រដ្ឋមន្ត្រីបរិស្ថាន៖ កម្ពុជាបន្តប្រឹងប្រែងលុបបំបាត់សារធាតុបំផ្លាញស្រទាប់អូហ្សូន

ជាតិ

រដ្ឋមន្ត្រីបរិស្ថាន៖ កម្ពុជាបន្តប្រឹងប្រែងលុបបំបាត់សារធាតុបំផ្លាញស្រទាប់អូហ្សូន

16, Sep 2018 , 2:39 pm

រូបភាព

លោក សាយ សំអាល់ រដ្ឋមន្ត្រីក្រសួងបរិស្ថាន

ដោយ: ភួង វ៉ាន់ថា

នាឱកាសនៃការប្រារព្ធទិវាអូហ្សូនពិភពលោក នៅថ្ងៃទី១៦ ខែកញ្ញា នេះ ក្រសួងបរិស្ថាន បានបង្ហាញពីការប្តេជ្ញាចិត្តរបស់ខ្លួនក្នុងការបន្តលុបបំបាត់ការប្រើប្រាស់សារធាតុបំផ្លាញស្រទាប់អូហ្សូន និងបន្តចូលរួមការពារភពផែនដីពីការកើនឡើងកំដៅ។

លោក សាយ សំអាល់ រដ្ឋមន្ត្រីក្រសួងបរិស្ថានបានថ្លែងថា៖ «កម្ពុជាបានបេ្តជ្ញាចូលរួមជាមួយសហគមន៍អន្តរជាតិ ក្នុងការអនុវត្តឲ្យបានជោគជ័យ នូវរាល់កាតព្វកិច្ចរបស់ខ្លួន សំដៅធានាឲ្យបាននូវ ប្រសិទ្ធភាពនៃការគ្រប់គ្រង ការកាត់បន្ថយ និងការលុបបំបាត់ការប្រើប្រាស់សារធាតុបំផ្លាញស្រទាប់អូហ្សូន»។

តាមរយៈលិខិតមួយចុះកាលពីថ្ងៃទី១៤ ខែកញ្ញា លោករដ្ឋមន្ត្រី បានបន្ថែមថា ក្នុងនាមរដ្ឋភាគី កម្ពុជាបានបញ្ឈប់ការប្រើប្រាស់សារធាតុ ក្លរ៉ូភ្លុយអររ៉ូកាបូន ទាំងស្រុងក្នុងឆ្នាំ២០១០ ហើយកំពុងបន្តអនុវត្តផែនការគ្រប់គ្រងការលុបបំបាត់សារធាតុ ហាយដ្រូក្លរ៉ូភ្លុយអររ៉ូកាបូន ស្របតាមផែនការលុបបំបាត់សាធារតុបំផ្លាញស្រទាប់អូហ្សូន របស់ពិធីសារម៉ុងរ៉េអាល់។

ជាមួយគ្នានេះ លោក សាយ សំអាល់ បានអំពាវនាវដល់គ្រប់ក្រសួង ស្ថាប័ន និងអ្នកពាក់ព័ន្ធទាំងអស់ អនុវត្តឲ្យបាននៅបទដ្ឋាបគតិយុត្តផ្សេងទៀតដែលទាក់ទងនឹងការប្រើប្រាស់សារធាតុគីមីដែលធ្វើឲ្យប៉ះពាល់ដល់បរិស្ថាន។

បណ្តាប្រទេសនៅលើពិភពលោក ប្រារព្ធទិវាអូហ្សូនពិភពលោកក្រោមប្រធានបទ «ថែភពផែនដីឲ្យត្រជាក់ និងបន្តអនុវត្ត ការការពារស្រទាប់អូហ្សូន និងបរិយាកាសរបស់យើងក្នុងទិវាអូហ្សូនពិភពលោក» ដែលក្នុងន័យបំផុសស្មារតីប្រជាពលរដ្ឋ គ្រប់មជ្ឈដ្ឋានឲ្យបន្តចូលរួមចំណែកថែរក្សាភពផែនដីឲ្យនៅត្រជាក់។

កម្ពុជាជាសមាជិកនៃអនុសញ្ញាទីក្រុងវីយ៉ែនស្ដីពីកិច្ចការពារស្រទាប់អូហ្សូន ក្នុងចំណោមប្រទេសចំនួន១៩៧។ ចាប់តាំងពីឆ្នាំ១៩៩៥មក លេខាធិការដ្ឋានអូហ្សូននៃអង្គការកម្មវិធីបរិស្ថាន សហប្រជាជាតិ បានកំណត់យកថ្ងៃទី១៦ ខែកញ្ញា ជាថ្ងៃប្រារព្ធខួប «ទិវាអូហ្សូនពិភពលោក» ជារៀងរាល់ឆ្នាំ ដែលត្រូវជាខួបលើកទី៣៣ នៃការបង្កើត៖ «អនុសញ្ញាទីក្រុងវីយ៉ែនស្តពី កិច្ចការពារស្រទាប់អូហ្សូន» និងត្រូវជាខួបលើកទី៣១ នៃការបង្កើត «ពិធីសារម៉ុងរ៉េអាល់ ស្តីពីសារធាតុបំផ្លាញស្រទាប់អូហ្សូន»៕