ជាតិ
នយោបាយជាតិ
សម្តេច ស ខេង៖ អរគុណពលរដ្ឋដោយពង្រឹងសេវាមូលដ្ឋាន មិនមែនហៅផឹកស្រាជប់លៀងឡើយ
× ភ្នំពេញ៖ សម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងទៅកាន់សមាជិកគណបក្ស ដែលបានជាប់ឆ្នោត ឲ្យអរគុណប្រជាពលរដ្ឋ ដោយបម្រើសេវាមូលដ្ឋាន ដោះស្រាយបញ្ហាផ្លូវថ្នល់ អគ្គីសនី និងទឹកស្អាត ជូនពលរដ្ឋ ជាជាងទិញស្រាដើម្បីជប់លៀង។ សម្ដេចថ្លែងបែបនេះនៅក្នុងកម្មវិធីសំណេះសំណាលជាមួយសមាជិក អ្នកគាំទ្រគណបក្សខេត្តព្រៃវែង នៅថ្ងៃទី១៦ ខែកញ្ញា។
ក្រោយពីគណបក្សប្រជាជនកម្ពុជាបានទទួលសំឡេងគាំទ្រយ៉ាងច្រើនលើសលប់ពីប្រជាពលរដ្ឋ ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ ដោយទទួលបានអាសនៈរហូតដល់១២៥អាសនៈ សម្ដេច ស ខេង បានឲ្យមន្ត្រីគណបក្សទាំងអស់អរគុណដល់ប្រជាពលរដ្ឋ។ ការអរគុណដែលសម្ដេចចង់បាននោះគឺ ការបម្រើសេវាសាធារណៈឲ្យបានល្អ និងដោះស្រាយបញ្ហាផ្លូវថ្នល់ ប្រឡាយទឹក អគ្គសនី និងទឹកស្អាតជូនដល់ពលរដ្ឋ មិនមែនការទិញស្រាដើម្បីជប់លៀងនោះទេ។
សម្ដេចថ្លែងបែបនេះនៅក្នុងកម្មវិធីសំណេះសំណាលជាមួយសមាជិក អ្នកគាំទ្រគណបក្សខេត្តព្រៃវែង នៅថ្ងៃទី១៦ ខែកញ្ញា។ ការបម្រើប្រជាពលរដ្ឋឲ្យបានល្អ ត្រូវបានសម្ដេចអះអាងថា ជាផ្លូវទៅរកជ័យជំនះសម្រាប់ឆ្នាំ២០២២ និងឆ្នាំ២០២៣ នៅក្នុងដំណើរការបោះឆ្នោតរបស់ប្រទេសកម្ពុជា។
មិនតែប៉ុណ្ណឹងសម្ដេចក៏ជម្រុញឲ្យមន្ត្រីថ្នាក់លើផ្ដល់អទិភាពការងារទៅមន្ត្រីថ្នាក់មូលដ្ឋាន ដែលមានមូលដ្ឋានផ្ទាល់តំបន់នោះ ដើម្បីឲ្យការអនុវត្តការងារមានប្រសិទ្ធភាព។ សម្ដេចបញ្ជាក់ថា «ធ្វើយ៉ាងណាដើម្បីកុំឲ្យបាត់សំឡេងគាំទ្រ ទោះមានចំនួនតិចតួចក៏ដោយ»។
សម្ដេចក៏ជំរុញឲ្យមានការរឹតបន្តឹងភូមិឃុំមានសុវត្ថិភាព លុបបំបាត់ការជួញដូរគ្រឿងញៀន ជួញដូរមនុស្ស ចោរកម្ម និងករណីអំពើហិង្សារជាដើម ដើម្បីជាការសងគុណដល់ប្រជាពលរដ្ឋ៕
© រក្សាសិទ្ធិដោយ thmeythmey.com