ជាតិ
×![]()
ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក រយៈពេល៣ថ្ងៃ នៅទន្លេចតុមុខ នឹងប្រព្រឹត្តចាប់ពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨។ រដ្ឋបាលរាជធានីភ្នំពេញបានចេញសេចក្តីជូនដំណឹង កាលពីថ្ងៃទី ១៣ ខែកញ្ញាថា គ្រប់រដ្ឋបាលខណ្ឌទាំង១២នៅភ្នំពេញ និងមន្ទីរក្រសួងពាក់ព័ន្ធទាំងឡាយ ត្រូវត្រៀមលក្ខណៈដើម្បីរៀបចំពិធីបុណ្យជាតិនេះ ឲ្យអធិកអធម ស្របទៅតាមប្រពៃណី-សាសនា និងការអភិវឌ្ឍជាក់ស្តែងរបស់ប្រទេសជាតិ ដោយធានាបាននូវសុវត្ថិភាព និងការសប្បាយរីករាយ ជូនប្រជាពលរដ្ឋ។
សេចក្តីជូនដំណឹងខាងលើ បានបញ្ជាក់ថា គ្រប់រដ្ឋបាលខណ្ឌ និងមន្ទីរ-អង្គភាពជំនាញជុំវិញរដ្ឋបាលរាជធានីភ្នំពេញ ត្រូវត្រៀមរៀបចំ និងតុបតែងលម្អនូវទង់ជាតិ ទង់សាសនា ទង់ក្អែប បដាពាក្យស្លោក និងបំភ្លឺភ្លើងពណ៌ប្លែកៗ នៅតាមមន្ទីរ-អង្គភាព សាលារៀន រោងចក្រ-សហគ្រាស និងលំនៅដ្ឋានរបស់ប្រជាពលរដ្ឋ ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។
បន្ថែមពីនេះទៀត គ្រប់ភាគីពាក់ព័ន្ធទាំងអស់ ត្រូវធ្វើការណែនាំដល់មូលដ្ឋានដែលមានទូក «ង» និង«ទូកមួង» ដែលជាប្រភេទ«ទូកអុំ និងទូកចែវ» ត្រូវធ្វើការហ្វឹកហាត់សាកល្បងឲ្យហើយ ដោយជ្រើសរើសអ្នកដែលមានកាយសម្បទាគ្រប់គ្រាន់ និងចេះហែរទឹកយ៉ាងជំនាញឲ្យបានមុខថ្ងៃទី៧វិច្ឆិកា ដើម្បីចូលរួមប្រណាំងប្រជែង ក្នុងពិធីបុណ្យអ៊ុំទូកនេះ។
ជាមួយគ្នានេះ រដ្ឋបាលរាជធានីភ្នំពេញ ក៏បានបង្គាប់ឲ្យមន្ទីរវប្បធម៌ និងវិចិត្រសិល្បៈរាជធានីភ្នំពេញ ត្រូវចាត់តាំងកម្មវិធីសិល្បៈសម្តែងជូនប្រជាពលរដ្ឋទស្សនាកម្សាន្ត នៅវត្តមុខវត្តបទុមវត្តី, វត្តភ្នំ សួនច្បារ សម្តេចហ៊ុន សែន និងនៅកោះពេជ្រជាដើម ទៅតាមកម្មវិធីកំណត់ជាក់ស្តែង។
ដោយឡែក មន្ទីរព័ត៌មានរាជធានីភ្នំពេញ ត្រូវសហការជាមួយវិទ្យុ និងទូរទស្សន៍ ចុះយកព័ត៌មាន និងផ្សព្វផ្សាយជូនប្រជាពលរដ្ឋ។ ចំពោះស្នងការដ្ឋាននគរបាលរាជធានីភ្នំពេញ និងកងកម្លាំងសម្ថកិច្ច ត្រូវរៀបចំផែនការការពារជាក់ស្តែង សម្រាប់បង្កើនកិច្ចការពារ សុវត្ថិភាព សន្តិសុខសណ្តាប់ធ្នាប់ របៀបរៀបរយ និងចរាចរណ៍មុន និងក្រោយ ពេលពិធីបុណ្យអុំទូកឆ្នាំនេះ។ នេះបើយោងតាមសេចក្តីណែនាំរបស់រដ្ឋបាលរាជធានីភ្នំពេញ ស្តីពីការរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០១៨៕
Tag:
ប្រពៃណី
អុំទូក
ចតុមុខ
© រក្សាសិទ្ធិដោយ thmeythmey.com
