Sky Cab នៅ Langkawi ទាក់ទាញទេសចរជាង១លាននាក់ក្នុងមួយឆ្នាំ

អន្តរជាតិ

Sky Cab នៅ Langkawi ទាក់ទាញទេសចរជាង១លាននាក់ក្នុងមួយឆ្នាំ

17, Sep 2018 , 9:29 am

រូបភាព

ដោយ: អុីសា រ៉ហានី (Isa Rohany)

Langkawi, Malaysia: ភ្ញៀវទេសចរចម្រុះជាតិសាសន៍បានសម្រុកទៅកម្សាន្តកោះ ឡាំងកាវី ស្ថិតក្នុងខេត្ត SABAH ប្រទេសម៉ាឡេស៊ី។ កោះនេះសម្បូរដោយជីវចម្រុះ អេកូទេសចរណ៍ និងកោះតូចៗព័ទ្ធជុំវិញ ពិសេសឆ្នេរខ្សាច់ដ៏ស្រស់ស្អាត។ អ្វីដែលជាចំណាប់អារម្មណ៍របស់ទេសចរក្រៅពីនេះ គឺ Sky Cab ដែលជាកន្លែងដែលភ្ញៀវទេសចរមិនអាចរំលងបាន ពេលទៅដល់កោះឡាំងកាវី។

ខ្សែកាបអាកាស មានការពេញនិយមខ្លាំង ដោយមានការបំពាក់ឧបករណ៍ទំនើប និងហោះកាត់ពីកំពូលភ្នំមួយទៅមួយទៀត អមដោយទេសភាពប្លែកភ្នែក និងហោះកាត់ពពកអ័ព្វផងដែរ។

Sky Cab បានបើកដំណើរការនៅឆ្នាំ២០០២ គឺមានរយៈពេល១៦ឆ្នាំមកហើយ។ កន្លែងកម្សាន្តនេះ មានទាក់ទាញភ្ញៀវទេសចរប្រមាណ ១០ម៉ឺននាក់ក្នុងមួយខែ។ ប្រធានផ្នែកទីផ្សារ និងទំនាក់ទំនងអតិថិជន កញ្ញា Anis Faezah Binti Mat Aziz បានប្រាប់សារព័ត៌មានថ្មីៗនៅថ្ងៃទី១២ កញ្ញាថា កាលពីឆ្នាំទៅ Sky Cab បានទាក់ទាញភ្ញៀវទេសចរចម្រុះជាតិសាសន៍ ប្រមាណ ១លាន២សែននាក់ ចូលមកកម្សាន្ត។

អ្វីដែលពិសេសសម្រាប់ភ្ញៀវទេសចរនោះ គឺនៅពេលស្ថិតនៅលើខ្សែកាបអាកាសនេះ ពួកគេក៏អាចឃើញពីទិដ្ឋភាពនៃសមុទ្រ ដែលខាត់ចែករវាងសមុទ្រកោះឡាំងកាវី និងសមុទ្រប្រទេសថៃផងដែរ៕