain នៅរដូវកាលក្រោយ។ នេះបើតាមប្រភពពីអេស្ប៉ាញ។
ក្លិបរហស្សនាមស្តេចសកំពុងសម្លឹងមើលកីឡាករដែលមានគុណភាពដើម្បីបន្តឥទ្ធិពលរបស់ពួកគេក្នុងការប្រជែងពានជាមួយក្លិបកំពូលៗនៅអឺរ៉ុប និងដើម្បីជំនួសកន្លែងអតីតខ្សែប្រយុទ្ធឆ្នើម Cristiano Ronaldo។
បើយោងតាមការចុះផ្សាយរបស់កាសែតអេស្ប៉ាញ AS ប្រធានក្លិប Real Madrid លោក Florentino Perez កំពុងរៀបចំគម្រោងដាក់តម្លៃទៅកាន់ក្លិប PSG លើខ្សែប្រយុទ្ធសញ្ញាតិប្រេស៊ី Neymar និង Kylian Mbappe ខ្សែប្រយុទ្ធវ័យក្មេងដែលជួយបារាំងឈ្នះពាន World Cup ទៅរួមក្រុមនៅរដូវកាលក្រោយ។
ការចង់បានកីឡាករឆ្នើមទាំងពីរពីក្លិបយក្សបារាំង Ligue 1 ដោយត្រៀមប្រាក់យ៉ាងសន្ធឹករហូតដល់៤៣២លានដុល្លារអាមេរិកនោះ គឺដើម្បីយកមកបំពេញចន្លោះប្រហោងរបស់ក្រុមក្រោយពេល Ronaldo បានផ្លាស់ទៅក្លិបជើងឯកអ៊ីតាលី Juventus នៅដើមរដូវកាលថ្មីនេះ។
Real ក្រោមការដឹកនាំរបស់អ្នកចាត់ការថ្មី Julen Lopetegui បានចាប់ផ្តើមរដូវកាលដ៏ល្អជាមួយការឈ្នះទាំង៣លើកជាប់គ្នាសម្រាប់ការប្រកួតពានក្របខណ្ឌ La Liga របស់អេស្ប៉ាញ។ សម្រាប់ការប្រកួតនៅសប្តាហ៍ទី៤ នៅទឹកដី Bernabeu ក្រុមមានមូលដ្ឋានក្នុងក្រុងម៉ាឌ្រីតនេះនឹងត្រូវស្វាគមន៍ Athletic Bilbao ដើម្បីបន្តភាពមិនចាញ់របស់ពួកនៅរដូវកាល ២០១៨-២០១៩ នេះ៕
Tag:
បាល់ទាត់
Neymar
Kylian Mbappe
Real Madrid
© រក្សាសិទ្ធិដោយ thmeythmey.com